Kwed Wuond Mariek mag Satan

‘KIK ng’ato wuondu. Nyasachu ok bi konyou. Bolreuru, nono to ubiro yuago ang’e!’ Mano e wach ma Rabshake, jaote Sannakerib Ruodh Asuria, nokelo ne jogo ma nodak Jerusalem. Jolweny mag ruodhno ne oyudo omonjo piny Juda. Weche jaoteno ne gin weche ma ne olos mondo onyos chuny jo Jerusalem, ka miyogi luoro mondo omi gichiwre e lwet jolwenygo.—2 Ruo. 18:28-35.

Jo-Asuria nong’ere kaka jo mager kendo matimo ne ji malit ahinya. Ne gimiyo jowasikgi luoro kuom chiwonegi weche matut manyiso kaka ne gijatimo malit ne wasumbini maggi. Kaluwore gi jasomo miluongo ni Philip Taylor, ne gihinyo tiyo gi ‘weche machiwo luoro kaachiel gi wuond mariek ma ne idwaro ni onyos chuny ji, ka miyo joma ne nyalo bedo wasikgi obed gi luoro, kokalo kuom weche malit machando paro.’ Wuond mariek en gir lweny matiyo maber ahinya. Taylor wacho ni wuond mariek ‘ketho paro.’

Jokristo madier nigi ‘jowasigu ma gikedogo maok gin ringruok gi remo, to gikedo kod lang chuny maricho maok mag pinyni,’ tiende ni chwech mag roho ma nong’anjo ne Nyasaye. (Efe. 6:12) Jasigu maduong’ kuomgi en Satan Jachien. En bende otiyo gi weche machiwo luoro koda moting’o wuond mariek midwaro ni onyos chuny ng’ato.

Satan wacho ni onyalo miyo waketh chike Nyasaye waduto ng’ato ka ng’ato. E ndalo mag Ayub, Satan nowacho ne Jehova Nyasaye kama: ‘Gik moko duto ma dhano nigo nochiw nikech ngimane.’ Tiende ni Satan ne temo wacho ni, med ne dhano chandruok, to gikone obiro ketho chike Nyasaye. (Ayub 2:4) Be Satan nikare? Be waduto wan gi tong’—ma ka tem okalo tong’no, to wabiro jwang’o chike makare mana ni mondo wasik kwangima? Satan diher ni mondo wabed gi paro ma kamano. Omiyo, ohinyo tiyo gi wuond mariek ma nyoso chuny ng’ato mosmos, mondo orwak paro ma kamano e pachwa. We wanon ane moko kuom yore motiyogo e timo kamano, mondo wane kaka wanyalo kwede.

“Misegi ni e Buch Lowo”

Satan notiyo gi Elifaz, achiel kuom ji adek ma nolimo Ayub, e nyiso ni dhano gin joma nono chuth. Kowuoyo kuom dhano kaka “jo modak e ut lowo,” Elifaz nowacho ne Ayub kama: “Misegi ni e buch lowo, ma thogi yot kaka oguyo mar otieno! Onegogi gokinyi nyaka odhiambo: githo nyaka chieng’, ma onge ng’a madewogi.”—Ayub 4:19, 20.

Kamachielo ei Ndiko, iporo dhano gi “agulini mag lowo” ma tore mayot. (2 Kor. 4:7) Warem nikech onyuolwa e richo. (Rumi 5:12) Ka owewa kendwa, waonge gi nyalo mar kedo gi Satan. Kata kamano, kaka Jokristo, ok owewa maonge kony. Kata obedo ni warem, ok wan ka nono e wang’ Nyasaye. (Isa. 43:4) E wi mano, Jehova chiwo roho maler ne jogo makwaye. (Luka 11:13) Rohone nyalo miyowa “tekono maduong’ ahinya,” ka mano konyowa kedo gi masira moro amora ma Satan kelonwa. (2 Kor. 4:7; Fili. 4:13) Ka wachung’ motegno e kwedo Jachien, kendo ‘kwachung’ matek e yie,’ Nyasaye biro miyo wagurre motegno.  (1 Pet. 5:8-10) Omiyo, ok onego waluor Satan Jachien.

‘Dhano Modho Richo’

Elifaz nopenjo kama: “Dhano en ang’o, ere gi ma dimiye bedo maler? Kod en ma dhako onyuolo, ere gi ma dimiye bedo makare?” Kae to nodhi nyime dwoko kowacho niya: “Ne, ok ogeno joge maler; ee, polo ok ler e nyime. To dhano ma chunye sin godo, modwanyore, orem moloyo e nyime, dhano mamodho richo ka pi.” (Ayub 15:14-16) Elifaz ne temo wacho ne Ayub ni onge dhano ma Jehova kwano kaka ng’a makare. Jachien bende dwaro ni onyos chunywa kokalo kuom bedo gi paro maok kare. Odwaro ni wabed gi parruok kuom kethowa machon, wabed joma kwedore wan wawegi, kendo wapar ni wan joma piny odong’ godo maok nyal kony ngang’. Odwaro bende ni wapar ni ok wanyal chopo gigo ma Jehova dwaro kuomwa, kendo ni, ng’wono, koda kony ma Jehova chiwo ok nyal choponwa ngang’.

En adier ni waduto ‘waseketho kendo warem kuom duong’ mar Nyasaye.’ Onge dhano monyuol e richo manyalo rito chike Jehova e okang’ mowinjore chuth. (Rumi 3:23; 7:21-23) Kata kamano, mano ok nyis ni koro wan kanono e wang’e. Jehova ong’eyo ni ‘thuol machon, miluongo ni Jachien kendo Satan,’ ema tiyo marach gi chalwa mar richo. (Fwe. 12:9, 10) Nikech ong’eyo ni “wan mana buch lowo,” Nyasaye keto mano e paro, kendo mano miyo ‘ok orognwa pile.’—Zab. 103:8, 9, 14.

Ka waweyo yo marach mi wadhi ir Jehova gi chuny motur kendo molokore, obiro ‘weyonwa richo duto.’ (Isa. 55:7; Zab. 51:17) Muma wacho ni kata bed mana ni richowa ‘obet makwar ahinya, ginidok matar kaka theluji.’ (Isa. 1:18) Kuom mano, weuru mondo chunywa kik nyosre ngang’ e timo dwaro mar Nyasaye.

Kaka joma onyuol e richo, ok wanyal ngang’ bedo makare e nyim Nyasaye kokalo kuom tichwa wawegi. Adam gi Hawa nodonjo e richo, mi giwito geno mar ngima mochwere, ok mana ne gin giwegi, to koda ne wan waduto. (Rumi 6:23) Kata kamano, nikech hera maduong’ moherogo dhano, Jehova noloso chenro mar weyonwa richowa, ka waketo yie kuom misango mar rawar mar Wuode, Yesu Kristo. (Math. 20:28; Joh. 3:16) Mano kaka Nyasaye nonyisowa ‘ng’wonone’ maok wawinjore yudo e okang’ miwuoro! (Tito 2:11) Ee, wan joma Nyasaye nyalo waro! Donge ok onego wawe Satan omi wapar ni wan joma kargi oselal maok nyal war?

“Imul Chokene gi Ringre”

Satan nowacho ni Ayub ne dhi weyo yiene, kapo ni nonyalo bedo matuwo. Jachien nowacho ne Jehova kama: “Imul chokene gi ringre, eka obiro yanyi e nyimi.” (Ayub 2:5)  Onge kiawa ni Jasik Nyasaye nyalo bedo mamor konyalo miyo wapar ni wan kanono nikech midekrewa.

Kata kamano, Jehova ok kwedwa e kinde makoro ok wanyal timo duto ma ne watimo chon e tichne. To nade ka dipo ni jokuo omonjo osiepwa mwahero mi gihinye? Be mano biro miyo wakaw osiepwano ka ng’ama nono nikech koro ok onyal timo mang’eny kaka notimo chon? Ooyo ngang’! Podi wabiro here kendo rite—to moloyo, kane ohinyore kotemo timo gima konyowa. To nade Jehova? Muma wacho ni: “Nyasaye en ng’a makare, kendo wiye ok diwil kod tichu gi hera ma usenyiso ni uherogo nyinge.”—Hib. 6:10.

Ndiko wuoyo kuom “chi liel modhier” manyalo bedo ni ne osetiyo ne Nyasaye kuom higini mogwaro. Kane Yesu oneno chi lielno ka luto “senti ariyo” e kar keno mar hekalu, be ne okawe, kaachiel gi chiwo mare kaka gima nono? Ooyo, mopogore gi mano, ne opwoye kuom timo duto kar nyalo mare e riwo lwedo lamo madier.—Luka 21:1-4.

Ka wachung’ motegno e bwo tem, wanyalo bedo gadier ni winjruok manie kindwa gi Jehova biro siko tatata, kata bed mana ni rem ma richowa kelo e yor bedo moti koda tuoche chalo nade. Nyasaye ok nojwang’ ngang’ jogo mochung’ motegno, mana nikech masiche oduoko chien nyalogi mar tiyone.—Zab. 71:9, 17, 18.

Rwak ‘Ogudu mar Warruok’

Ere kaka wanyalo ritore kuom wuond mariek mag Satan? Jaote Paulo nondiko kama: “Beduru motegno e i Ruoth, kendo e nyalo mar tekone. Rwakuru gi lwenje duto mag Nyasaye, mondo unyal tamo wuond mariek mag Satan.” Achiel kuom gi lwenje mag Nyasaye en rwako ‘ogudu mar warruok.’ (Efe. 6:10, 11, 17) Mondo wakwed wuond mariek mag Satan, onego wane ni warwako oguduno kendo siko kode kuomwa. Ogudu mar jalweny rito wiye. ‘Genowa mar warruok’—adiera ma wan-go ni singo mag Nyasaye e wi piny manyien majaber biro chopo—biro rito pachwa kuom miriambo mag Satan. (1 Thes. 5:8) Dwarore ni wami genono osiki ka liw kendo kotegno e pachwa, kokalo kuom bedo gi kinda mar puonjruok Ndiko.

Ayub nonano e bwo akwede mager mag Satan. Ayub ne nigi yie motegno kuom chier ma kata mana wach tho ne ok onyoso chunye ngang’. Kar mano, ne owacho ne Jehova niya: ‘Niluong nyinga eka naduoki wach. Chunyi noher tich mar lweti.’ (Ayub 14:15) Kata ka Ayub ne nyalo tho nikech chung’ne motegno, ne ogeno ni hera ma Nyasaye oherogo jotichne moluore, ne dhi miyo ochiergi koa kuom jomotho.

Mad wabed gi geno motegno kamano kuom Nyasaye madier. Jehova nyalo loyo gik maricho duto ma Satan koda joge nyalo kelonwa. Ng’e bende ni, Paulo singonwa kama: “Nyasaye en Jadier, kendo ok noyie mondo otemu moloyo tekreu; to e temruokno nomiugo bende yo mar wuok, mondo unyal dhilie.”—1 Kor. 10:13.

[Picha manie ite mar 20]

Jehova mor ahinya gi tich mitiyone kichung’ motegno

[Picha manie ite mar 21]

Rwak ogudu mar warruok, kende osiki kuomi