“Nyasaye ne ni Kanye?”
“NASIKO APENJORA NI NYASAYE NE NI KANYE?”—Pope Benedict XVI nowacho wechego ka nolimo kama chon ne Jo-Nazi sandoe ji Auschwitz, Poland.
SAMA MASIRA MORO OTIMORE, BE ISEGAPENJORI NI, ‘NYASAYE NE NI KANYE?’ KATA, BE GIMORO MALIT OSETIMORE E NGIMANI MA IPENJORI KA BE NYASAYE DEWI?
Samoro iwinjo mana kaka Sheila ma odak e piny Amerka ne winjo. Ne odongo e ot ma ji ne oheroe weche Nyasaye. Owacho niya: “Ne achako hero Nyasaye ka ne pod atin nikech en e Jachuechwa. Kata kamano, ne ok awinj ka an machiegni ahinya kode. Naparo ni ong’iya to mana ka en gi kuma bor. Nang’eyo ni Nyasaye ok osin koda, kata kamano, pod naneno ni ok odewa.” Ang’o momiyo Sheila ne nigi kiawa ka be Nyasaye dewe? Owacho niya: “Joodwa ne yudoga masiche mang’eny, kendo ne nenore ka gima Nyasaye ne ok dewwa kata matin.”
Mana kaka Sheila, samoro in be ing’eyo ang’eya ni Nyasaye nitie, en mana ni ok in gadier ka be odewi. Nitie kinde ma jatich Nyasaye ma ne iluongo ni Ayub bende ne nigi kiawa ma kamano kata obedo ni nong’eyo ni Nyasaye nigi teko kod rieko. (Ayub 2:3; 9:4) Ka ne masiche olwore koni gi koni ma kata kama osoye wiye onge, ne openjo Nyasaye niya: ‘Ere gimomiyo ipando wang’i, kendo paro ni an jasiki?’—Ayub 13:24.
Ang’o ma Muma wacho? Be onego waket ketho kuom Nyasaye sama chandruok moro oyudowa? Be nitie gimoro amora ma nyiso ni Nyasaye dewo ji duto kendo ni odewowa ng’ato ka ng’ato? Be ng’ato ka ng’ato kuomwa nyalo bedo gadier ni Nyasaye nene, ong’eyo gik mokale, onenone lit, kendo okonye sama en gi chandruok?
E sula ma luwogi, wabiro neno kaka chuech mag Nyasaye nyalo konyowa bedo gadier ni Nyasaye dewowa. (Jo-Rumi 1:20) Bende, wabiro neno kaka Muma nyisowa ni Nyasaye dewowa. Kaka ‘wamedo ng’eye’ kokalo kuom chuech kod somo Muma, e kaka wabiro medo bedo gadier ni odewowa.—1 Johana 2:3; 1 Petro 5:7.
