Dhako moro ma ne neno ni Jehova ok nyal here, nowacho niya: “Gimoro achiel maduong’ mosemiyo sudo machiegni gi Nyasaye obedona matek, en paro ni an ng’at manono.” Be seche moko in be iwinjo kamano? Ka en kamano, nyalo bedo ni ipenjori niya: ‘Be Jehova dewo jotichne ka gin ng’ato achiel achiel?’ Ee! odewogi. Weche ma ne Yesu owacho miyo wabedo gadier ni Jehova dewowa.—Som Johana 6:44.

Yesu, jal ma ne ong’eyo kido mar Jehova moloyo ng’ato ang’ata nowacho ang’o e wi wachno? (Luka 10:22) Nowacho kama: “Onge ng’a ma nyalo biro ira, ma ok Wuoro ma noora e moywaye.” Omiyo, ok wanyal bedo jolup Kristo—kata tiyo ne Jehova, Wuonwa modak e polo mak mana ka Jehova owuon oywayowa ire. (2 Jo Thessalonika 2:13) Ka wawinjo tiend gima Yesu ne wacho, wabiro neno kaka wechenego miyo wabedo gadier chuth ni Jehova dewowa ng’ato ka ng’ato.

Wacho ni Jehova ywayowa tiende en ang’o? Wach motigo e dho-Grik ni “ywayo” itiyogo bende sama iwuoyo kuom ywayo rech e gogo. (Johana 21:6, 11) Be mano koro nyiso ni Jehova ywayowa gi thuon kochunowa ni watine? Ooyo. Jehova omiyowa thuolo mar timo yiero, omiyo ok oyaw chunywa gi thuon. (Rapar mar Chik 30:19, 20) Jasomo moro nolero wachno kama: “Chuny dhano chalo gi ot ma nigi dhoot minyalo mana yaw gi iye to ok gioko. Omiyo, nyaka ng’ato owuon e ma yaw chunye.” Jehova nono chuny ji duto manie piny komanyo jogo ma nigi chuny madwaro tiyone. (1 Weche mag Ndalo 28:9) Ka oyudo ng’at madwaro tiyone, okawo okang’ mang’won ahinya. E yo mane?

Jehova ywayo e yo mang’won jogo ‘ma chunygi oikore.’ (Tich Joote 13:48, New World Translation) Jehova timo kamano e yore ariyo—otiyo gi wach maber mayudore e Muma kendo otiyo gi roho mare maler. Ka Jehova oneno chuny moikore rwako adiera, otiyo gi rohone mondo okony ng’atno owinj adiera kendo oti gi weche mopuonjore e ngimane. (1 Jo Korintho 2:11, 12) Ka dine Nyasaye ok okonyowa, dine ok wabedo jolup Yesu kata jotich mochiwore ne Jehova.

To kare tiend weche Yesu mayudore e Johana 6:44 puonjowa ang’o e wi Jehova Nyasaye? Ndikono puonjowa ni Jehova ywayo ji ire nikech oneno gimoro maber e chunygi kendo odewogi ng’ato ka ng’ato. Mano e momiyo miyo ma ne owuo kuome e chak sulani, ne oyudo hoch bang’ ng’eyo tiend wechego. Owacho kama: “Tiyo ne Jehova e gweth maduong’ moloyo ma ng’ato nyalo bedogo. To nikech Jehova oyiera mondo abed jatichne, mano nyiso ni ohera ahinya.” In to ineno nade? Be ng’eyo ni Jehova dewo jotichne achiel achiel miyo idwaro yawone dhood chunyi?