Be An Awuon Nyasaye Dewa?
Be An Awuon Nyasaye Dewa?
Dwoko ma ji hinyo chiwo:
▪ “Nyasaye en ng’at maduong’ ahinya maok onyal bet koparo chandruogena.”
▪ “Ok apar ni odewa an awuon.”
Yesu to nowacho ang’o?
▪ “Winy matindo abich ok ng’iew gi senti ariyo koso? Kata kamano onge achiel kuomgi ma ok par e nyim Nyasaye. To kata yie wiu osekwan duto. Kik uluor; un uloyo winy mang’eny.” (Luka 12:6, 7) Onge kiawa ni Yesu nopuonjo ni Nyasaye dewowa.
▪ “Kik uparru kuwacho ni, ‘Wanacham ang’o?’ kata, ‘Wanamadh ang’o?’ kata ‘Wanarwakre gang’o?’ Nikech mago duto e ma jo ma ok oyie dwaro; to Wuonu me polo ong’eyo ni uchando magi duto.” (Mathayo 6:31, 32) Yesu ne nigi adier ni Nyasaye ong’eyo dwarowa ng’ato ka ng’ato.
MUMA nyiso maonge kiawa ni Nyasaye dewowa. (Zaburi 55:22; 1 Petro 5:7) Kapo ni en kamano, to kare ang’o momiyo waneno chandruoge mang’eny e piny sani? Ka Nyasaye en jahera kendo onyalo duto, ang’o momiyo ok okaw okang’ mar tieko chandruoge?
Dwoko mar penjogo, otenore kuom adiera ma ji mang’eny ok ong’eyo—ni Satan Jachien, e jatelo mar piny marachni. Kane otemo Yesu, Satan nowachone Yesu ni obiro miye pinjeruodhi duto mag piny, kowachone kama: “Tekoni duto namiyi, gi duong’gi; nikech an nomiya, kendo ng’a mahero miyo to amiyo.”—Luka 4:5-7.
Ng’ano ma nomiyo Satan obedo gi loch e piny? Kane jonyuolwa mokwongo, Adam kod Hawa, oyie luwo wach Satan ma giloko tokgi ne Nyasaye, gima ne gitimono ne onyiso ni giyiero Satan mondo obed jalochgi. Chakre kinde ma ne ging’anjoeno, Jehova Nyasaye osehore mos koweyo kinde mondo onyis godo ni loch mar Satan orem chuth. Jehova ok osechuno ji mondo olame, to kata kamano, oseyawonwa thuolo mar duogo ire.—Jo Rumi 5:10.
Nikech Nyasaye dewowa, ne otimo chenro mondo Yesu oreswa wawuogi e bwo teko mar loch Satan. E kinde mokayo machiegni, Yesu biro ketho “loch mar jal man gi teko mar tho, tiende ni Satan.” (Jo Hibrania 2:14) Obiro timo kamano mondo “oketh tich Satan.”—1 Johana 3:8.
Pinyni ibiro loki mondo obed paradis. E kindego, Nyasaye “noywe pi wang’ duto e wenge [ji]; tho ok nobedie kendo, kata ywak, kata nduru, kata rem ok nobedie, nikech gik machon osekadho.”—Fweny 21:4, 5. *
[Weche moler piny]
^ par. 12 Mondo iyud weche mamoko kuom gimomiyo Nyasaye oweyo chandruok mondo obedie, ne sula 11 mar buk miluongo ni Ang’o ma Muma Puonjo Kuom Adier? mogo gi Joneno mag Jehova.
[Weche manie ite mar 8]
Pinyni ibiro loki mondo obed paradis