Be Ikawo Gweth ma In-go Kaka Gimaduong’ Gadier?

BANG’ kane osetim hono mar resogi a e twech e piny Misri, nyithind Israel ne mor ahinya, nimar koro ne gin gi thuolo mar lamo Jehova. (Wuok 14:29–15:1, 20, 21) Kata kamano, mapiyo bang’ mano yo ma ne ginenogo gik moko ne olokore. Ne gichako ng’ur e wi chal margi e ngima. Nikech ang’o? En nikech kar keto pachgi kuom gik ma Jehova noyudo osetimonegi, koro ne ging’iyo mana chandruok kod pek mag dak e thim. Ne giwacho ne Musa niya: “Marang’o ukelowa a e Misri mondo watho e thim? nikech onge chiemo, bende onge pi; kendo chunywa ojok gi chiemo mayotni [manna].”​—Kwan 21:5.

Higini mang’eny bang’e, Ruoth Daudi mar Israel machon nowero kama: “Asegeno kuom kechni; chunya noyil ahinya kuom resrwokni: anawer ni Jehova, nikech osepogona mathoth.” (Zab. 13:5, 6) Wi Daudi ne ok owil gi timbe mag kech ma Jehova nonyise. Kar mano, pile noparo matut kuomgi. (Zab. 103:2) Wan bende Jehova osegwedhowa, omiyo ok owinjore wakaw kanono gigo mosetimonwa. Kuom mano, weuru wanon ane moko kuom gweth ma Nyasaye osemiyowa e ndalogi.

“Maling’ling’ mar Jehova”

Jandik-zaburi nowero niya: “Wach maling’ling’ mar Jehova ni gi jogo moluore.” (Zab. 25:14) Mano kaka dhano ma joricho nigi thuolo makende mar bedo gi winjruok majaber kendo maling’ling’ gi Jehova! Kata kamano, nade ka wadich ahinya gi wechewa mag ngima mapile mi chop kama watiyo mana gi kinde matin e wuoyo gi Nyasaye e lamo? Par ane gima nyalo timore ne winjruokwa maber gi Jehova. Kaka Osiepwa, Jehova dwaro ni wagene kendo  wanyise e lamo weche duto manie chunywa, ka wahulone gombowa, koda gigo duto makelonwa luoro gi parruok. (Nge. 3:5, 6; Fili. 4:6, 7) Donge mano nyiso ni onego wapar ahinya weche mwanyise e lamo magwa?

Kane rawera moro ma Janeno miluongo ni Paul noparo matut kuom lamo mage, nofwenyo ni ne dwarore otim dongruok. * Nowacho niya, “Ne asebedo gi tim mar wuoyo gi Jehova e lamo ka atiyo mana gi weche machal nyadinwoya.” Kaka Paul nomedo timo nonro e Fahirisi, ne oyudo ni nitie chiegni lamo 180 mondiki ei Muma. Ei lamogo, jotich Jehova machon ne hulo weche me i chunygi ma iye. Paul nowacho kama: “Kuom paro matut e wi ranyisigo manie Ndiko, ne apuonjora lemo ka ahulo wechega e yo moriere. Mano osekonya yawo chunya ne Jehova. Sani ayudo mor sidang’ kuom sudo machiegni kode e lamo.”

“Chiemo e Kinde Makare”

Gweth machielo ma Jehova osemiyowa gin adiera mang’eny mwasepuonjore ei Ndiko. Sama wachamo chiemb chuny mang’eny mosechiwnwa, onge kiawa ni owinjore ‘wawer nikech mor manie chunywa.’ (Isa. 65:13, 14) Kata kamano, nyaka watang’ ne gigo maok owinjore manyalo miyo walal ilo ma wan-go ne adiera. Kuom ranyisi, chiko itwa ne miriambo mag jogo moseng’anjo moweyo adiera, nyalo ketho pachwa mi monwa neno ber mar chiemb chuny ma Jehova miyowa “e kinde makare” kokalo kuom “jatichno mogen, kendo mariek.”​​—⁠Math. 24:45-47.

André, ma ne oyudo osetiyo ne Jehova kuom higini mogwaro, ne obayo yo nikech wuond mag joma oseng’anjo moweyo adiera. Ne oparo ni neno anena mapiyo weche manie Web site mar jogo e Intanet, ne ok nyal kelone hinyruok. Oparo kowacho kama: “Motelo, weche ma joma oseng’anjogo luongo ni adiera ema ne oywaya. Kaka ne amedo nono gik ma ne giwacho, e kaka ne amedo paro ni ne an gi gimomiyo onego awe riwruok mar oganda Jehova. Kata kamano, bang’e sama ne atimo nonro e wi weche ma jong’anjogo ne donjonego Joneno mag Jehova, ne aduogo afwenyo kaka jogo gin jowuond mariek kendo jopuonj ma miriambo. Weche ma ne gisirorego e donjonwa, ne gin mana weche maok adier. Omiyo, ne achako somo bugewa kendo, mi achako dhi e chokruoge. Mapiyo, ne afwenyo kaka nitie weche mang’eny ma ne osebaya.” En gima ber ni, André noduogo e kanyakla.

“Riwruok Duto mar Owete”

Riwruokwa mar owete manyiso hera kendo ma nigi winjruok, en gweth moa kuom Jehova. (Zab. 133:1) Omiyo, jaote Petro nondiko niya: “Beduru gi hera ne riwruok duto mar owete.” (1 Pet. 2:​17, New World Translation) Bedo e riwruok mar owete ma Jokristo, miyo wayudo jip maber koa kuom wuone,  mine, owete, kod nyimine ma nigi yie kaka marwa.​—Mari. 10:29, 30.

Kata kamano, nitie gik ma seche moko nyalo kelo ywaruok moko e winjruokwa gi owete koda nyimine. Kuom ranyisi, yot mondo nyawo mag ng’ato ochwanywa, mi wabed gi chuny mar kwedo jalo. Kapo ni mano nyalo timore, donge ber ka waparo ni Jehova ohero jotichne kata bed ni girem? E wi mano, “kwawacho ni waonge richo, wawuondore kendwa, kendo adiera onge e iwa.” (1 Joh. 1:8) Donge onego watem ‘ng’wonore, kendo weyore richo ng’ato gi ng’ato’?​—Kol. 3:13.

Rawera moro miluongo ni Ann nopuonjore ber mar bedo e riwruok mar Jokristo, bang’ yudo lit. Nikech notimo machal gi wuowi ma noringo pacho e ngero ma Yesu nowuoyoe, nyakono nodok chien mosmos moweyo kanyakla mar Jokristo. Bang’e, paro makare noduogone, mi noduogo e adiera. (Luka 15:11-24) Ann ne opuonjore ang’o kuom wachno? Owacho kama: “Nikech koro aseduogo e riwruok mar oganda Jehova, ageno ahinya owete gi nyiminena duto kata bed ni girem. E ndalo machon, ne ajarikini neno kethogi. Kata kamano, sani ang’ado mar mondo kik awe gimoro amora omona neno gweth ma an-go e kind Jokristo wetena. Onge gimoro amora oko kuno maber maloyo paradis mar roho ma wantiere.”

Kinde Duto Kaw Gweth ma In-go Kaka Gimaduong’

Geno ma wan-go kuom Pinyruodh Nyasaye kaka sirkal kende mabiro tieko chuth chandruok duto mag dhano, en gweth maok nyal por gi machielo. Kane eka wakwongo ng’eyo wach genono, mano kaka chunywa ne opong’ gi mor! Ne wawinjo mana kaka jahono e ngech Yesu, ma ne “oloko gik moko duto ma en go,” mondo omi ong’iew “lulu achiel ma nengone tek ahinya.” (Math. 13:45, 46) Yesu ne ok owacho ni jalno ne olalo mor ma ne en-go kuom bedo gi luluno. Kamano bende, kik walal ngang’ mor ma wan-go kuom bedo gi genowa majaberni.​—1 Thes. 5:8; Hib. 6:19.

Par ane ranyisi mar Jean, mosebedo ka tiyo ne Jehova kuom higini mokalo 60. Owacho kama: “Gima osekonya keto wach Pinyruodh Nyasaye e pacha en wuoyo gi jomoko kuom Pinyruodhno. Sama aneno ka wang’gi bedo moil bang’ ng’eyo gima Pinyruodhno en, mano jiwa ahinya. Neno lokruok ma adiera mar Pinyruoth kelo e ngima japuonjre Muma miyo aparora ni, ‘Mano kaka an gi adiera mabeyo ndi mowinjore anyis jomoko!’”

Wan gi gik mang’eny mamiyo owinjore wakaw gweth mang’eny ma wan-go kaka gimaduong’. Kata obedo ni wayudo chandruoge kaka akwede, tuoche, bedo moti, parruok gi kuyo, lalo jowa e tho, kod chandruok mag yuto, wang’eyo ni mago gin mana gik makadho. E bwo Pinyruodh Nyasaye, wanabed gi gweth mag ringruok e wi gweth mag chuny ma wan-go sani. Chandruok moro amora mwananoe sani nogol oko e chenro manyien mar piny.​—Fwe. 21:4.

Gie sani, weuru wakaw gwethwa mag chuny kaka gimaduong’, kendo wanyis chuny mamor kaka mar jandik-zaburi ma nowero kama: “A Jehova Nyasacha, honini misetimo ging’eny, gi wecheni bende miparo kuomwa: otamore chanogi e nyimi; ka dadwar hulo kendo twak kuomgi, ging’eny moloyo kweno.”​—Zab. 40:5.

[Weche moler piny]

[Picha manie ite mar 18]

En gweth ahinya bedo gi owete masirowa e yie sama wan e bwo chandruok