JOMOKO WACHO NI OOYO. Laktar moro nowacho ni tiyo gi weche manie Muma mondo otayi chal mana ka japuonj ma puonjo sayans kotiyo gi buk ma nyachon ma ne ogo higni mag 1920. Joma ok omiyo Muma luor samoro nyalo penjo ka be ng’ato nyalo tiyo gi buk ma oting’o chike mag loso kompyuta ma oti mondo otaye sama oloso kompyuta manyien. E yo machalo kamano, jomoko neno Muma kaka buk ma nyachon ahinya ma ok nyal konyo e yo moro amora.

En ang’o ma nyalo miyo ng’ato oti gi buk ma nyachon mondo otaye e piny ma sani olony ahinyani? E piny sani, nitie kuonde mang’eny ma ji nyalo yudee weche ma tayogi. Kuom ranyisi, nitie websait modhuro ma indike weche mathoth ma ji nyalo somo. Joma nigi lony e programbe mag TV wuoyoga e wi kido kod timbe dhano kaachiel gi weche mag ngima. Joma uso buge bende chiwoga ne ji buge ma nigi paro ma nyalo konyogi nyagore gi chandruoge mopogore opogore, to timo kamano miyo giyudo ohala maduong’.

Nikech sani weche yudore e yo mayot kendo mapiyo kamano, ang’o ma nyalo miyo ng’ato osom Muma ma en buk ma nondik higni 2,000 mokalo? Be joma ochayo Muma ni kare sama giwacho ni somo Muma mondo otayi chal achala gi somo bug sayans moro ma nyachon, kata somo buk ma oting’o chike mag loso kompyuta ma oti? Mano en paro mobam. En adier ni sayans osekelo dongruok moko, to be osemiyo ngima dhano obedo maber? Dhano pod nigi gombo mar ng’eyo gimomiyo ne ochwegi, gombo mar bedo mamor e ngima, gombo mar bedo gi winjruok maber gi joutegi, kod bedo gi osiepe mabeyo.

Kata obedo ni Muma en buk ma nyachon, okonyo dhano mondo ochop gombo ma okwan malo kanyogo. Muma wacho ni en buk moa kuom Jachuech. Muma bende nyalo konyowa e yore duto mag ngima kendo onyalo tiegowa mondo wanyagre gi tem moro amora. (2 Timotheo 3:16, 17) To moloyo, Muma nigi puonj ma konyo kinde duto! Muma owuon wacho niya: “Wach Nyasaye ngima.”—Jo-Hibrania 4:12.

Be gik ma Muma wachogo gin adier? Be Muma en buk ma nyachon, koso en buk ma oting’o paro kod puonj mabeyo ma nyalo konyowa e kindegi? Gasedni chiwo dwoko mag penjogo.