Barua Mokwongo mar Petro 3:1-22
3 E yo ma kamano, un mon, bolreuru ne chwou+ mondo ka nitie moko kuomgi ma ok luw wach Nyasaye, to oywagi kokalo kuom timbe mag mondegi kata ka ok oyalnegi wach,+
2 nikech gisebedo ka gineno timbeu maler+ kod kaka unyiso luor matut.
3 Kik uwe mondo bidhruoku obed mana ma oko—kaka kado yie wich, kata rwakruok gi gik dhahabu,+ kata lewni mabeyo—
4 to onego obed bidhruok ma iye mar chuny, ma ok kethre, ma nyiso ni un gi chuny ma terore mos kendo mamuol.+ Mano e gima nigi duong’ moloyo e wang’ Nyasaye.
5 Nimar mano e kaka mon maler machon ma nogeno kuom Nyasaye ne jobidhore, ka giyie bolore giwegi e bwo chwogi,
6 mana kaka Sara ne winjo Ibrahim koluonge ni ruodha.+ Omiyo, usebedo nyithind Sara, tek mana ni udhi nyime timo gik mabeyo ma ok uwe gimoro amora omiu luoro.+
7 Kamano bende, un chwo, dhiuru nyime dak gi mondeu ka un gi ng’eyo malong’o.* Migiuru duong’ ahinya+ kaka ne gima ng’aw, nikech gin jo ma mon, nimar gin bende gibiro yudo ng’wono mogundho mar ngima kanyachiel kodu,+ mondo kik geng’ lamou.
8 Mogik, uduto beduru e paro achiel,+ ka ukechoru, ka unyisoru hera mar owete, ka unyisoru ng’wono,+ kendo kuboloru.+
9 Kik uchul rach kar rach,+ kata ayany kar ayany.+ Kar mano, guedhgiuru,+ nikech ne oluongu e yorni mondo ubi uyud gueth kaka pok maru.
10 Nimar “ng’at ma dwaro ngima maber, kendo ma dwaro dak aming’a, nyaka geng’ lewe kik wach weche maricho,+ kendo ogeng’ dhoge kik wach miriambo.
11 Olokre owe richo,+ kendo otim gik mabeyo;+ omany kuwe kendo oluwe.+
12 Nimar wenge Jehova* ng’iyo jo makare, kendo ite winjo sayogi,+ to wang’ Jehova* mon gi jo ma timo gik maricho.”+
13 Ka un gi kinda ne gik mabeyo, en ng’a ma kuom adier biro hinyou?+
14 To kata ka isandou nikech tim makare, ubedo jo mamor.+ Kata kamano, kik uluor gima giluoro,* bende kik chunyu chandre.+
15 To yieuru e chunyu ni Kristo e Ruoth kendo ni oler, ka kinde duto ubedo moikore dwoko wach e nyim ng’at ma dwaro ng’eyo wach geno ma un-go, to utim kamano gi chuny mamuol+ kod luor matut.+
16 Sikuru ka un gi chuny maler,+ mondo ka nitie wach moro amora marach miwacho e wiu, jo ma timo kamano oyud wich-kuot+ nikech timbeu mabeyo kaka jolup Kristo.+
17 Nimar ber moloyo osandu nikech utimo gik mabeyo,+ ka mano e dwaro mar Nyasaye, kar mondo osandu nikech utimo gik maricho.+
18 Nikech kata mana Kristo ne otho dichiel ma ok bi nwo kendo, mondo oum richo,+ ng’at makare ne jo ma ok kare,+ mondo otau koterou ir Nyasaye.+ Ne onege e ringruok,+ to ne ochiere e del mar polo.+
19 Kendo ka ne en e del ma kamano, ne odhi molando wach kum ne jochiende manie tuech,+
20 ma chon ne otamore winjo Nyasaye, e ndalo mag Noa,+ ka ne Nyasaye pod hore sa ma ne igero yie.+ Ji manok kende, tiende ni ji aboro, e ma ne ores e pigno.+
21 Batiso, ma en gima chalo gi mano bende resou gie sani (ok kuom golo chilo mag ringruok, to kuom kwayo Nyasaye mondo omiwa chuny maler),+ kokalo kuom chier mar Yesu Kristo.
22 Sani en e bad Nyasaye korachwich,+ nimar ne odhi e polo, kendo malaike, gi loje, kod telo, ne oket e bwo tekone.+
Weche Moler Piny
^ Kata, “kudewogi.”
^ Som Apendiks A5.
^ Som Apendiks A5.
^ Kata nyalo bedo, “kik uluor gik ma gibwogougo.”
