Higa ma luwo ne achako tugo e sinembe, kendo kinde mang’eny ne imiyaga migawo mar tugo kaka ng’at maduong’ e sinemano. Jofwamb weche ne dwaro wuoyo e wi ngimana, jogo piche bende ne dwaro pichena, johala kod jomamoko ne dwaro ni abedie sama giyawo ohendni maggi, kendo ne igwelaga e gago makende. Kamoro amora ji ne wacha.

Kata kamano, bang’e nafwenyo ni magi duto ne ok kelna mor kaka naparo. Thothne ne atugo sinembe mopong’ gi lweny kendo mano ne nyalo kelona hinyruok. Joma tugo e sinembe e Hong Kong kinde mang’eny ok ti gi yo ma jotug sinembe mamoko kaka ma Hollywood e piny Amerka tiyogo. Kuom ranyisi, ne chuno mondo atug kuonde moko e sinema ma ne nyalo hinyo ngimana, kaka riembo apiko e wi mtoka. Sinembe mang’eny ma natugoe ne nigi timbe mag terruok kod gero. Moko kuomgi ne nyiso timbe juok.

E higa mar 1995, ne wakendore gi ng’at moro ma ne jalos sinema. Kata obedo ni ne an gi gik ma ji paro ni kelo ne ng’ato mor e ngima kaka huma, mwandu, kod dichwo ma nohera, pod ngimana nopong’ gi kuyo. Omiyo, ne aweyo tugo e sinembe.

Ne achako paro gi mor yie ma ne an-go kapod ne an nyako matin. E kindego, Ngeso ka Ngeso an kaachiel gi nyaminwa ne wadhiga limo joot moro ma gin Joneno mag Jehova. Wuon-gi miluongo ni Joe McGrath ne puonjrega kodwa Muma kaachiel gi nyige adek. Ne gin joot ma nigi mor kod hera, kendo “Nera Joe” ne timo ne jaode kaachiel gi nyithinde gik moko e yor luor. Ne ahero dhi kodgi e chokruoge mag Jokristo. Kinde moko ne wadhiga e chokruoge madongo. Mago ne gin kinde maber. Ne awinjo ka chunya okuwe bedo kanyachiel gi Joneno mag Jehova.

Mopogore gi mano gik maricho ne timore e odwa. Kit ngima wuonwa ne odakie ne kelo ne minwa kuyo ahinya, kendo ne obedo gi parruok mang’eny. Kane an jahigni apar kama, minwa ne oweyo lemo kanyachiel  gi Joneno mag Jehova. An to ne adhi nyime gi chuny ma nus nus kendo ne obatisa ka an jahigni 17. Bang’ kinde matin, ne adonjo e timbe ma ok owinjore gi Jokristo kendo koro ne ok anyal dhi nyime bedo achiel kuom Joneno mag Jehova.

Mapiyo bang’ ka wasetimo arus, jodongo moko ariyo mag Joneno mag Jehova ma ne a e kanyakla ma ne nie alworawa ne obiro lima. Ne gilerona kaka ne anyalo duogo ir Jehova Nyasaye, kendo ne chano mondo jamisonari miluongo ni Cindy mondo okonya. Gie kindeno noyudo aselalo yiena, omiyo ne awachone ni mondo onyisa kabe Muma en Wach Nyasaye adier. Ne onyisa ranyisi moko mag weche ma nokor e Muma mosechopo. Mosmos ne wabedo osiepe ahinya, kendo ne okwayo ni mondo wapuonjre kode weche michakogo ng’eyo adiera manie Muma. Ne ayie. Mano e kinde ma ne ahango ng’eyo ni Jehova en Nyasaye ma nigi hera, kendo odwaro ni abed mamor.

Ka ne achako dhi e chokruoge mag Jokristo kendo, ne afwenyo ni nabedoga mamor sama antiere e kind oganda mar Joneno moloyo sama ne antiere e kind joma ne timo ohala mar loso sinembe. Kata kamano, gik ma ne otimorena kane podi atin ne omiyo obedona matek keto genona kuom ng’ato ang’ata, kendo ne ok aherora awuon. Achiel kuom joma ne nie kanyakla ne otiyo gi puonj manie Muma mondo okonya neno kaka nanyalo nyagora gi chandruogena, kendo ne apuonjora kaka nanyalo loso osiepe madier.

E higa mar 1997, an kaachiel gi chwora ne wadar ma wadhi Hollywood, California, e piny Amerka. Kuno ne atimo kinda mondo akony ji mathoth yudo rieko mar Wach Nyasaye. Puonjo ji Muma osemiya mor mang’eny ma oloyo ka ne atugo e sinembe. Kuom ranyisi, e higa mar 2002, ne aromo gi Cheri ma ne wang’erego chon e Hong Kong. Kit ngimane gi mara ne chalre e yore mang’eny. En e ma ne en Miss Hong Kong e higa mar 1983. En e ma ne osidhona osimbo ka ne abedo Miss Hong Kong e higa mar 1984. Bende, ne osetugo e sinembe, kae to bang’e nochako tayo sinembe, kotiyo gi jota sinembe ma rohuma ahinya. En bende nodar modhi dak Hollywood.

Chunya ne onyosore ahinya ka ne awinjo ni dichwo ma ne onego okend Cheri notho nikech tuwo mar adundo (heart attack). Din ma ne entie mar Jo-Budha ne ok ohoyo chunye. Mana kaka an, en bende noseyudo gik mabeyo ma ji mang’eny gombo, to kata kamano podi ne oonge mor kendo ne ok ogeno ng’ato ang’ata. Ne achako nyise gik ma ne asepuonjora e Muma, to nikech ne en ng’at ma nopon e din mar Jo-Budha ne ok orwako mayot gik ma ne anyisego.

Chieng’ moro e higa mar 2003, Cheri nogona simo ka en Vancouver, e piny Canada, kama noyudo olosoe sinema moro. Ne omor ahinya, nonyisa ni chieng’ moro ka noriembo mtoke e alworano, nochako lemo matek kowacho ni: “Nyisa ane, Nyasaye madier en ng’a? To iluonge ni ng’a?” Gie sano noriembo mtoke nyaka e but Od Romo mar Joneno mag Jehova, moneno nying Jehova. Noneno mano ka gima en dwoko mowuok kuom Nyasaye, kendo nogombo ahinya romo gi Joneno mag Jehova mapiyo. Ne atimo chenro, kendo bang’ odiechienge manok nodhi e chokruok mitimo gi dho China e kanyakla mantie Vancouver.

Bang’e Cheri nonyisa niya: “Jogi ohera gadier.  Anyalo nyisogi kaka awinjo e i chunya.” Ne amor ahinya ka ne awinjo ka Cheri wacho wechego, nikech chon ka ne oloso sinembe ne ok omakga osiep gi ng’ato ang’ata. Cheri nodhi nyime dhi e chokruoge mag Joneno mag Jehova. Kata kamano, e higa mar 2005 notimo singruok mar timo sinembe ariyo madongo mag dho China, mano nokonye dok Hong Kong. E higa mar 2006, Cheri nochiwo ngimane ne Jehova kendo nobatise e chokruok moro maduong’ ma notim Hong Kong. Kata obedo ni nogombo tiyo ne Jehova e thuolo momedore, tich ma notimo mar loso sinembe ne ok miye thuolo mang’eny, kendo mano ne maye mor.

E higa mar 2009, Cheri notimo lokruok maduong’ ahinya e kit ngimane. Ne ong’ado mar weyo tiyo e tij loso sinembe, kendo koro nochako tiyo ne Jehova e thuolone duto. Ne omako osiep gi ji mathoth e kanyakla mar Jokristo. Ne ochako yalo wach maber Pinyruodh Nyasaye kendo noyudo mor ahinya e konyo jomoko mondo odag e ngima mopong’ gi mor kod kuwe.—Mathayo 24:14.

Kae to Cheri nochako puonjore dho Nepal mondo oriw lwedo grup mar Joneno ma ne lando wach maber ne jo Napal ma nodak Hong Kong. Thothne ji ochayo jo Napal modak Hong Kong nikech gikiya dho Kisungu kata dho China, kendo nikech kit ngimagi opogore ahinya gi mag jomamoko. Cheri nonyisa kaka oyudo mor mathoth sama okonyo jogo ng’eyo adiera mag Muma. Kuom ranyisi, chieng’ moro ka ne olendo e ot ka ot, noromo gi miyo moro ma nya Napal ma nong’eyo mana weche matin e wi Yesu, to ne ok ong’eyo gimoro amora e wi Nyasaye madier, Jehova. Cheri notiyo gi Muma e nyise ni Yesu nolamo Wuon-gi ma ne nie polo. Miyono ka nofwenyo ni kara en bende onyalo lamo Nyasaye mar adier, ma nyinge Jehova, norwako wach maber. Bang’ kinde, chwor miyono kaachiel gi nyare bende nochako puonjore Muma.—Zaburi 83:18; Luka 22:41, 42.

Ka ne aneno mor ma Cheri ne yudo nikech tiyo gi thuolone duto e lando wach maber, ne apenjora kama, ‘Ang’o ma geng’a mondo kik alend kuom thuolona duto?’ Gie kindego, an bende nadak Hong Kong kendo. Ne ang’ado e chunya mar chako timo chenro maber e ngimana mondo apuonj ji Muma kuom thuolo momedore. Asefwenyo ni chiko ita sama jomoko wuoyo koda, kendo konyogi ng’eyo adiera manie Wach Nyasaye kelona mor madier.

Kuom ranyisi, asepuonjora Muma gi dhako moro ma ne a Vietnam ma kinde duto ne okuyoga kendo pi wang’e ne jachuer pile. Sani koro odak e ngima ma mor, kendo omor ahinya bedo e kanyakla mar Joneno.

An kaachiel gi Cheri waseyudo gima ber ahinya moloyo bedo gi huma. Kata obedo ni tiyo e tij loso sinembe nomiyo wabedo gi huma ahinya, puonjo ji wach Jehova Nyasaye to kelo mor ahinya nikech mano miye duong’. Kuom adier, waseneno adiera e weche ma Yesu nowacho niya: “Chiwo kelo mor mogundho moloyo kawo.”—Tich Joote 20:35.