Josombwa Penjo

Be Masiche ma Ok Nyal Geng’ Gin Kum Moa Kuom Nyasaye?

Nyasaye ok ti gi masiche mondo okumgo dhano ma onge ketho. Podi ok osetimoe kamano, kendo ok obi timo kamano ngang’. Nikech ang’o? En nikech Muma wacho e 1 Johana 4:8 ni: “Nyasaye en hera.”

Gik moko duto ma Nyasaye timo, otimo nikech hera. Hera ok nyal kelo hinyruok ne joma onge ketho, nikech Muma wacho ni, “hera ok tim marach ni wadgi.” (Jo Rumi 13:10) E Ayub 34:12, Muma wacho niya: ‘Nyasaye ok tim marach.’

En adier ni, Muma nokoro masiche ma ne dhi timore e kindewagi, kaka ‘yiengni piny.’ (Luka 21:11) To ok nyal wach ni Jehova ema kelo kethruok mabedoe nikech masichego, mana kaka ok nyal wach ni ng’at ma koro wach kit yamo e redio, ok ema kel kethruok mabetie nikech kodh yamo mager. Ka Nyasaye ok ema kel chandruok ma dhano yudo nikech masiche ma ok nyal geng’, to kare ang’o mamiyo gitimore?

Muma nyiso ni ‘piny duto obedo e teko mar ng’ama rachno,’ ma en Satan Jachien. (1 Johana 5:19) Osebedo janek wuok kinde ma nong’anjo kane dhano ochako betie, nyaka chil kawuono. (Johana 8:44) Satan kawo ngima dhano kaka gima tin manono. Kido mar guondo ema chike, emomiyo ok wawuor ni osemiyo piny obedo gi timbe guondo mogundho. Chenro manie piny masani osemiyo dhano ma joguondo othiro jowetegi, machopo kama joma onge nyalo dak kuonde ma masiche nyalo muochie e yo mayot, gibed mago ma ok nyal geng’, kata masiche ma dhano ema kelo. (Jo Efeso 2:2; 1 Johana 2:16) Kuom mano, dhano ma joguondo nyaka kwan kaka joketho nikech moko kuom masiche mayudo dhano. (Eklesiastes 8:9) En kamano nikech ang’o?

Thoth masiche bedoe nikech dhano. Kuom ranyisi, par ane masiche ma noyudo joma odak e dala ma pi ne oumo mar New Orleans, e piny Amerka, kata par ane udi ma ne nie dho nam e tiend gode mag Venezuela, ma ne chuodho oketho. Kuondego koda kuonde mamoko, masiche ma ok nyal geng’ kaka yamo kod koth, nokelo kethruok maduong’, to moloyo nikech dhano ok nong’eyo nono kit alwora ma gidakie, ok ne gitiyo gi lony maber e gedo, ne gigedo kuonde ma ok owinjore, ji ne ok odewo siem kuom masira mabiro, kendo jotelo bende jotimo mibadhi.

Non ane masira moro ma Muma wuoyoe. E kinde Yesu, ohinga moro nopodho apoya monego ji 18. (Luka 13:4) Nyalo bedo ni masirano ne otimore nikech rem mar dhano, kata nikech gik moko duto nikod, ‘ndalogi, kendo weche yudogi giduto,’​—to kuom adier ok en nikech Nyasaye ne kumogi.​—Eklesiastes 9:11.

Be nitie masiche moko ma nosetim gi lwet Nyasaye? Ee, to mak mana ni masichego ne ok neg ji mabeyo kanyachiel gi ji maricho, ne otimogi gi gimomiyo, to bende ne gitimore ka dichiel. Ranyisi ariyo gin, Ataro mar pi e kinde Noa kod kethruok mar mier mag Sodom gi Gomora e kinde Lut. (Chakruok 6:7-9, 13; 18:20-32; 19:24) Kumgo noketho jomaricho ma ne otamre lokre, to dhano ma ne nikare e wang’ Nyasaye ne odong’ ka ngima.

Kuom adier, Jehova Nyasaye nigi nyalo, gombo, koda teko mar tieko chandruok duto kendo resowa kuom gigo maricho ma masiche ma ok nyal geng’ kelo. Kowuoyo kuom Ruoth ma Nyasaye oseketo ma en Yesu Kristo, Zaburi 72:12 nokoro kama: “Nogol jachan e chandruok koywak; kendo ng’a modhier ma onge gi jakony.”