Be Nitie Din Minyalo Geno Kodok Korka Wach Pesa?
Estelle * ne jadhiga gi nyithinde duto e kanisa maok gibare. Owacho niya: “Ne anyiso pastawa ni adwaro puonjora Muma.” Kata kamano, pastano ne ok opuonje. Gikone, miyono ne oweyo dhi e kanisa. Omedo wacho kama: “Jotend kanisa nondikona, to gima duong’ ma ne giwachona en ni kata ka ok anyal chopo e kanisa, pesa to kik awe maok aoro. Ne awacho e chunya niya: ‘Jogi ok dew kata ka abara ne kanisa, gidich mana gi pesana.’”
Angelina mosebedo kohero weche kanisa wacho kama: “E kanisawa, ikadho okapu mar sadaka nyadidek kendo idwaro ni ng’ato oket pesa kindego duto. Ne gisiko gikwayo mana pesa. Ne awacho e chunya niya, ‘Magi ok jo Nyasaye.’”
Be dinde manie gweng’u tiyo gi yore mopogore opogore mondo gichun ji golo pesa? Be Muma oyie gi tim ma kamano?
ANG’O MA MUMA PUONJO?
Yesu, jal ma ne ochako din mar Jokristo, nowacho niya: “Useyudo nono, chiwuru nono.” (Mathayo 10:8) Puonj ma Muma chiwo nigi nengo maduong’ ahinya ma pesa ok nyal nyiewo kendo onego ochiwe ne ji duto ma dwaro.
Ere kaka Jokristo mokwongo ne chopo ting’ mag pesa e kanyakla?
Ng’ato ka ng’ato kuomgi ne ‘chiwo kaka oseparo e chunye; ok mar ng’ura, kata mar achuna: nikech Nyasaye ohero jachiwo mamor.’ (2 Jo Korintho 9:7) Jaote Paulo ne owacho niya: ‘Ne watiyo gotieno kendo godiechieng’ ne gik mwachando, mondo kik wami ng’at moro kuomu ting’ mapek, kane wayalonu wach maberno.’ (1 Jo Thessalonika 2:9) Paulo ne loso hembe mondo oyud kaka ochiemo kendo ochop ting’ge e tij lendo.—Tich Joote 18:2, 3.
JONENO MAG JEHOVA TIMO NADE E WACHNI?
Joneno mag Jehova chokore e ute maok oger malich ruok miluongo ni Ute Romo. Giyudo nade pesa ma gisirogo tijgi? Ok gikal okapu mag solo sadaka, kendo ok gimi ji bahasa ka gitemo chunogi gigol sadaka. Kar mano, ng’ato ang’ato ma chunye dwaro siro tijno, nyalo keto chiwo mare e sanduk mar chiwo mayudore e Od Romo.
En adier ni mondo ogo gasedni kendo okowgi, nyaka ti gi pesa. Kata kamano, ok ibi neno ngang’ ka Joneno mag Jehova lando bech gaset kata chuno ji mondo ogol pesa. Wach maduong’ ma gijiwo en chiwo ne ji adiera mayudore e Muma.
Ineno nade: Be yo ma Joneno mag Jehova sirogo tijgi luwore gi weche mag Yesu koda ranyisi ma ne Jokristo mokwongo oketo?
^ par. 2 Nyinge moko oloki.
Ere kaka din onego oyud pesa ma gisirogo tijgi?
