Kaluwore gi Joshua 6:10-15, 20, jolweny mag Jo-Israel ne lworo Jeriko dichiel odiechieng’ kuom ndalo auchiel. Odiechieng’ mar abiriyo ne giluoro dalano nyadibiriyo kae to Nyasaye nomiyo ohinga madongo mag Jeriko oruombore piny. Mano nomiyo Jo-Israel thuolo mar donjo Jeriko kendo loye. Be weche joma kunyo gik machon e lowo riwo lwedo gima Muma wacho ni ne odin ne dala mar Jeriko kuom kinde machuok?

E kinde machon, jolweny ma ne dhi monjo dala moro ne thoro dino ne dalano ka gilwore ma gikete diere. Kata bed ni ne inyalo din ne dala moro kuom kinde malach ma romo nade, jolweny ne monjo dalano, ne yako mwandu manie iye kod gimoro amora ma ne ginyalo yudo. Kata kamano, joma nokunyo gik ma noketh e dala mar Jeriko noyudo chiemo modhuro. Kaluwore gi wachni, buk miluongo ni Biblical Archaeology Review wacho kama: “Mopogore gi agulni, gik ma noyud ka ng’eny e dalano bang’ kethruokno, ne gin cham. . . . Mano en gima ne ok thor yudore e gik mokuny e alwora mar Palestina. Seche moko ne inyalo yud cham e puga achiel kata ariyo, to yudo mang’eny kamano en gima iwuoro.”

Ka luwore gi weche manie Muma, nitie gimomiyo Jo-Israel ne ok oyako cham e dala mar Jeriko. Jehova nokwerogi ni kik gitim kamano. (Jos. 6:17, 18) Jo-Israel nomonjo dalano e kinde ma ji oa keyoe, omiyo ne en kinde ma ne cham ng’eny. (Jos. 3:15-17; 5:10) Bedo ni cham nodong’ mathoth koseketh Jeriko nyiso ni Jo-Israel ne ok odino ne dalano kuom kinde malach mana kaka Muma wacho.