1. Jaote Johana nojiwo Jokristo mondo opar ang’o, to nikech ang’o?

WECHE ma jaote Johana nondiko e bug 1 Johana 3:1 gin weche monego wapar matut kuomgi gadier. Kane Johana owacho ni “neuru kit hera ma Nyasaye Wuonwa osemiyowa,” nojiwo Jokristo mondo opar matut kit hera ma Nyasaye oherogigo kod kaka oherogi e okang’ malach. Paro kaka Jehova oherowa biro miyo wamed here kendo wamed tego winjruok manie kindwa kode.

2. Ang’o momiyo jomoko winjoga ka teknegi yie ni Nyasaye oherogi?

² Jomoko paroga ni ok en gima nyalore mondo Nyasaye ohergi. Gin gima ging’eyo en ni Nyasaye en ng’at ma miyo ji luoro kendo ma chikene nyaka luw. Kata nikech puonj moko mag miriambo mogurore e chunygi, giparo ni Nyasaye ok nyal hero dhano, kata ni dhano ok nyal here. To komachielo, nitie joma paro ni Nyasaye ohero ahera ji duto ma ok odew ni timbegi chalo nade. Kane ipuonjori Muma, nifwenyo ni kido maduong’ ma Jehova nigo en hera kendo ni herano e ma nochwale mondo oor Wuode ochiwnwa misango mar rawar. (Joh. 3:16; 1 Joh. 4:8) Kata kamano, hera ma iherogo Nyasaye nyalo bedo ni otudore gi kaka ne ipon kod kama iaye.

3. En wach mane ma konyowa ng’eyo hera ma Nyasaye oherowago?

³ Gin yore mage ma Jehova nyisogo ni oherowa? Dwoko  mar penjono otenore gi ng’eyo tudruok mantie kind Jehova Nyasaye gi dhano. En adier ni Jehova e ma nochueyo ji duto. (Som Zaburi 100:3-5.) Mano e momiyo Muma luongo Adam ni “wuod Nyasaye,” kendo Yesu nopuonjo jolupne mondo oluong Nyasaye ni “Wuonwa manie polo.” (Luka 3:38; Mat. 6:9) Nikech Jehova e Jachiw Ngima, mano miyo obedo Wuonwa. Winjruok me kindwa kode chalo gi mantie e kind wuoro gi nyithinde. Kokete e yo mayot, Jehova oherowa mana kaka wuoro nyalo hero nyithinde gi chunye duto.

4. (a) Jehova opogore nade gi wuone ma opidhowa? (b) Wabiro nono weche mage e sulani kod sula ma luwe?

⁴ En adier ni wuone gin joma orem. Ok ginyal nyiso hera e yo ma Jehova oherogo dhano kata gitem matek ma chalo nade. Nitie jomoko ma ok oyie ni wuone ohero nyithindo nikech pod giparo gik maricho ma wuonegi notimonegi ka pod gitindo kendo gigo pod chando pachgi nyaka sani. Mano en gima lit miwuoro. Kiwacho adier, Jehova to ok chal kamano. (Zab. 27:10) Ng’eyo kaka oherowa kendo odewowa biro konyowa sudo machiegni kode. (Jak. 4:8) E sulani, wabiro nono yore ang’wen ma Jehova nyisogo ni oherowa. E sula ma luwe wabiro nono yore ang’wen ma wan be wanyalo nyisogo ni wahere.

5. Jaote Paulo nonyiso Jo-Athene wach mane e wi Nyasaye?

⁵ Kane jaote Paulo ni Athene e piny Grik, nofwenyo ni taondno nopong’ gi sanamu ma ne ji lamo kaka nyiseche kendo ne giyie ni nyisechego e ma nomiyogi ngima kod gik ma dwarore mondo gidhi nyime bedo mangima. Mano nomiyo Paulo owacho niya: “Nyasaye ma nochueyo piny kod gik moko duto manie iye, . . . omiyo ji duto ngima, gi muya, kod gik moko duto. . . . Kokalo kuome wangima, wawuotho, kendo wantiere.” (Tich 17:24, 25, 28) Ee, hera ma Jehova oherowago e momiyo ochiwonwa “gik moko duto” ma dwarore mondo ngimawa odhi nyime. Tem ane paro moko kuom gik ma nyiso ni wachno en adier.

6. Yo ma Nyasaye nochueyogo piny nyiso nade kaka oherowa? (Ne picha manie chak sulani.)

⁶ Ne ane ranyisi mar piny, ma Jehova Jachuech gik moko duto “osemiyo nyithind ji.” (Zab. 115:15, 16) Josayans osetiyo gi pesa mang’eny ka gitimogo nonro e kor lwasi mondo gine kabe nitie planet mamoko ma chalo gi piny. Kata obedo ni gisenwang’o planet miche, chuny josayans osenyosore nimar onge kata achiel kuomgi ma nigi gik moko duto ma dhano dwaro eka gibed mangima kaka piny timo. Pinywani en kama kende ahinya kopime gi gik mamoko duto ma Nyasaye nochueyo. Par niya, e kind planet duto ma kwan-gi ok ong’ere ne dhano, piny kende e ma Jehova nochueyo gi nyalo mar siro ngima, kama dhano ok oremoe gimoro, kama jaber, kendo ma onge gima nyalo kethe chuth! (Isa. 45:18) Ma nyiso maler kaka Jehova oherowa.—Som Ayub 38:4, 7; Zaburi 8:3-5.

7. Ere kaka yo ma Nyasaye nochueyowago nyiso ni oherowa gadier?

⁷ Kata obedo ni Jehova nochueyonwa piny ma jaber mondo wadagie, ong’eyo ni mondo wabed mamor e ngimawa, nitie gik mamoko ma wadwaro mopogore mana gi gige ringruok. Nyathi bedoga ma onge kibaji moro amora sama ong’eyo ni jonyuolne ohere gadier. Jehova nochueyo dhano e kite owuon, komiyogi nyalo mar winjo ni oherogi kendo odewogi to mano miyo gin bende  gihere. (Chak. 1:27) E wi mano, Yesu nowacho niya: “Joma mor gin joma nigi riyo mar ng’eyo Nyasaye.” (Mat. 5:3) Nikech Jehova en Wuonwa ma jahera, ochiwonwa “gik moko duto e yo mogundho mondo wamorgo,” moriwo gige ringruok kod chiemb chuny.—1 Tim. 6:17; Zab. 145:16.

8. Ang’o momiyo Nyasaye ma en “wuon adier” e ma onego oherwa?

⁸ Wuone oheroga nyithindgi kendo gitemoga ritogi mondo gimoro amora kik wuondgi ma giba yo. Gima lit en ni thoth jonyuol ok nyal tayo nyithindgi e yo maber nimar gin giwegi kaka jonyuol ok gisebedo ka giluwo chike ma yudore e Wach Nyasaye. To mano osekelo mana chochni gi lit mang’eny. (Nge. 14:12) Komachielo Jehova Nyasaye en “wuon adier.” (Zab. 31:5) Ohero nyithinde kendo oweyo ler mar adierane orieny ka tayogi e gimoro amora ma gitimo e ngimagi, to ahinya ahinya e weche mag lamo. (Som Zaburi 43:3.) Gin adiera mage ma Jehova oseelonwa, to mano nyiso nade ni oherowa?

9, 10. Ere kaka Jehova nyiso ni oherowa kuom elonwa adiera (a) kuome owuon? (b) e wi ngimawa?

⁹ Mokwongo tik tik, Jehova oseelonwa adiera monego wang’e kuome. Ofwenyonwa nyinge, kendo nyingno yudore nyadi ng’eny moloyo nying moro amora e Muma. E yo ma chal kamano, Jehova sudo machiegni kodwa, komiyowa thuolo mar ng’eye. (Jak. 4:8) Jehova bende fwenyonwa kido mathoth ma en-go mondo wang’e ni en Nyasaye ma chalo nade. Kata obedo ni gik ma wanyalo neno ma Jehova nochueyo nyiso tekone kod riekone, Ndiko fwenyonwa ni en Nyasaye mohero gik makare kendo en gi hera mogundho. (Rumi 1:20) Ochalo wuon nyithindo ma nigi teko, mariek, mohero gik makare, kendo ma jahera, to mano miyo nyithinde bedo gi winjruok maber kode.

¹⁰ E wi mano, Jehova bende elonwa adiera e wi ngimawa, tiende ni migawo momiyowa e chenrone mar gik moko duto, to mano konyowa. Mano miyo kuwe betie e kind chuechne duto kendo miyo gik moko timore e yo mochanore maber. Muma osekonyowa ng’eyo ni dhano ne ok ochue gi nyalo mar chikore giwegi ma ok otagi gi Nyasaye, kendo weyo luwo wachni kelo mana rach lilo. (Yer. 10:23) Ng’eyo wachni en gima konyowa malich. Wanyalo bedo gi kuwe kod ngima maber mana bang’ fwenyo ni Nyasaye e ma owinjore otawa. Mondo Jehova ofwenynwa adiera ma kamano, donge nyiso ni oherowa mokalo?

11. En ang’o ma Jehova osingonwa ma nyiso ni oherowa kendo odewowa?

¹¹ Wuoro ma jahera dewo ahinya kaka ngima nyithinde biro chalo kinde mabiro nikech odwaro ni gibed gi ngima maber. Gima lit en ni ji mang’eny nie mudho nikwop ok ging’eyo ngimagi ma kiny, to moko kuomgi tiyo gi thuologi e timo gik ma ok nyal kelonegi ber mosiko. (Zab. 90:10) Nikech wan nyithind Jehova Nyasaye, waneno kaka oherowa nimar osingonwa ngima ma jaber e kinde mabiro. Ng’eyo wachno miyo ngimawa bedo maber kendo mopong’ gi mor kata mana gie sani.

12. Ere kaka siem ma Jehova nomiyo Kain kod Baruk nonyiso ni oherogi kendo odewogi?

¹² Kane Jehova oneno ka Kain chiegni timo gimoro marach, nomiye siem  e sa mowinjore kopenjo niya: “Wang’i ijuolo nang’o? Kitimo maber, ok noyiei koso? . . . richo obedo e dho odi . . . to in mondo iloye.” (Chak. 4:6, 7) Gima lit en ni Kain ne ok orwako siemno to mano nomiyo opodho e richo. (Chak. 4:11-13) Kane jagoro mar Jeremia miluongo ni Baruk ool gi migape ma chunye onyosore, Jehova nomiye siem ma nokonye neno kaka gima nodwaro timono ne nyalo kelone rach. Mopogore gi Kain, Baruk norwako siem ma Jehova nomiye kendo mano noreso ngimane.—Yer. 45:2-5.

13. Ang’o momiyo Jehova noweyo jotichne oyud tembe?

¹³ Paulo nondiko niya: “Ng’at ma Jehova ohero e mokumo mondo orieye; adier, ochwado ng’ato ang’ata ma orwako kaka wuode.” (Hib. 12:6) Rieyo ng’ato ok en mana kume kinde duto. Inyalo rie ng’ato e yore mopogore opogore. Nitiere ranyisi mathoth e Muma ma wuoyo e wi jotich Nyasaye mang’eny ma noyudo tembe mager ma nyalo bedo ni norieyogi kendo notiegogi. Par ane ranyisi mar Josef, Musa, kod Daudi. Gin moko kuom joma Muma wuoyo e wi ngimagi e yo matut ahinya moloyo jomamoko e Muma. Somo kaka Jehova nokonyogi e tembe duto ma noyudogi kendo kaka Jehova noduogo otiyo kodgi e okang’ malach, miyo wamedo neno kaka odewo jotichne kendo oherogi.—Som Ngeche 3:11, 12.

14. Sama Jehova orieyowa, ere kaka wanyalo fwenyo ni oherowa?

¹⁴ Yo ma Jehova rieyogo jotichne konyowa neno yo machielo ma oherowago. Sama ng’ato otimo richo kendo oyie mondo Jehova orieye moloko chunye, Jehova ‘weyone richone duto.’ (Isa. 55:7) Mano tiende en ang’o?  Daudi notiyo gi weche ma moro chunywa kolerogo kaka Jehova weyonwaga richo. Nowacho kama: ‘En e ma oweyoni timni duto mamono, ochango tuwocheni duto; owaro ngimani kuom nek; osidho kondo e wiyi, mana ng’wono gi kech mayom. Kaka kor wuok chieng’ bor gi kor podho chieng’, e kaka ogolo timwa mwabayogo, koketogi ku mabor kodwa.’ (Zab. 103:3, 4, 12) Weuru mondo kinde duto warwak siem ma Jehova miyowa kendo wayie oriewa, nikech mano en achiel kuom yore ma onyisogo ni oherowa gadier.—Zab. 30:5.

15. En ang’o ma nyiso ni Jehova dewo joge?

¹⁵ Achiel kuom gik ma wuoro nyaka tim ne joode en ritogi mondo gimoro marach kik hinygi. Jehova, Wuonwa me polo be timo mana kamano. Jandik-zaburi moro nowacho kama e wi Jehova: “Ogeng’o richo ni chuny joge maler; ogologi e lwet jo maricho.” (Zab. 97:10) Ne ane ranyisi. Mana kaka ikawoga okang’ mapiyo mondo irit wengeni kik gimoro ohiny, e kaka Jehova bende ritoga joge. (Som Zekaria 2:8.) To mano kaka Nyasaye dewo joge!

16, 17. Ler ane yore ma Jehova tiyogo e rito joge kata mana e kindewagi.

¹⁶ Yo achiel ma Jehova ritogo joge en tiyo gi malaikene. (Zab. 91:11) Malaika moro noreso Jerusalem e lwet Assuria ma nomonjo dalano kuom nego jolweny 185,000 mag Assuria e otieno achiel. (2 Ruo. 19:35) Malaike bende ne oreso jaote Petro, jaote Paulo, kaachiel gi jomamoko ka gigologi e jela. (Tich 5:18-20; 12:6-11) E kindewagi bende, lwet Jehova ok chiek. Owadwa moro ma ofiswa maduong’ nooro mondo odhi olim ofis moro e Afrika, nochiwo ripot ni ywaruok mag siasa kod dinde noketho pinyno. Nikech ji ne gore, kwelo, negore, kendo mon ne ibambo, pinyno nopong’ gi tungni. To ni e ma onge owadwa kata nyaminwa ma notho, kata obedo ni thothgi nolalo gigegi duto kod tije ma ne konyogi. Kane openjgi ni ngima dhi kodgi nade, giduto ne gibwonjo ka giwacho niya: “Wadhi maber, wagoyo ne Jehova erokamano!” Ne gineno kaka Nyasaye oherogi.

¹⁷ Nitie kinde moko ma Jehova noweyo jowasigu oneg jotichne kaka Stefano. Kata kamano, orito jotichne ka gin oganda komiyogi siem e kinde mowinjore e wi riekni mag Satan. (Efe. 6:10-12) Jehova tiyo gi Wachne kaachiel gi buge ma lero Muma mowuok kuom riwruokne, mondo okonywa ng’eyo hinyruok ma wanyalo yudo ka wahero mwandu, wayiero yore mag manyo mor mopong’ gi gero kod weche nindruok, ka watiyo marach gi Intanet, gi mamoko. Nenore maler ni Jehova ma en Wuonwa, oherowa kendo oritowa maber.

18. Iwinjo nade e wi hera ma Jehova oherigo?

¹⁸ Bang’ nono yore manok kendo mabeyo ma Jehova nyisogo kaka oherowa, wanyalo bedo gi paro ma Musa ne nigo. Bang’ paro kaka nosetiyo ne Jehova kuom kinde malach, Musa nowacho niya: “Pong’ chunywa gi hera mari mosiko okinyi kokinyi, mondo wawer kendo wabed mamor kuom ngimawa duto.” (Zab. 90:14, The Bible in Luo, 1976) Ng’eyo kendo neno yore ma Jehova oherowago en gueth maduong’ miwuoro. To mano doko thuolo makende bedo joma Jehova ohero! Mana kaka jaote Johana wan bende chunywa chwalowa mondo wawach niya: “Neuru kit hera ma Nyasaye Wuonwa osemiyowa!”—1 Joh. 3:1.