Puonjri Kuom Wach Nyasaye

Ang’o Mabiro Timore Chieng’ Bura?

Sulani nigi penjo manyalo bedo ni isepenjori, kendo onyiso kama inyalo somo e Mumbi mondo iyud dwoko mag penjogo. Joneno mag Jehova diher wuoyo kodi e wi dwokogo.

1. Chieng’ Bura en ang’o?

Mana kaka picha manie bat korachwich nyiso, ji mang’eny paro ni Chieng’ Bura dhano tara gi tara biro chung’ e nyim kom duong’ Nyasaye mondo ong’adnegi bura kaluwore gi gik ma ne gitimo chon​​—⁠ka moko yudo ngima mochwere e polo to moko iwang’o e mach maok tho. Kata kamano, Muma nyiso ni Chieng’ Bura en kinde ma Nyasaye biro waroe dhano kuom timbe maok kare duto. (Zaburi 96:13) Nyasaye oseyiero Yesu mondo obed Jang’ad-Bura mabiro dwoko weche obed makare ne dhano.​​—⁠Som Isaiah 11:⁠1-5; Tich Joote 17:31.

2. Ere kaka Chieng’ Bura biro dwoko weche obed makare?

Kane Adam, dhano mokwongo ong’anjo ne Nyasaye goyiem, ne orwako kothe duto e richo, sandruok, koda tho. (Jo Rumi 5:12) Mondo otiek gik marichogo, Yesu biro chiero dhano tara gi tara mosetho. Bug Fweny nyiso ni mano biro timore e loch mar Kristo Yesu mar higini gana achiel.​​—⁠Som Fweny 20:⁠4, 11, 12.

Jogo mibiro chier nong’adnegi bura, ok kaluwore gi gik ma ne gitimo kapok githo, to kaluwore gi kaka gibiro timo kosepuonjgi gik manie “kitepe” miwuoyoe e Fweny sula 20. (Jo Rumi 6:7) Jaote Paulo nowacho ni joma ibiro chier kendo mabiro yudo thuolo mar puonjore e wi Nyasaye oriwo “jo makare kod jo ma ok kare.”​​—⁠Som Tich Joote 24:15.

  3. Chieng’ Bura biro chopo ang’o?

Jogo ma ne otho kapok ong’eyo Jehova Nyasaye kendo tiyone biro yudo thuolo mar lokore gibed joma beyo. Ka gitimo kamano, to ibiro wach ni chier margi en ‘chier e ngima.’ Kata kamano, moko kuom jogo mibiro chier ok bi dwaro puonjore yore Jehova. Chier margi biro bedo ‘chier e bura.’​​—⁠Som Johana 5:⁠28, 29; Isaiah 26:​10; 65:20.

Giko Chieng’ Bura ma en higini gana achiel, biro yudo ka Jehova oseduoko dhano mawinje obed jomakare chuth kaka ne gin e chakruok. (1 Jo Korintho 15:⁠24-​28) Donge mano en geno maber nyowuoyo ne jogo mawinjo Nyasaye! Bang’ tweyo Satan Jachien e bur matut kuom higini gana achiel, Nyasaye biro gonye mondo otem ji mogik. Satan biro temo golo ji kendo kuom Jehova, to jogo motamore luwo Satan biro yudo thuolo mar dak gi mor e piny nyaka chieng’.​​—⁠Som Isaiah 25:8; Fweny 20:​7-9.

4. En chieng’ bura mane machielo mabiro konyo dhano?

Muma bende luongo tula mibiro tiekgo piny marachni ni “chieng’ bura.” Mana kaka Ataro mar ndalo Noa nobiro apoya moyweyo tieng’ marach duto, e kaka chieng’ bura bende nobi apoya. Gimaber en ni kethruok mokayo machiegni mar ‘joma ok oluoro Nyasaye’ biro yawo yo ne oganda manyien mabiro dak e piny “ma wach makare odakie.”​​—⁠Som 2 Petro 3:⁠6, 7, 13.

Mondo iyud weche momedore, ne ite mag 213-​215 mar bugni Ang’o ma Muma Puonjo Kuom Adier? mogo gi Joneno mag Jehova.

[Picha e ite mar 16]

“The Last Judgement,” by Gustave Doré, 1832-​1883

[En mar]

Engravings by Doré