Ng’wono Kido Madwarore e Wang’ Nyasaye

RAWERA moro e piny Japan ne mor ahinya gi ng’wono ma ne jaduong’ moro nyise. Jaduong’no ne en jamisonari, kendo ne pok odak e pinyno kuom higini mang’eny, omiyo ne pok olony gi dho Jo-Japan. Kata kamano, juma ka juma ne odhi e od gi wuowino mondo giwuo e wi Muma. Ne ohore mos kodwoko penjo modhuro ma japuonjre ma rawerano ne penje.

Ng’wono mar jamisonarino ne omulo chuny rawerano ahinya ma wiye ne ok nyal wil. Rawerano ne owacho e chunye niya: ‘Ka Muma nyalo miyo ng’ato obed mang’won kendo ma jahera kama, kare onego apuonjra Muma.’ Mano ne ojiwe mondo opuonjre gima ne nyien chuth e kit ogandagi. Ee, ng’wono nigi teko moloyo kata weche, nimar ochopo e chuny dhano.

En Kido Manyiso Kit Nyasaye

Nyiso wedewa ng’wono en gima onyuolwago. Kata kamano, ng’wono en kido mawuok kuom Nyasaye. Yesu nowacho ni Wuonwa me polo ng’won, ok mana ne joma ohere kende, to bende ne ‘joma ok dewe.’ Yesu nojiwo jolupne mondo oluw ranyisini mar Nyasaye, kowacho niya: “Beduru malong’o, kaka Wuonu me polo long’o.”​​—⁠Luka 6:35; Mathayo 5:48; Wuok 34:6.

Nikech dhano ne ochwe e kit Nyasaye, ginyalo nyiso kido mar ng’wono. (Chakruok 1:⁠27) Ee, wanyalo luwo ranyisi mar Nyasaye e nyiso ng’wono, ok mana ne wedewa kende, to bende ne jomamoko. Muma lero ni ng’wono kata miwafu en achiel kuom kido mabeyo mag nyak mar roho maler mar Nyasaye. (Jo Galatia 5:​22) Omiyo, en kido ma ng’ato nyalo nyago kendo timoe dongruok kaka odhi nyime puonjore e wi Nyasaye ma en Jachwech, kendo medo sudo machiegni kode.

Kata obedo ni ng’wono nie kit dhano, Nyasaye nyisowa ni wanyisre ng’wono kata ‘wang’wonre ng’ato gi ng’ato’ nimar okawo kidono kaka gimaduong’ ahinya. (Jo Efeso 4:​32) Iparonwa bende ni: ‘Kik wiwa wil kod rwako welo,’ kata nyiso ng’wono ne joma wakiya.​​—⁠Jo Hibrania 13:2.

E piny ma ji ok ng’won kendo ok nyis erokamano, be en gima nyalore mondo wanyis ng’wono ne jomamoko moriwo koda joma ok wang’eyo? Ang’o manyalo konyowa timo kamano? Kuom adier, ang’o momiyo wachno onego omulwa?

En Kido Madwarore e Nyim Nyasaye

Bang’ wuoyo e wi nyiso ng’wono ne joma wakiya, jaote Paulo ne owacho niya kuom jomoko ma ne otimo kamano: ‘Ne girwako malaika ka ok ging’eyo.’ Inyalo winjo nade kapo ni omiyi thuolo mar rwako malaike? Ne ni Paulo nowacho ni jogo ne otimo kamano “ka ok ging’eyo.” E yo machielo, ne owacho ni ka wang’iyo gi tim nyiso jomamoko ng’wono moriwo joma wakiya, inyalo gwedhwa e yore maok wapar.

Thoth Mumbni matudo ndiko gi mamoko tudo weche Paulo gi sigendni mag Ibrahim koda Lot mayudore e Chakruok 18 gi 19. Kuonde ariyogo, wasomo kaka malaike nobironegi kaka welo man gi ote mapek. Ibrahim ne okelne ote manyiso ni Nyasaye ne dhi chopo singo mar miye nyathi mawuowi, to Lot ne onyis ni ibiro rese sama iketho mier mag Sodom  gi Gomora.​​—⁠Chakruok 18:​1-​10; 19:​1-3, 15-​17.

Kisomo ndiko monyis malo kaegi, ibiro neno ni Ibrahim kaachiel gi Lot ne onyiso ng’wono ne joma gikiya ma ne gin welo e alworagi. En adier ni ndalo ma ne indikoe Muma, rwako jowuoth koda joma welo ne en kit oganda kendo ne ikawe kaka ting’ mar ng’ato ka ng’ato​​—⁠gibed osiepe, wede, kata joma gikiya. Kuom adier, Chik Musa ne dwaro ni Jo-Israel okony joma odak e pinygi maok gin Jo-Israel. (Rapar mar Chik 10:⁠17-​19) Kata obedo ni ne en kamano, nenore ayanga ni Ibrahim gi Lot ne otimo mathoth moloyo kata gima chik ne oduogo owacho bang’e. Ne giketo kinda makende mar nyiso joma gikiya ng’wono, kendo ne ogwedhgi nikech timo kamano.

Ng’wono ma Ibrahim ne onyiso ne ok okelo gweth mana ne en owuon kane oyudo nyathi mawuowi, to ne okelonwa gweth wan bende. E yo mane? Ibrahim kaachiel gi wuode ma Isaka ne nigi migawo maduong’ e chopo dwaro mar Nyasaye. Ne gichopo migepe madongo e anyuola mar Mesia, ma ne en Yesu. Chung’gi motegno ne onyiso kaka Nyasaye ne dhi nyiso hera koda ng’wono mondo oyaw yo mar reso oganda dhano.​​—⁠Chakruok 22:​1-​18; Mathayo 1:​1, 2; Johana 3:​16.

Sigendnigi nyiso maler gima Nyasaye dwaro kuom joma ohero, kendo ginyiso kaka okawo kido mar ng’wono kaka gimaduong’. Nyasaye ok nyal mor kodwa ka ok wanyis ng’wono nimar en kido madwarore ahinya e wang’e.

Nyiso Ng’wono Konyowa Ng’eyo Nyasaye e Yo Maber Moloyo

Muma wacho ni e kindewagi jo mang’eny nobed “jo ma ok go erokamano, jo ma ok luor Nyasaye; jo ma ok ohero owetegi.” (2 Timotheo 3:​1-3) Onge kiawa ni iromo gi joma kamago pile ka pile. Kata ka en kamano, mano kik monwa nyiso ji ng’wono. Iparo ne Jokristo ni: “Kik uchul ng’ato richo kar richo. Keturu chunyu kuom gik ma ji duto neno ni ber.”​​—⁠Jo Rumi 12:17.

Wanyalo yawo chunywa kendo wachiwre e nyiso ji ng’wono. Muma wacho niya: “Ng’ato ka ng’ato man gi hera . . . ong’eyo Nyasaye,” kendo yo achiel ma wanyisogo hera en kuom bedo mang’won gi jomoko. (1 Johana 4:7; 1 Jo Korintho 13:4) Ee, kwanyiso dhano wetewa ng’wono, wamedo ng’eyo Nyasaye e yo maber moloyo, to mano medo mor ma wan-go. Yesu nowacho kama e Twak mar Got: “Mano mor manadi ni jo mang’won; nikech giniyud ng’wono. Mano mor manadi ni jo ma chunygi ler; nikech ginine Nyasaye.”​​—⁠Mathayo 5:​7, 8.

Ne ane ranyisi mar miyo moro miluongo ni Aki e piny Japan ma nigi nyithindo ariyo ma yowuowi. Bang’ lalo min mare e tho apoya,  chunye ne onyosore ahinya. Kinde moko, ne owinjo marach ahinya ma ne chune dhi e osiptal. Gie kindeno, joot moko nobiro dak machiegni kode. Noyudo ka wuon joodno oa tho e masira mar ndara kendo chiege ne odong’ gi nyithindo matindo abich. Aki nowinjo malit ahinya ne joodno kendo ne ochiwore mondo obed osiep miyono koda nyithinde. Notimo duto monyalo mondo okony joodno​​—⁠miyogi chiemo, lewni ma nyithinde nosehingo, koda gik ma kamago​​—⁠to mano ne omiyo chuny Aki owuon ochako bedo motegno kendo. Ne oneno adiera mag wechegi mayudore e Muma: “Miyo kelo gueth moloyo kawo.” (Tich Joote 20:35) Kuom adier, gima nyalo konyi moloyo sama chunyi onyosore, en nyiso jomoko ng’wono.

‘Holo Jehova’

Ok ochuno ni ng’ato oti gi pesa mang’eny mondo eka onyis ng’wono. Bende nyiso ng’wono ok otenore kuom nyalo kata teko ma in-go. Buonjo, wacho wach mang’won, konyo ng’ato, chiwo mich moro matin, kata mana weyo ng’ato okwongni e lain, nyalo moro ng’ato ahinya. Kapo ni in gi kiawa kuom gima dwarore ni iwach kata itim e chal moro, wach kata tim gima ng’won. Ng’wono ma ne jamisonari onyiso rawera ma ne owuo kuome e chak sulani ne omoro rawerano ahinya moloyo kata weche ma ne jamisonarino wacho. Ok kawwa gi wuoro ni achiel kuom gik ma Nyasaye dwaro kuom jo malame en ni giher ng’wono kata “miwafu”!​​—⁠Mika 6:8.

Ngero moro mar Jo-Asia wacho niya: “Wach achiel mang’won kelo liet kuom dweche adek mag koyo.” Mana kaka ngeroni nyiso, ng’wono matin nyalo konyo kama duong’. Ka ng’ato nyiso ng’wono gi chuny maler, to moloyo ka ng’ato timo kamano nikech ohero Nyasaye, ng’wono ma kamano kelo mor ne jalno owuon koda joma onyiso ng’wono. Kata obedo ni ng’ato ok orwako ng’wono minyiso, mano ok nyis ni ng’wonono odhi nono. Nyasaye kawo timno kaka gima duong’. Muma nyisowa ni ka ng’ato nyiso jomoko ng’wono, chalo ka gima ‘oholo Jehova.’ (Ngeche 19:17) Donge nyalo bedo gimaber kimanyo thuolo mag nyiso jogo man machiegni kodi ng’wono?

[Weche e ite mar 20]

Kapo ni in gi kiawa kuom gima dwarore ni iwach kata itim e chal moro, wach kata tim gima ng’won

[Picha e ite mar 19]

Ne ogwedh Ibrahim ahinya nikech ng’wono ma ne onyiso

[Picha e ite mar 20]

Nyiso jomoko ng’wono chalo gi ‘holo Jehova’