Ka po ni podi, to nyaka bed ni iseneno ka jomamoko nigi sigu e kindgi. E weche mag fwambo gi keyo, wanenoga ripode mang’eny ma nyiso kaka jomoko nigi sigu gi jowetegi nikech pien dendgi, kata nikech giterore gi chwo wetegi kata mon wetegi, kata nikech piny ma giae. Nikech mano, sirkande mang’eny temoga keto chike ma geng’o sigu ma kamago.

Yotga mondo ng’ama neno ni ji nigi sigu kode ochak bedo gi sigu gi jowetene bende. Ng’at ma kamano nyaloga chulo kuor, to mano biro mana jimbo sigu.

Nyalo bedo ni osegabuoni, osegajari, osegayanyi, kata osegabwog ngimani. Kata kamano, sigu to nyaloga miyo ji otim gik maricho moloyo mago, kuom ranyisi, sando jowetegi, ketho gigegi, goyogi, nindo kodgi gi thuon, negogi, to kata mana nego ji mang’eny e rumbi.

Gasedni biro dwoko penjo ma luwogi, kendo obiro konyowa ng’eyo kaka wanyalo loyo sigu:

• Ang’o momiyo piny opong’ gi sigu?

• Ang’o minyalo timo mondo kik ibed gi sigu gi ng’ato ang’ata?

• Be sigu chieng’ norum?