Daudi nondiko niya: “Ok aseneno ng’at matir kojwang’, kata kothe ka kwayo ji chiemo.” Nowacho kamano kaluwore gi gima noneno katimore e ngimane. Nong’eyo maber ni Nyasaye rito joge kinde duto. (Zab. 37:25) Kata kamano weche Daudi ok nyis ni onge jatich Jehova moro amora ma ne pok oremo gik moko, kata ni onge ma norem gimoro.

Ne nitie kinde ma Daudi owuon noromo gi pek moko e ngimane. Achiel kuom kindego ne en kane oringo Saulo ma ne dwaro nege. Chiemb Daudi ne dhi ka rumo kendo ne odhi kwayo chiemo ma ne nyalo konye kaachiel gi joma ne ni kode. (1 Sam. 21:1-6) Omiyo e kindeno, Daudi ne “kwayo ji chiemo.” Kata obedo ni ne en e chal matek kamano, nong’eyo ni Jehova ne ok ojwang’e. Adiera ma wang’eyo en ni onge kama wasomo e Muma ni Daudi nosecho mondo omiye chiemo ni eka odhi nyime bedo mangima.

E bug Mathayo 6:33, wasomo kaka Yesu nosingo ni Nyasaye biro chiwo gik mochuno ne joma keto Pinyruodhe obed mokwongo e ngimagi. Yesu nojiwogi kama: “Dwaruru mokwongo pinyruodhe, gi wachne makare; eka mago duto [moriwo chiemo, gik mimadho kod lewni] nomednu.” Kata kamano, Yesu bende nowacho ni kech ne nyalo kayo ‘owetene’ nikech sand. (Math. 25:35, 37, 40) Mano en gima notimore ne jaote Paulo. Kinde ka kinde nojabedo gi kech koda riyo.—2 Kor. 11:27.

Jehova nyisowa ni ibiro sandwa e yore mopogore opogore. Bende, onyalo weyo mondo wachand gik moko sama wachiwo dwoko e wi miriambo ma Jachien nohango ne dhano. (Ayub 2:3-5) Kuom ranyisi, moko kuom Jokristo wetewa kaka ma noter e kembe mag Jo-Nazi, noyudo ka ngima tek nikech sand. Tuono Joneno mag Jehova chiemo ne en achiel kuom yore maricho ma ne itiyogo mondo okethgo yiegi. Joneno nochung’ motegno kendo Jehova ok nojwang’ogi. Noweyo mondo gikal e chalno, mana kaka oweyo Jokristo duto okal e chandruok mopogore opogore. Kata kamano, onge kiawa ni Jehova konyo jogo duto manie chal matek nikech gitiyone. (1 Kor. 10:13) Wanyalo paro weche manie Jo Filipi 1:29 mawacho kama: “Ok omiu yie kuom Kristo kende, to neno masira bende nikech en.”

Jehova singo ni obiro siko gi jotichne ndalo duto. Kuom ranyisi, bug Isaiah 54:17 wacho kama: “Onge gir lueny mothedh mar kedo kodi ma dinyal timo gi moro.” Ndikoni kaachiel gi mamoko machalo kamano singonwa ni Nyasaye biro rito joge ka gin oganda. Kata kamano, Jokristo achiel achiel nyalo romo gi chandruoge moko manyalo kata negogi.