Moa e Giwa Machon

Kaka Jorit Malworo ne Jiwo Owete

“OK ANYAL lendo ot ka ot! ” Donge en adier ni kamano e kaka jopuonjre manyien mag Muma jowinjo sama onego gilend ne joma ok ging’eyo! Kata kamano wechego nowach gi jal ma ne olony ahinya e puonjo Muma kod golo twege mag ji duto, kendo ne en achiel kuom joma ne iluongo ni pilgrim.

Thoth jogo ma ne somo Zion’s Watch Tower noweyo kanisegi nikech ne gidwaro lemo kanyachiel gi joma manyo adiera mag Muma. Gasedno ne jiwo jogo ma some mondo omany jomoko ma nigi yie kaka margi mondo gichokre kinde ka kinde kendo gipuonjre Muma. Kochakre chiegni higa mar 1894, ofis mar Watch Tower Society nooro jorit malworo mondo odhi olim grube ma nokwayo mondo olimgi. Jorit malworogi ma bang’e ne oluong ni pilgrim, ne iketo nikech ne gin chwo molony, matiyo matek, manyiso bolruok, molony gi Muma, mong’eyo wuoyo kendo puonjo e nyim oganda, kendo moyie chuth kuom rawar mar Yesu. Limbe ma ne gitimo ne grubego ne kawo ndalo achiel kata ariyo. Thoth Jopuonjre mag Muma ne hango tiyo tij lendo kuom pogo otese mag gwelo ji obi owinj twak mar ji duto, ma ne pilgrim, matiende ni jarit malworo, ne dhi golo. Bang’ golo twak mare e skul, Hugo Riemer, ma bang’e nobedo achiel kuom jokanyo mar Bura Maduong’, nodwoko penjo mag Muma ma ne ji penje nyaka chuny otieno. Kata obedo ni Hugo Riemer ne ool, ne omor ahinya kuom yo ma ne otimgo chokruogno mi nopwoyo ahinya.

Gaset mar Watch Tower nowacho ni gimaduong’ mamiyo owete malworogo timo limbe, ne en mondo gijiw “jogo ma nigi yie” kokalo kuom chokruoge ma ne itimo e ute mag owete. Jopuonjre mag Muma ma nodak machiegni ne biro mondo owinj twege, kaachiel gi penjo gi dwoko mag Muma. Bang’e ne ji chiemo. Kinde ma ne pod en nyako, Maude Abbott ne dhi winjo twak ma ne igolo gokinyi, kae to bang’e ji duto ne bet ka giluoro mesa moro maduong’ e laro. Owacho kama: “Chiemo mamit miwuoro​​—⁠ring’o, gwen mowang’, makate molos mopogore opogore, kod kek! Ng’ato ka ng’ato ne chiemo marome, to ka nochopo chiegni sa aboro odiechieng’, ji duto ne chokore mondo owinj twak machielo.” Kata kamano, omedo wacho niya: “Kane ochopo sechego ne yudo ka nindo ohingo ng’ato ka ng’ato.” Benjamin Barton ma nosebedo ka limo grube kuom kinde malach, nowacho niya, ‘Dine bed ni achamo kit chiemo duto ma ne imiya, dikoro asetho aweyo tij limo grube.’ Barua moro ma ne oor kowuok Brooklyn nojiwo nyimine ma ne tedo ne jorit malworogo ni mondo gited mana “chiemo mayot kendo maok mi nindo ochand ng’ato ang’ata.”

Jorit malworogo nong’eyo puonjo ahinya kendo ne gitiyo gi gik machalo kaka chat, gik mochue, kata gimoro amora ma ne miyo gik ma gipuonjo owinjre maler ne jowinjogi. Twege mag R. H. Barber, “kinde duto ne mulo chuny ji ahinya.” W. J. Thorn ne jawuoyo “mana ka jodongo machon mag Muma.” Chieng’ moro achiel, kane Shield Toutjian oidho mtoka miluongo ni Model A Ford, nokok gi dwol niya, “Chung mtoka! ” Nowuok e mtokano, mi opono mauwa moko kae to omiyo jowetene mi ochako puonjogi e wi chwech mag Jehova.

Tije mathoth ma jorit malworo ne timo ne kelo pek mang’eny, to ahinya wuon ne jogo ma ne hikgi ng’eny. Kata kamano, kuom jomoko, pek maduong’ ne en  rwako lokruok ma ne otim kaluwore gi migawo margi. Koro ne dwarore ni gikaw okang’ mokwongo e tayo jomoko e lendo mar ot ka ot. Gaset mar Watch Tower ma Mach 15, 1924, nolero ni “achiel kuom ote madongo” momi Jokristo madier “en chiwo neno kuom pinyruoth. Omiyo jorit malworogo ioro mondo odhi otim mano.”

Jorit moko nenore ni ok norwako lokruok ma ne otimno, nimar ne giweyo tij lworo, kendo moko kuomgi nong’anjo ma gichako kanise maggi. Robie D. Adkins paro kaka achiel kuom jorit ma nolony ahinya nowacho ka iye owang’ niya: “An ang’eyo lendo mana ka an e ndiri. Ok anyal lendo ot ka ot! ” Owadwa Adkins medo wacho kama: “Bang’e ne anene e chokruog-distrikt ma ne otim Columbus, Ohio e higa mar 1924. En kende e ng’at ma ne ok mor e kind ji tara gi tara ma ne mor sidang’, kendo ne ochung’ kar kende e bwo yien moro. Mano ema ne anenee mogik. Noweyo riwruok mar oganda Jehova.” To komachielo, “owete mang’eny ne mor gi buge ma ne giting’o ka gitero e mtokni maggi,” manyiso maler kaka ne giikore mar lendo ot ka ot.​​—⁠Tich 20:⁠20, 21.

Thoth joritgo noketo chunygi koda pachgi duto e tijgi, kata obedo ni gin bende samoro ne gin gi luoro mana kaka owete ma ne gidhi tiego. Kaluwore gi wach lendo ot ka ot, jarit moro miluongo ni Maxwell G. Friend (Freschel) mawacho dho-Jerman nondiko kama: “Lendo ot ka ot medo kelo gweth e tich mwatiyoni.” Jarit machielo miluongo ni John A. Bohnet nowacho ni owete ne oyie gi chunygi duto gi tich mar lando wach Pinyruoth. Kaluwore gi kaka ne oneno, thoth owete ne “nigi ilo ahinya mar dwaro chako lendo.”

Kuom higini duto, owete mochung’ motegno mosebedo ka limo kanyakla, osebedo ka jiwo ahinya owete gi nyimine. Norman Larson mosebedo Janeno kuom higini mathoth wacho kama: “Tich koda gweth ma owete ma joritgo ne kelo ne kanyakla ne nenore ayanga kata mana e kinde mapod ne an nyathi. Joritgo nokonya ahinya mondo atim dongruok mowinjore mondo abed ng’at maber.” Nyaka chop kawuono, jorit ma lworo ka gin gi chuny mar chiwruok, kendo ka gimakore motegno gi Nyasaye, konyo jowetegi mondo owach ni, “Wanyalo lendo ot ka ot!”

[Weche manie ite mar 32]

Ne en odiechieng’ mopong’ gi mor kane jorit malworo obiro!

[Picha manie ite mar 31]

E higa mar 1905, ne nitie grube 170 ma ne Benjamin Barton onego olim

[Picha manie ite mar 32]

Walter J. Thorn ne en jarit-alwora, kendo owete nohero luonge ni Baba nikech nohero owetego mana kaka nyithinde

[Picha manie ite mar 32]

J. A. Browne ne oor Jamaica kaka jarit-alwora chiegni e higa 1902 mondo oteg kendo ojiw grube 14 matindo tindo

[Picha manie ite mar 32]

Tij bedo jarit malworo ne miyo ng’ato gero yie motegno, jiwo winjruok ma ne nitie e kind Jokristo, kendo keto owete obed machiegni gi riwruok mar oganda Jehova