Joma nigi lony e weche mag ngima dhano wacho ni bedo gi gige ringruok kende ok oromo miyo dhano obed mamor. Jomoko osetemo manyo mor kuom bayo ka ging’iyo chwech, kuom hero thum, kuom luwo weche goro, kod gik ma kamago. Kata kamano, thoth ji ok yud mor madier e wechego. Mondo dhano obed mamor, dwarore ni giti gi ngimagi e manyo gimachielo maok mana gige ringruok.

Jogo ma somo Muma ong’eyo ni nitiere gima dwarore e ngima dhano mopogore gi gige ringruok. Bug Chakruok nyiso ni kane Nyasaye ochweyo ji ariyo mokwongo, ne ojawuoyo kodgi kinde ka kinde kendo mano ne okelo winjruok e kindgi gi Nyasaye. (Chakruok 3:8-10) Nyasaye ne ok ochweyo dhano gi nyalo mar tayore kendgi giwegi; kar mano, ne nyaka tagi gi Jachwechgi. Muma wuoyo nyadinwoya e wi dwarono.

Kuom ranyisi, Yesu nowacho kama: “Mano mor manadi ni jo man gi chan e chunygi.” (Mathayo 5:3) Wechego konyowa neno ni mondo dhano odag e ngima mamor kendo man gi kuwe, nyaka gibed gi winjruok gi Nyasaye. Ere kaka wanyalo timo mano? Yesu nodwoko penjono kane owacho niya: “Dhano ok nobed mangima gi kuon kende, to gi weche duto mowuok e dho Nyasaye.” (Mathayo 4:4) Ere kaka weche mowuok e dho Nyasaye, ma gin paro mochiwo kod chike mayudore e Muma, konyowa bedo gi ngima mamor? We wanon ane yore adek madongo motimogo kamano.

Kindegi, josomo mang’eny chiwo puonj e wi weche kaka loso osiep, hera, ngima joot, tieko dhawo, kod yudo mor. E wi mano, gitemo kata lero ne ji gimomiyo Nyasaye nochweyo dhano. Kata kamano, be nitie ng’ama dichiw paro maber e wi wechego moloyo Jachwech dhano ma en Jehova Nyasaye?

Kuom ranyisi, kinyiewo masin moro kaka kamera, nitie buk moro moa e kambi moloso masindno manyiso kaka onego iti kode. Wanyalo  pimo Muma gi buk ma kamano. Mana kaka jokambi moloso masin moro chiwo buk manyiso kaka onego oti gi masindno, e kaka Nyasaye mochweyowa ochiwo Muma manyiso kaka onego wati gi ngimawa. Muma en buk ma lero gik monego ng’ato otim gi ngimane mondo eka ngimane obed maber.

Mana kaka buk monyiewgo masin moro nyiso yore ma ka ng’ato otiyogo gi masindno to onyalo ketho masindno, e kaka Muma bende kwerowa gik ma kwatimo to wanyalo hinyo ngimawa. Nitiere paro moko ma jomoko nyalo siekogo manyalo nenore ni ber. Kata kamano, ka waluwo kaka Nyasaye ma nochweyowa chikowa, wabiro bedo gi ngima maber kendo gik maricho ok bi yudowa.

Kata obedo ni Jehova Nyasaye tayowa kendo chikowa, ok ochunwa mondo waluw chikene. Kar mano, nikech oherowa kendo odwaronwa ber, okwayowa niya: “An Jehova Nyasachi, mapuonji mondo iyud konyruok, mateloni e yo madidhie. Ma di niwinjie chikna! eka dibedo gi kuwe kaka aora, gi tim makare kaka apaka me nam.” (Isaiah 48:17, 18) E yo machuok, ka waluwo kaka Nyasaye tayowa, wabiro dak maber. Mondo ngimawa obed gi mor, nyaka Nyasaye tawa.

Jomoko neno ni onge gima Nyasaye konyogigo nikech gineno ni onge kaka Nyasaye ma jahera nyalo weyo chandruoge mang’eny mobembo dhano obedie. Kuom ranyisi, ginyalo penjore niya: ‘Ang’o momiyo joma beyo chandore?’ ‘Ang’o momiyo nyithindo moko inyuolo ka nigi songa kata ka ging’ol?’ ‘Ang’o momiyo itimo ne jomoko timbe maok kare?’ Mago gin penjo mowinjore ndi, kendo yudo dwoko mowinjore nyalo miyo wachak neno ngima e yo mopogore. Kar mondo warikni keto ketho kuom Nyasaye ni en ema omiyo gik ma kamago timore, we wane ane gima Wach Nyasaye ma en Muma, nyisowa kuom gik ma timoregi.

Sula mar adek e bug Chakruok wuoyo e wi Satan ma ne owuondo dichwo gi dhako mokwongo kotiyo gi thuol mondo giketh chik Nyasaye ma ne kwero ni kik gicham olemo mar ng’eyo ber gi rach. Satan nonyiso Hawa niya: “Ok unutho ngang’. Nyasaye ong’eyo ka e chieng’no muchame, wang’u noyepi, mi nubedi ka Nyasaye, kung’eyo mabeyo gi maricho.”—Chakruok 2:16, 17; 3:4, 5.

Kuom tiyo gi wechego, Satan ne onyiso ni Nyasaye en jamiriambo kendo ni yo ma Nyasaye lochogo ok ni kare. Jachien ne temo wacho ni ka dhano dine owinje, weche dodhinegi maber moloyo. Ang’o ma Jehova ne nyalo timo mondo onyis maler ni Satan ne ok owacho adier? Noweyo mondo kinde okal eka ji te one kabe weche ma ne Satan ohango kuomego gin adier koso ooyo. Kuom weyo mondo kinde okalw, Nyasaye nomiyo Satan gi joge thuolo mondo ginyis kabe dhano didag maber maok otagi gi Nyasaye.

Ineno nade gima ne Nyasaye oyiero timo kuom gima ne Satan ohango kuome? Be dhano  nyalo dak maber ka gitayore giwegi maok otagi gi Nyasaye? Gik mosetimore e ngima dhano kaka chandruoge, timbe maok kare, tuoche, tho, mahundu, timbe ma yombe yombe, lwenje, nego oganda e hunji, kaachiel gi gik maricho mamoko mosechando ji kuom higni mang’eny nyiso ni dhano ok nyal locho e wigi giwegi mita gidhi maber maok otagi gi Nyasaye. Muma ok nyiswa ni Nyasaye ema kelonwa chandruoge. Kata kamano, onyisowa achiel kuom gik madongo ma miyo dhano chandore kowacho ni dhano ‘bedo gi teko kuom machielo mondo ohime.’—Eklesiastes 8:9.

Kaluwore gi wachni, donge en gima nenore anena ni dhano onego omany Nyasaye mondo eka giyud dwoko mag penjo ma chandogi e ngima kendo ng’eyo kaka ibiro tiek chandruogego? Nyasaye biro timo ang’o?

Kuom higni mang’eny, dhano osebedo ka manyo yore ma ginyalo dakgo maok gituore, maok gibed moti, kendo maok githo. Dhano osetiyo gi seche mang’eny, gisetimo kinda, kendo gisetiyo gi mwandu mogundho mondo gitiek chandruogego, to onge! Jomoko osetemo tiyo gi yedhe bungu, bilo, sayans, kod yore mamoko mondo gilo chandruogego. Gik ma gisetemo timogo ok osekelonegi ber moro amora.

Nyasaye dwaro ni dhano odag maber ka gin gi mor. Mano e ngima ma nodwaro ni dhano odagie ka nochweyo dhano, kendo mano e paro ma pod en-go. (Chakruok 1:27, 28; Isaiah 45:18) Wan gadier chuth ni gimoro amora ma Jehova Nyasaye osingo ni obiro timo, biro timore maok obare. (Isaiah 55:10, 11) Muma nyisowa ni Nyasaye osesingo mar duoko piny obed Paradis kaka ma ne Adam gi Hawa odakie chon. Buk mogik mar Muma nyisowa kama: “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.” (Fweny 21:4) En ang’o ma Nyasaye biro timo mondo lokruogego obedie, to ang’o ma wanyalo timo mondo wayud gik mosingogo?

Yesu Kristo ne opuonjo jopuonjrene mondo olem ka kwayo Nyasaye mondo dwache otimre. Lamo ma jomoko luongo ni Alam mar Ruodhwa en lamo ma ji mang’eny ong’eyo kendo jomoko ole mana gi wigi. Lamono wacho kama: “Wuonwa manie polo, nyingi mondo obed maler. Pinyruodhi mondo obi, gi midwaro mondo otimre e piny kaka e polo.” (Mathayo 6:9, 10) Ee, Jehova Nyasaye biro tiyo gi Pinyruodhe e tieko gik maricho ma osebedoe nikech loch mar dhano kendo okel piny manyien mosesingo ne joge ma kare. * (Daniel 2:44; 2 Petro 3:13) Ang’o ma  nyaka watim mondo wayud gweth ma Nyasaye osingogo?

Yesu Kristo nonyiso okang’ mayot ma dwarore ni wakaw kuom wacho niya: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.” (Johana 17:3) Ee, dhano nyalo dak nyaka chieng’ ka Nyasaye okonyogi. Singo mar dak nyaka chieng’no nyisowa gimachielo momiyo dwarore ni Nyasaye ema ota dhano.

Chiegni higni gana ariyo mokalo, jaote Paulo nowacho weche ma luwogi ne joma ne odak Areopago, kata Mars Hill, man Athene: “En owuon e mochiwo ni duto ngima, gi muya, gi gik moko duto. Kuom en wangima, kendo wawuotho, kendo wantie; kaka johug wendeu bende nowacho niya, ‘nimar wan bende wan kothe.’”—Tich Joote 17:25, 28.

Gima ne Paulo owacho ne Jo-Athenego pod en adier nyaka chil kawuono. Jachwechwa ema miyowa muya ma wayueyo, chiemo ma wachamo, kod pi ma wamodho. Ka Jehova ok omiyowa gigo, dak wabed mangima. To kare ang’o momiyo Jehova osedhi nyime chiwo gigo ne ji te maok odewo ni jogo lame kata ok gilame? Paulo ne owacho ni “ne dwarore mondo gimany Nyasaye ni miti di girom kode kendo nwang’e, to adier ok obor kodwa ng’ato ka ng’ato.”—Tich Joote 17:27.

Be diher ng’eyo Nyasaye e yo momedore, mondo ing’e dwache kendo ing’e kaka odwaro ni idag sani kod gima onego itim mondo idag nyaka chieng’? Ka en kamano, wajiwi mondo imany ng’ama nokeloni gasedni kata itudri gi joma ogoyo gasedni. Gibiro bedo mamor ahinya konyi ing’e Muma.