Romo Makelo Lokruok Makende

STEPHEN LETT ma en jakanyo mar Bura Maduong’ ne owacho kama: “Kochopo e giko mar romoni, onge kiawa ni ubiro wacho ni, ‘kuom adier, romo mar higani, en makelo lokruok makende ahinya!’” Wechego ne omiyo joma ne nie chokruogno obedo gi siso ahinya. Ne owacho kamano e romo mar nyadi 126 mar Watch Tower Bible and Tract Society mitimo higa ka higa, ma ne otim Oktoba 2, 2010, e Od Chokruok mar Alwora mar Joneno mag Jehova e dala mar Jersey City, New Jersey, Amerka. Romono noting’o weche mage madongo?

Owadwa Lett nogolo twak mokwongo gi ilo, e wi gach lweny me polo ma iwuoyo kuome e bug Muma mar Ezekiel. Gari mang’ongono ochung’ne riwruok mar oganda Nyasaye, kendo Jehova ema chike. Owadwa Lett nowacho ni bad-riwruogno me polo moting’o chwech mag roho, ringo matek ka mil polo—mano nyiso kaka pach Jehova sudo mapiyo. Bad-riwruok mar oganda Jehova Nyasaye me piny bende ringo ka sudo. Owadwa Lett nowuoyo kuom dongruok moko mabeyo mosebedoe e bad-riwruogno me piny e higini mosekalo machiegni.

Kuom ranyisi, ofise moko sani iriwo kaachiel, kendo mano miyo thoth jogo ma ne tiyo Bethel mag pinjego mondo koro oketre e tij lendo moloyo. Owadwa Lett ne ojiwo jowinjo mondo osik ka kwayo Jehova e lamo mondo Bura Maduong’, matiyo e lo kweth mar jatichno, odhi nyime ok mana kuom bedo kweth migeno kende, to bende gisik ka giriek.—Math. 24:45-47.

Ripode Koda Penjo Ji

Tab Honsberger, ma en jakanyo mar Komiti mar Ofis e Haiti, ne ochiwo ripot ma ne mulo chuny ahinya e wi yiengini piny ma ne otimore Januar 12, 2010, ma iwacho ni ne onego chiegni ji 300,000 e pinyno. Ne owuoyo konyiso ni jodolo osebedo kawacho ne ji ni Nyasaye ema ne okumo jo maonge yie, kendo ne oreso jomabeyo. Kata kamano, mabuse gana mang’eny ne oringo mowuok e jela kane sisi mag jela opodho nikech yiengni piny. Omiyo, jo-Haiti mang’eny ma chunygi ni kare, sani yudo hoch kuom puonjruok kendo ng’eyo gimomiyo masiche ng’eny e kinde mwadakiegi. Owadwa Honsberger ne oluwo weche mag owadwa moro mochung’ motegno ma Ja-Haiti ma ne olalo chiege e masirano, kowacho kama: “Pi wang’a podi wuok nyaka sani. Ok ang’eyo ni abiro dhi nyime ywak nyaka karang’o, kata kamano, an gi mor e chunya nikech aneno hera mar riwruok mar oganda Jehova. An gi geno kendo adwaro nyiso jomoko geno ma an-go.”

Mark Sanderson, ma sani en jakanyo mar jood Bethel ma Brooklyn, nochiwo ripot e wi  piny Philippines. Kaka jal ma chon ne en jakanyo mar Komiti mar Ofisno, wang’e ne rieny gi mor sama ne onyiso kaka pinyno osebedo gi kwan mamalo nyadi 32 moluwore mar jolendo mag Pinyruoth, koda kaka kwan mar jopuonjre mag Muma ni malo ahinya moloyo mar jolendo. Ne owuoyo kuom owadwa moro miluongo ni Miguel ma nyakware ne onegi. Miguel ne otiyo matek mondo janekno otwe e jela. Bang’e, kane Miguel lendo e jela, ne oromo gi janekno. Kata obedo ni Miguel ne luor matin, ne owuoyo kod janekno gi muolo. Gikone ne opuonjre Muma gi jalno, kendo jalno ne orwako wach e yo maber mi bang’e nohero Jehova. Sani osebatise. Miguel en osiepne machiegni kendo otemo sani ahinya mondo one ni ogony owadwa manyienno kapok ndalone mar twech orumo. *

Bang’e ne nitie program mar penjo ji, ma ne ota gi Mark Noumair, ma en jatieg ji e Migawo mar Skunde mag Tij Nyasaye. Ne owuoyo kopenjo owete adek koda mondegi—Alex gi Sarah Reinmueller, David gi Krista Schafer, kod Robert gi Ketra Ciranko. Alex Reinmueller, ma en jakony mar Komiti mar Gocho, ne owacho kaka ne okawo adiera gi pek e diere ma ne en painia e piny Kanada ka en mana jahigini 15, kendo kinde mang’eny ne olendo ka en kende. Kane openje ni gin jomage ma ne oketone ranyisi moloyo e Bethel, Owadwa Reinmueller nohulo nying’ owete adek, kendo nonyiso kaka moro kamoro kuomgi ne okonye ahinya timo dongruok e wach Nyasaye. Chiege Sarah, nowuoyo kuom nyaminwa moro ma ne onano e bwo twech e jela mag piny China nikech yie mare. Sarah nowacho ni osepuonjore geno kuom Jehova kokalo kuom wuoyo kode e lamo.

David Schafer, ma en jakony mar Komiti mar Puonjo, ne owuoyo kopwoyo min mare ahinya nikech yiene motegno, kendo nowuoyo kuom owete ma ne tiyo kaka jong’ad yien ma ne okonye bedo japainia makonyo kane pod orawera. Chiege Krista, ne owuoyo gi mor ahinya kaka Jo-Bethel ma ne okwongone, ne oketone ranyisi maber kuom wach ‘bedo jo adier kuom gi matindo,’ mana kaka Yesu nochiko.—Luka 16:10.

Robert Ciranko, ma en jakony mar Komiti mar Ndiko, ne owuoyo kuom kwerene gi deyene ang’wen, ma ne owuok e piny Hungary kendo giduto ne gin Jokristo mowal. Kane en mana wuowi matin, ne omor ahinya kane odhi e chokruoge madongo mag distrikt e higini mag 1950, kendo fwenyo ni riwruok mar oganda Jehova ne duong’ moloyo kanyakla ma korgi. Chiege Ketra, ne onyiso kaka ne opuonjre kido mar makruok gi oganda Jehova kane en painia e kanyakla moro ma ne nigi  chandruok mikelo gi joma ne ong’anjo moweyo yie koda chandruoge mamoko. Ne onano mi gikone ne okete bedo painia makende e kanyakla machielo ma ne nigi kido mar winjruok ma ne omulo chunye ahinya.

Bang’ mano, Manfred Tonak ne ochiwo ripot e wi piny Ethiopia. Ethiopia en piny ma ne nitie nyaka e diere mag Muma, kendo sani oting’o jolendo mag wach maber mokalo 9,000. Ng’enygi odak e taon maduong’ mar Addis Ababa kata machiegni. Omiyo, dwarore ni wach maber ochop e gwenge maboyo mag pinyno. Mondo mi mano otimre, ne ogwel Joneno ma Jo-Ethiopia modak e pinje mamoko mondo gibi limbe mondo gilendi e gwenge moko maboyogo. Ng’enygi ne obiro mi gijiwo Joneno modak e pinyno, kendo ne giyudo ji ma ne oikore winjo.

Wach maduong’ e programno ne en twak mopogi e migepe ma ne wuoyo e wi Joneno mag Jehova e piny Russia koda lweny mag kes mag buche ma ne omakogi. Aulis Bergdahl ma en ja Komiti mar Ofis ma Russia ne ochiwo sigana manyiso kaka Joneno ma Russia osesandi, to moloyo, e dala mar Moscow. Philip Brumley matiyo e Migawo mar Weche Chike e ofis ma Amerka ne owuoyo kuom dongruok mabeyo ahinya mosetimore e dweche mokalo machiegni, kane Od Bura ma Ulaya mar Ratiro mag Dhano ne owinjo kes mag weche ochiko ma ne odonjnego Joneno. Od Burano ne oyudo ni kuom kes ochikogo, onge kata achiel ma ne nigi mise, to bende ne gitiyo gi moko kuom kesgo e lero gimomiyo kesgo ne onge gi mise. Kata obedo ni warito neno kaka weche biro chalo, Owadwa Brumley ne onyiso kaka wach kesno nyalo konyo e kes mag pinje mamoko.

Bang’ weche mabeyogo, Owadwa Lett ne olando ni Od Burano oseyie nono kes e wi wach osuru mosebedoe kuom ndalo malach, e kind sirkal mar France kod Joneno mag Jehova. Od Bura ma omi luorno, ok hiny yie nono kes moro amora ma oket e nyime. Nyaka chop sani, Od Burano osenono kes 39 e wi Joneno, kendo Joneno oseloyo 37 kuomgi. Owadwa Lett ne ojiwo jo Nyasaye duto mondo okwa Jehova Nyasaye e lamo kuom wachni.

Ripot mogik ne ochiw gi Richard Morlan, ma en achiel kuom jotieg ji e Skul mar Jodong-Kanyakla. Ne owuoyo gi ilo e wi skundno, koda kaka jodongo mosedhi e skundno osenyiso kaka gimor gi gik ma ne gipuonjore e skundno.

Twege Mamoko ma Jokanyo mag Bura Maduong’ Nogolo

Guy Pierce ma en jakanyo mar Bura Maduong’ ne ochiwo twak mamulo chuny ahinya  e wi ndiko mar higa 2011, ‘Ket nying Jehova obedni kar buok.’ (Zef. 3:12, New World Translation) Ne owacho ni kata obedo ni kindewagi gin kinde makelo mor ne oganda Jehova e yore mang’eny, bende gin kinde monego wakaw gi pek ahinya. Odiechieng’no maduong’ mar Jehova chiegni, to ema podi ji dhi nyime manyo kar buok e din mar miriambo, riwruoge mag siasa, mwandu mag ringruok, gi mamoko. Mondo omi wayud kar buok madier, dwarore ni waluong nying Jehova, to timo kamano oriwo ng’eyo, nyiso luor matut, kendo geno Wuon nyingno, here gi gigo duto ma wan-go.

Bang’e, David Splane ma en jakanyo mar Bura Maduong’ ne ogolo twak majiwo chuny ahinya ma wiye penjo kama, “Be Isedonjo e Yueyo mar Nyasaye?” Nonyiso ni yueyo mar Nyasaye ok nyis ni koro ng’ato bet maonge tich, nimar Jehova koda Wuode osebedo “katiyo” kinde duto mag odiechieng’ yueyo mar ranyisino, mondo omi gichop chuth dwaro mar Nyasaye kuom piny. (Joh. 5:17) Ere kaka wanyalo donjo e yueyo mar Nyasaye? Yo achiel en kuom weyo timo richo kaachiel gi luwo mana gik mamorowa wawegi. Dwarore ni wadag ka wanyiso yie kendo keto dwach Nyasaye e pachwa, kendo riwo lwedo dwarono e yo moro amora mwanyalo. Nitie kinde moko ma timo kamano nyalo bedonwa matek, kata kamano, dwarore ni warwak siem ma rieyowa kendo luwo kaka riwruok mar oganda Jehova chiko. Owadwa Splane ne osayo jowinjo mondo otim duto ma ginyalo mondo gidonj e yueyo mar Nyasaye.

Anthony Morris ma en jakanyo mar Bura Maduong’, ema nogolo twak mogik ma wiye ne wacho ni, “En Ang’o Mwarito?” Konyiso pek mar wechego kendo wuoyo mang’won kaka wuoro, Owadwa Morris noparo ne jowinjo gik madongo ma ne okor ma jogo duto mochung’ motegno rito gi siso. Gigo oriwo milome mar ni, “Kuwe nitie, kendo weche nikare”! kod ketho din mar miriambo. (1 Thes. 5:2, 3; Fwe. 17:15-17) Owadwa Morris ne ochiwo siem kuom bedo gi chuny mar wacho ni, “Mae nyaka bed ni en Har–Magedon,” sama ji neno gik moko matimore maok chop weche mokorgo. Ne owacho ni ber ka wabedo gi chuny mar rito mana kaka inyiso e Mika 7:7. Kata kamano, gie kindeno bende ne ojiwo ji duto mondo omakre motegno gi Bura Maduong’, kendo sudo machiegni ng’ato gi nyawadgi mana kaka jolweny mochomo kama lweny tekie. Ne owacho kama: “Mondo chunyu oduogi, un duto mogeno Jehova.”—Zab. 31:24.

E giko, ne nitie lokruok moko makende mamorowa ahinya ma ne olandi. Geoffrey Jackson ma en jakanyo mar Bura Maduong’ ne olando ni ibiro gol gocho mar Ohinga mar Jarito e dho Ingresa mayot, ne jogo ma ok nigi lony ahinya e dho Ingresa, mondo one kaka mano biro tiyo. Kae to Stephen Lett ne olando ni, Bura Maduong’ biro loso chenro mar timo limbe mag kwath ne jorit-distrikt kaachiel gi mondegi e piny Amerka. Bang’e ne olando ni kochakore sani, Skul mar Tiego Owete e Tije Kanyakla ibiro lok nyinge mondo obed ni, Skund Muma ne Owete Maok nie Kend. Bende ne olando ni e kinde machiegni mabiro, nitie skul manyien mabiro bedoe miluongo ni, Skund Muma ne Jokristo Mokendore. Skundno biro tiego joma okendore mondo mi gimed konyo e riwruok mar oganda Jehova. Owadwa Lett ne olando bende ni Skul mar Jorit Malworo gi Mondegi, kod Skul mar Jokanyo mag Komiti mar Ofis gi Mondegi, ibiro ket mondo otimgi nyadiriyo higa ka higa e Patterson, kendo jogo ma ne osedhi e skundego biro yudo thuolo mar dok kendo.

Chokruogno ne orumo e yo mamulo chuny ahinya e sama John E. Barr, ma jahigini 97, ma osebedo ka en jakanyo mar Bura Maduong’ kuom higini mang’eny, ne ochiwo lamo moa e chuny kendo manyiso bolruok. * E giko romono, ji duto ne oa ka ging’eyo ni kuom adier, mano ne en odiechieng’ mokelo lokruok makende.

[Weche moler piny]

[Weche manie ite 19]

Jowinjo duto ne mor kuom winjo weche ma jomoko nochiwo kipenjogi

[Weche manie ite 20]

Jehova osegwedho tij lendo e piny Ethiopia