Mokwongo, wachni hoyo chunywa ahinya: Nyasaye neno chandruok mopong’o piny e kindegi, kendo ochano mar kawo okang’ mowinjore. (Zaburi 72:13, 14) E Wachne ma en Muma, Nyasaye singo ni jogo ‘ma yudo masiche, ibiro migi yueyo.’ Mano notimre karang’o? “E chieng’no ma Ruodhwa Yesu biro fwenyoree koa e polo ka en-gi malaikene ma nigi teko . . . sama ochulo kuor kuom joma ok ong’eyo Nyasaye kod joma ok luw wach maber e wi Ruodhwa Yesu.” (2 Jo-Thesalonika 1:7, 8) Yesu biro fwenyore e kinde ma biro ma Muma wacho ni en “lweny mar odiechieng’ maduong’ mar Nyasaye Manyalo Duto,” ma bende iluongo ni Har–Magedon.—Fweny 16:14, 16.

E lwenyno Nyasaye ok bi kedo kotiyo gi dhano, kar mano, obiro tiyo gi Wuode Yesu Kristo, kod malaike mamoko ma nigi teko mondo e ma oked gi joricho. Jolweny ma biro a e pologo biro golo ne dhano gik moko duto ma sandogi.—Isaiah 11:4; Fweny 19:11-16.

Nyasaye pod neno lweny mana kaka ne onene chon. Pod oneno lweny kaka yo mowinjore mar golo joma sando ji kod richo. To mana kaka e kinde machon, Nyasaye kende e ma nigi ratiro mar keto kinde ma lweny onego obedie, kaachiel gi yiero joma onego oked e lwenyno. To mana kaka waseneno, Nyasaye oseng’ado ni obiro golo joma sando jowetegi kaachiel gi richo e kinde ma biro  kotiyo gi Wuode, Yesu Kristo. Mano nyiso maler ni e kindegi Nyasaye ok oyie kata matin gi lweny moro amora ma dhano kedoe e pinyka, kata obedo ni joma kedogo nyalo paro ni gikedo mondo gikony jomoko.

Par ane ranyisini: Nyathi moro chako gore gi owadgi sama wuon-gi onge. Giweyo gore matin, kae to gigoyo ne wuon-gi simo e wi wachno. Achiel kuomgi wacho ni nyawadgi e ma nochako lwenyno, machielo to wacho ni nyawadgi e ma notimone marach. Moro ka moro kwayo mondo wuon-gi oriwe lwedo e ywaruogno. Kata kamano, bang’ winjo gima giduto giwacho, wuon-gi nyisogi ni giwe gore kendo girite nyaka oduog e dala. Girito kuom dakika moko matin. Kae to gichako gore kendo. Sama wuon-gi oduogo dala ok omor gi wachno, kendo ochwadogi nikech ne ok giluwo kaka nonyisogi.

E kindewagi, ogendni ma kedo kwayoga Nyasaye mondo okonygi. Kata kamano, Nyasaye ok riw konchiel lwedo e lweny moro amora. Kar mano, Wachne ma en Muma nyisowa kama: “Kik uchul richo kar richo ne ng’ato ang’ata,” kendo ni, “Kik uchul kuor e lou uwegi.” (Jo-Rumi 12:17, 19) E wi mano, osenyiso dhano ni onego ‘gikiye gi kinda’ mondo en owuon okaw okang’ mowinjore, kendo obiro timo kamano e Har–Magedon. (Zaburi 37:7) Sama ogendni otamore rito mondo Nyasaye e ma okaw okang’, kendo gihedhore donjo e lweny, Nyasaye kawo mano kaka tim gero kendo ok more kata matin. Kuom mano, e lweny mar Har–Magedon Nyasaye biro nyiso mirimbe, kendo mano biro tieko lwenje duto ‘nyaka e giko piny.’ (Zaburi 46:9; Isaiah 34:2) Kuom adier, lweny mar Har–Magedon e ma biro tieko lwenje duto e pinyka.

Achiel kuom gik madongo ma Pinyruodh Nyasaye biro tieko e pinyni en lwenje. Yesu nowuoyo kuom sirkandno e lamo mong’ere ahinya, nowacho ni: “Pinyruodhi mondo obi. Dwaroni mondo otimre bende e piny, kaka e polo.” (Mathayo 6:10) Pinyruodh Nyasaye biro golo lweny kaachiel gi gino ma kelo lweny, tiende ni timbe maricho. * (Zaburi 37:9, 10, 14, 15) To mano e gimomiyo jolup Yesu rito gi kinda yudo gueth mogundho ma Pinyruodh Nyasaye biro kelo.—2 Petro 3:13.

Kata kamano, wabiro rito nyaka karang’o mondo wane ka Pinyruodh Nyasaye tieko chandruok kaachiel gi richo duto? Gik ma nokor e Muma ma chopo e kindegi, nyiso maler ni wadak e “ndalo mag giko.” (2 Timotheo 3:1-5) * E kinde mokayo machiegni Pinyruodhno e ma biro kelo giko mag ndalo mwadakiegi e lweny mar Har–Magedon.

Mana kaka ne waseneno, jo mibiro tiek e lweny mogikno biro bedo jogo ma otamore ‘luwo wach maber e wi Ruodhwa Yesu.’ (2 Jo-Thesalonika 1:8) To bende kik wiyi wil ni Nyasaye ok mor sama dhano tho, moriwo nyaka joricho. (Ezekiel 33:11) Nikech “ok odwar ni oketh ng’ato ang’ata” e lweny mogikno, ogombo ahinya mondo wach maber e wi Ruodhwa Yesu ‘oyal e piny mangima mondo ochiw neno ne ogendni duto’ kapok giko ochopo. (2 Petro 3:8, 9; Mathayo 24:14; 1 Timotheo 2:3, 4) Kuom adier, kokalo kuom tij lando wach maber ma Joneno mag Jehova timo e kindegi, dhano yudo thuolo mar puonjore e wi Nyasaye, kendo luwo wach maber e wi Yesu, kaachiel gi thuolo mar dak e kinde ma lwenje ok nobedie nyaka chieng’.