Ji osebedo kong’eyo ni Jokristo timoga nyasi mar Krismas mondo gipargo nyuol mar Yesu. Kata kamano, gima kawowa gi wuoro en ni thoth gik ma ji timoga e ndalo nyasino otudore nade gi nyuol Yesu.

Mokwongo, nitie sigana moro mochuogi ma wuoyo e wi Fadha Krismas. E ndalogi Fadha Krismas en-ga ng’at mamor, yie tike rachar, lepe kwar kendo e higa mar 1931 nitie kambi moro e North America ma nochako tiyo kode e lando gik ma giloso e ndalo Krismas kendo ne giyudo ohala kuom tiyo kode. E higni mag 1950, Jo-Brazil moko notemo golo Fadha Krismas mondo giket ng’atgi moro ma sigande ong’ere miluongo ni Grandpa Indian. Be nonyalore? Ooyo, nikech Fadha Krismas noloyo Grandpa Indian kendo profesa moro miluongo ni Carlos E. Fantinati nowacho ni, ‘Fadha Krismas noloyo nyathi ma Yesu mi nopwodhe bedo ng’at mitiyogo kinde mitimo nyasi mar Krismas e dwe mar Desemba 25.’ Be sigendni kaka mag Fadha Krismas kende e ma miyo Krismas bedo marach? Mondo wayud dwoko, we wadog ane e ndalo Jokristo mokwongo.

Buk moro miluongo ni Encyclopedia Britannica wacho kama: “E kinde ma din ma Jokristo ne chakore nyaka higni 200 kama bang’e, ji ne kwedo mager wach paro odiechieng’ nyuol mar joma ne onegi nikech yie ma ne gin-go, kata paro nyuol mar Yesu.” Nikech ang’o? Jokristo ne neno wach paro odiechieng’ nyuol kaka timbe ma ne oa kuom joma ne lamo nyiseche manono kendo monego okwed chuth. Bende, Muma ok nyis tarik ma nonyuolie Yesu.

E higni mag 300 bang’ ka Kristo osebiro e piny, kata obedo ni Jokristo mokwongo ne ong’ado ni ok gibi timo nyasi mag paro odiechienge mag nyuol, Kanisa mar Katholik to nochako nyasi mar Krismas. Kanisa mar Katholik ne dwaro ni ogurre motegno. Kuom mano, ne girwako timbe mag dinde mag Jo-Rumi ma ne lamo nyiseche manono, kod nyasi ma ne gijotimo e ndalo koyo, mondo ji orwak din mar Katholik. Buk moro miluongo ni Christmas in America, mogo gi Penne L. Restad wacho ni higa ka higa chakre Desemba 17 nyaka Januar 1, “thoth Jo-Rumi ne jobedo gi nyasi, tuke, ne gijowuotho e nderni, kendo timo nyasi mamoko mag miyo nyisechegi luor.” Kendo e Desemba 25, Jo-Rumi ne timo nyasi mar paro nyuol mar Chieng’ Maok Ne. Kanisano ne ochako nyasi mar Krismas e chieng’no mondo giyondh Jo-Rumi mang’eny ochak timo nyasi mar paro nyuol Yesu kar paro nyuol mar Chieng’ Maok Ne. Buk moro miluongo ni Santa Claus, a Biography, mogo gi Gerry Bowler wacho ni Jo-Rumi “pod ne nyalo luwo timbe mamoko ma ne gijotimoga e nyasi mag ndalo mag koyo.” Kuom adier, ne ‘gidhi nyime timo gik machon e nyasi manyien mar paro nyuol Yesu.’

Nenore maler ni gima rach gi gik ma ji timoga e nyasi mar Krismas en ni timbego ne ochakore kuom joma timbegi nodwanyore. Stephen Nissenbaum nowacho e buge miluongo ni The Battle for Christmas, ni Krismas en “mana nyasi mar joma lamo nyiseche manono to oloke mondo ochal ka mar Jokristo.” Omiyo, Krismas en nyasi ma ok mi Nyasaye luor kaachie gi Wuode, Yesu Kristo. Be onego wakaw wachni mayot? Muma penjowa kama: “Lalruok mane ma nitie e kind tim makare kod ketho chik? Koso, en winjruok mane ma nitie e kind ler kod mudho?” (2 Jo-Korintho 6:14) Mana kaka kor yath kodongo mobam to ok diriere, e kaka Krismas bende osebam ma koro ‘ok nyal rieye.’—Eklesiastes 1:15.