Barua Mowuok Madagascar

 Dhokno ne Winjorena Mana Kaka Wer Mamit

AN KOD chwora ne wachomo e migawo marwa manyien kaka jomisonari e chula mar Madagascar. Ne wagoyo oritiwa mogik ka pi wang’wa chwer, ka wageno ni Jehova ne dhi orowa kamaber kendo konywa chopo migawowa.

Wiwa ok bi wil ngang’ gi chokruokwa mokwongo mar kanyakla ma ne wadhiyoe. Ne chalo mana ka gima owadwa ma ne tayo Puonjruok mar Ohinga mar Jarito ne tayo grup mar jower. Dhokno ne teknwa ahinya kendo weche miwacho ne winjorenwa mana ka wer mamit. Ndalo mang’eny nokalo kapok wang’eyo tiend weche miwacho.

Chieng’ mokwongo ma ne awinjoe tiend penjo moro maok nie paragraf, dhoga ne opo kohulo dwoko mar penjono gi dwol. Jogo ma ne obet machiegni koda nowinja, mi ne aumo dhoga mondo kik anyier matek. Wiya ne okuot matin, to kata kamano ne amor ni koro ne anyalo winjo gima ne iwacho!

Kar bedo kaka jal ma ne onego oket ranyisi e tij lendo, ne chalona mana ka gima an ema ne imako lweta kitaya. Hera mar owete gi nyimine ne onenore, ka ginyisa kaka anyalo lendo ne ji e yo mawinjore, ka ginyisa weche koda ndiko manyalo tiyogo.

Anyalo paro chieng’ moro kane wan e lendo, nyathi moro nokok ni, “Vazaha! Vazaha! ” Mano e kaka jo Madagascar luongo joma welo. Ne wareto piyo ka wageno ni nyithindo mamoko ne ok bi biro mondo gin bende ginwo wechego. Kae to wuowi moro nokwero nyathi ma ne kokno. Wuowino ne owacho kama: “Ok en wendo, onyalo wacho dhowa! ” Nyaminwa ma ne nikoda ma en japinyno, ne olokona wechego nikech ne giruyo wechego mapiyo ahinya ma ne ok anyal winjo tiendgi. Kata kamano, chunya nowinjo maber. Piny Madagascar koro nochako bedona kaka pacho.

Kinde moko kane awinjo kuyo moro, ne ajaparo nyithindo matindo ma ne rwaka gi mor, kata obedo ni ne ok anyal wacho dhogi e yo maber. Nyithindo me kanyakla  gin gweth madier moa kuom Jehova. Hasina, nyaminwa moro ma rawera, osebedo kaka jalo ma lokona weche. Sama onge ng’ama winjo tiend gima atemo wacho, en to ojawinjo. Kendo kinde mang’eny ojakonya sama atemo wuoyo gi osiepena e kanyakla, ka oleronegi tiend gima awacho sie.

An kod chwora, ne wan e kanyakla moro ma ne chiegni nyuolo machielo. Mano ne dwaro ni jomamoko okaw jopuonjre moko mag Muma nikech ne gidak e alwora mar lendo mar kanyakla manyienno. Nyaminwa moro ne ojiwa ni mondo apuonjra gi achiel kuom jopuonjrene. Ne aluor kawacho ni podi ne ok alony, kata kamano ne ojiwa mi oloya gi wach. Nonyisa ni kokalo kuom kony ma Jehova chiwo, ne adhi nyalo. Gi wang’ mayom kendo mang’won, kendo kotiyo gi dhok mayot ahinya winjo, nowachona ni kinde ne okayo ma ne adhi bedo gi nyalo mar puonjo jomoko kaka chunya awuon dwaro. Wechego ne ojiwo chunya ahinya.

Nyaka a kanyo, japuonjreno osetimo dongruok maber. Chieng’ moro kane an e laro, nawinjo koluongo nyinga. En kod chwore ne gin e yo ka gidhi riwo kend margi kaluwore gi chik sirkal. Chwore osechako puonjore, kendo gin gi chenro mabeyo mag timo dongruok e wach Nyasaye, moriwo nyaka batiso. Mano ne omiya mor kata obedo ni ang’eyo ni wan ok ema waywa ji, to Jehova ema ywayo ng’ato ire.

Wasepuonjore gik mang’eny e migawo marwa manyienno. Kata obedo ni wagombo bedo gi osiepewa koda joodwa ma ne waweyo thurwa, wawinjo mana ka gima wan gi moko kuomgi kae. Kinde mang’eny wanyiso owete gi nyimine wachgi, kendo kata mana sani gihinyo penjowa kaka gidhi. Wageno neno kinde mago ma osiepewa ma kae, kaachiel gi joodwa masie norom.

Podi ahinyo winjo ka dhokno chalo ka wer sama ji wuoyo. Kata kamano, sani to awinjo tiend weche. Ageno neno ndalogo ma an bende abiro wacho dhokno e yo molony ahinya. Yesu nowacho niya: “Kik uparru kuom kiny; nikech kiny noparre owuon. Chieng’ achiel ni gi rachne morome owuon.” (Mathayo 6:​34) Omiyo wabiro mana dhi nyime puonjore weche mosmos, wach achiel achiel. Kendo gie sani, abiro dhi nyime chiko ita, pacha, kod chunya, mondo mi ati kanyachiel gi owete gi nyiminewa ma nano kendo ma johera e Madagascar ka.

[Picha manie ite mar 25]

Ka alendo gi Hasina