1. En bura mane ma Yesu biro ng’ado machiegnini?

 WADAK e kinde ma lokruoge madongo timore! Machiegnini, Yesu biro ng’ado ne ji duto ma ngima bura. Yesu nolero ne jopuonjrene gik ma ne dhi “nyiso” ni kinde mag ng’ado bura osechopo. Nonyisogi ranyisi ma ne dhi nyiso ni koro entie kendo ma ne dhi nyiso ni “giko mar ndalo okayo machiegni.” (Mat. 24:3) Gik ma Yesu nowachogo yudore e Mathayo sula mar 24 kod sula mar 25 kod e Mariko sula mar 13 kaachiel gi Luka sula mar 21.

2. Ang’o wa dwaro nono, to nono wechego biro konyowa nade?

² Yesu nochiwonwa siemo moko ma nyalo konyowa kotiyo gi ngero moko adek. Ngerogo gin ngero mar rombe gi diek, ngero mar nyiri ma silili mariek kod mofuwo, kod ngero mar talanta. Moro ka moro kuom ngerogo konyowa ng’eyo kaka ibiro ng’adne ng’ato ka ng’ato bura ka luwore gi timbene. Sama wanono ngerogo, wane ane puonj ma wanyalo yudo, kod kaka wanyalo tiyo gi puonjgo e ngimawa. We wachak gi ngero mar rombe gi diek.

NGERO MAR ROMBE GI DIEK

3. En karang’o ma Yesu biro ng’adone ji bura?

³ E ngero mar rombe gi diek, Yesu nowacho ni ibiro ng’ad ne ji bura ka luwore gi yo ma gibiro rwakogo wach maber kod ka be gibiro yie riwo lwedo Jokristo mowal. (Mat. 25:31-46) E kinde “masira maduong’,” Yesu biro ng’adone ji bura mana matin ka pok Har–​Magedon ochakore. (Mat. 24:21) Mana kaka jakwath pogo rombe gi diek, e kaka Yesu bende biro pogo joma riwo lwedo Jokristo mowal kod joma ok riwgi lwedo.

4. Ka luwore gi Isaya 11:3, 4, ang’o momiyo wanyalo bedo gadier ni Yesu biro ng’ado bura makare? (Ne picha bende.)

⁴ Weche mokor e Muma nyiso ni Yesu ma en jang’ad  bura ma Jehova oyiero, biro ng’ado bura e yo makare. (Som Isaya 11:3, 4.) Yesu nono adimba timbe ji, paro ma gin-go, kod wechegi, kendo onono kaka gitimone owetene mowal. (Mat. 12:36, 37; 25:40) Yesu biro ng’eyo joma noriwo lwedo Jokristo mowal kod tijegi. a Yo achiel maduong’ ma rombe mamoko riwogo Jokristo mowal lwedo en kokalo kuom tij lendo. Joma riwo owete Kristo lwedo e tijni ibiro ng’adnegi bura kaka “jo makare” kendo ibiro migi ngima ma “nyaka chieng’” e piny ka. (Mat. 25:46; Fwe. 7:16, 17) To mano doko mich makende ne joma biro siko komakore gi owete Kristo! Bende, ka gidhi nyime makore gi Jehova kod Yesu e kinde masira maduong’ kod bang’ masirano, nyingegi biro siko e “bug ngima.”—Fwe. 20:15.

5. En puonj mane ma wayudo e ngero mar rombe gi diek, to gin jomage ma bende yudo ber kuom puonjno?

⁵ Makri motegno gi Jehova kod Yesu. Ngero mar rombe gi diek wuoyo ahinya-ahinya e wi joma nigi geno mar dak e piny ka. Jogo nyiso ni gin gi yie kuom riwo lwedo owete Kristo e tij lendo kendo giluwo kaka itayogi gi grup matin mar owete mowal ma Yesu oyiero. (Mat. 24:45) Kata kamano, joma nigi geno mar dhi e polo bende onego oket e paro puonj ma wayudo e ngero mar rombe gi diek. Nikech ang’o? En nikech gin bende Yesu nono timbegi, gik ma giparo, kod wechegi. Omiyo, nyaka gitem matek mondo gimakre kod Yesu gi Jehova. Nitie ngero mamoko ariyo ma Yesu nogoyo mondo ochiwgo siem to ahinya-ahinya ne Jokristo mowal. Ngerogo yudore e Mathayo sula mar 25. We koro wanon ane ngero mar nyiri ma silili mariek kod mofuwo.

NGERO MAR NYIRI MA SILILI MARIEK KOD MOFUWO

6. Ere kaka nyiri abich ma silili nonyiso ni giriek? (Mathayo 25:6-10)

⁶ E ngero mar nyiri ma silili, Yesu nowuoyo e wi nyiri apar ma nodhi romo ne wuon kisera. (Mat. 25:1-4) Nyirigo duto ne dwaro ni gidhi gi wuon kisera en nyasine mar kend. Yesu nowacho ni abich kuomgi “ne riek,” to abich mamoko “nofuwo.” Nyiri mariek noikore kendo ne gisiko ka girito. Ne giikore rito wuon kisera nyaka sama nodhi chopoe, kata bed ni nodhi chopo chuny otieno. To mano e momiyo ne gipong’o teynigi gi mafuta mondo omigi ler gotieno. Ne giting’o nyaka mafuta moko e chupni mondo gibi gitigo ka dipo ni wuon kisera odeko. Mano nyiso kaka ne giikore kendo ne ok gidwar ni teynigi osim ka wuon kisera pok ochopo. (Som Mathayo 25:6-10.) Ka ne wuon kisera ochopo, nyiri mariek nodonjo kode e nyasine mar kend. Kamano bende, Jokristo mowal ma biro dhi nyime makore gi Yesu, ma en e wuon kisera nyaka chop obi, biro yudo pokgi e Pinyruodh polo. b (Fwe. 7:1-3) To ang’o ma notimore ne nyiri abich mamoko ma silili mofuwoka?

7. Ang’o ma notimore ne nyiri abich ma silili ma nofuwo, to nikech ang’o?

⁷ Mopogore gi nyiri abich ma silili mariek, nyiri mofuwoka noyud ka ok oikore  sama wuon kisera nochopo. Teynigi ne chiegni sim, kae to bende ne gionge mafuta ma ne ginyalo medo e teynigigo. Ka ne gifwenyo ni wuon kisera koro chiegni chopo, nochunogi wuok mondo gidhi ging’iew mafuta. Wuon kisera nobiro moyudo ka pok giduogo. Gie sechego, “nyiri ma noseikore nodonjo kode e nyasi mar kend, kae to ne olor dhoot.” (Mat. 25:10) Bang’e, ka nyiri abich mofuwoka noduogo kendo kwayo mondo oywanegi, wuon kisera nonyisogi kama: “Ok ang’eyou.” (Mat. 25:11, 12) Nyirigo ne ok oikore rito wuon kisera nyaka sama nodhi biroe. Ang’o ma Jokristo mowal nyalo puonjore kuom ngerono?

8-9. Ang’o ma Jokristo mowal nyalo puonjore e ngero mar nyiri apar ma silili? (Ne picha bende.)

⁸ Ikri kendo idhi nyime rito. Yesu ne ok tem wacho ni nitie grube ariyo mag Jokristo mowal ma achiel ne dhi siko ka rito kendo koikore nyaka giko mar ndalo, to machielo ne idhi yud ka ok oikore. Kar mano, notemo mana lero gima ne nyalo timore ne Jokristo mowal ka ok giikore nano nyaka giko. Mano ne dhi miyo kik giyud pokgi. (Joh. 14:3, 4) Mano en wach monego okaw mapek! Bed ni wan gi geno mar dhi e polo kata mar dak e piny ka, onego wakaw mapek siem ma wayudo e ngero mar nyiri apar ma silili. Waduto onego wasik ka waneno kendo ka waikore nano nyaka giko.—Mat. 24:13.

⁹ Bang’ goyo ngero ma wuoyo e wi nyiri apar ma silili ma jiwo gimomiyo dwarore ni wasik ka waikore kendo ka waneno, Yesu nogoyo ngero mar talanta. Ngerono jiwo gimomiyo dwarore ni wabed jokinda.

NGERO MAR TALANTA

10. Ere kaka wasumbni ariyo nonyiso ni ne gimakore gi ruodhgi? (Mathayo 25:19-23)

¹⁰ E ngero mar talanta, Yesu nowuoyo e wi wasumbni ariyo ma nomakore gi  ruodhgi, kod achiel ma ne ok omakore gi ruodhe. (Mat. 25:14-18) Wasumbni ariyo nonyiso ni gimakore gi ruodhgi kuom tiyo matek mondo giyud ohala e wi mwandu ma nomigi. Ka ne ruodh wasumbnigo ne pok owuok, nomiyogi talanta ma ne gin pesa mang’eny ahinya. Wasumbni ariyogo ne gin jokinda kendo ne gitiyo maber gi pesa ma nomigi. Mano nomiyo giyudo ohala ma romo nade? Ka ruodhgi noduogo, noyudo ka giloso ohala marom gi pesa ma nomigi. Ruodhgi nopwoyogi kendo nonyisogi kama: ‘Donjuru e mor mar ruodhu.’ (Som Mathayo 25:19-23.) To nade misumba mar adek? Ang’o ma notimo gi pesa ma ruodhe nomiye?

11. Misumba ma “jasamwoyo” notimo ang’o gi pesa ma nomiye, to mano nomiyo ruodhe otimone ang’o?

¹¹ Misumba mar adek ma nomi talanta achiel ne “jasamwoyo.” Ruodhe nogeno ni nodhi tiyo gi talanta ma nomiye e yo maber. Kar mano, noyikogi e lowo. Ka ne ruodhe oduogo, onge ohala moro amora ma nonyalo miye. Misumbano ne ok nigi paro mowinjore. Kar kwayo ng’wono nikech ne ok otimo ohala gi pesa ma nomiye, nowacho ni ruodhe en “ng’at ma chuno gik moko.” Mano nomiyo ruodhe ok obedo mamor kode. E wi mano, nomaye talanta ma nosemiye kendo noriembe e ode.—Mat. 25:24, 26-30.

12. Wasumbni ariyo ma nomakore gi ruodhgi ochung’ ne ng’a e kindewagi?

¹² Wasumbni ariyo ma nomakore gi ruodhgi ochung’ ne Jokristo mowal momakore gi Jehova kod Yesu. Yesu ma en ruodhgi rwakogi mondo ‘gidonj e mor mar ruodhgi.’ Giyudo pokgi ma en chier mokwongo. (Mat. 25:21, 23; Fwe. 20:5b) To komachielo, ranyisi mar misumba ma jasamwoyo miyo Jokristo mowal siem. E yo mane?

13-14. Ang’o ma Jokristo mowal nyalo puonjore e ngero mar talanta? (Ne picha bende.)

¹³ Bed jakinda. Yesu ne ok tem wacho ni Jokristo mowal ne dhi bedo josamwoyo e ngero mar nyiri apar ma silili kod mar  talanta. Kar mano, notemo mana lero gima ne nyalo timorenegi ka ok gibedo jokinda e tijgi. Mano ne dhi miyo kik gichung’ motegno kaka joma “Nyasaye ne oluongo kendo yiero,” kendo ne dhi miyo kik gidonj e Pinyruodh Nyasaye.—2 Pet. 1:10.

¹⁴ Ngero ma Yesu nogoyo mar nyiri apar ma silili kod mar talanta nyiso maler ni Jokristo mowal nyaka sik ka giikore, ka girito, kendo gibed jokinda. Kata kamano, be nitie gima chielo ma Yesu nowacho ma en siem ne Jokristo mowal? Ee, nitie! Weche ma Yesu nowacho e Mathayo 24:40, 41 bende otudore gi bura mogik mibiro ng’ad ne Jokristo mowal.

EN NG’ANO MIBIRO ‘KAW’?

15-16. Ere kaka Mathayo 24:40, 41 lero gimomiyo dwarore ni Jokristo mowal osik ka gineno?

¹⁵ Ka Yesu pok nogoyo ngero adek ma wasewuoyoego, nolero bura mogik ma nidhi ng’ad ne Jokristo mowal ma Nyasaye ne dhi yiego. Nowuoyo e wi chwo ariyo ma ne nie puodho kod mon ariyo ma ne rego. Chwogo ne tiyo tich machal kendo mon-go bende ne tiyo tich machal. Kata kamano, Yesu nowacho ni ‘achiel nidhi kaw to machielo nidhi we.’ (Som Mathayo 24:40, 41.) Kae to nonyiso jolupne kama: “Sikuru ka uneno nikech ok ung’eyo ni en chieng’ mane ma Ruodhu biroe.” (Mat. 24:42) Yesu nowacho weche machal kamago bang’ goyo ngero mar nyiri apar ma silili. (Mat. 25:13) Be dibed ni nitie kaka wechego otudore? Nenore ni en kamano. Mana Jokristo momakore gi ruodhgi ma en Yesu e ma ibiro ‘kaw,’ kendo gibiro donjo e Pinyruodhe mar polo.—Joh. 14:3.

¹⁶ Sik kineno. Jakristo moro amora mowal ma ok osiko ka neno ok bi chok kanyachiel gi ‘joma oyier.’ (Mat. 24:31) Bende, bed ni gin gi geno mane, jotich Nyasaye duto dwarore ni owinj siem ma Yesu nochiwo kuom siko ka gineno kendo ka gimakore kode.

17. Ang’o momiyo ok en gima onego ochandwa ka Jehova ong’ado mar yiero Jokristo mowal gi rohone maler kata e kindewagi?

¹⁷ Waseng’eyo Jehova maber, to mano e momiyo wan gadier gi yo mong’adogo bura. Ok en gima onego ochandwa ka Jehova pod dhi nyime yiero Jokristo mowal kata e kindewagi. c Wanyalo paro ngero ma Yesu nogoyo e wi jotich ma nobiro tiyo e puoth mzabibu, ma moko nochako tich gokinyi to moko nochako tich bang’e godhiambo. (Mat. 20:1-16) Joma nochako tich gokinyi e puoth mzabibu kod joma nochako bang’e, noyudo chudo ma rom. Kamano bende, bed ni Jokristo mowal noyier karang’o, pod ibiro migi pok margi, tek mana ni Jehova ong’adonegi bura ni ne gimakore kode.

WINJ SIEM

18-19. Ang’o ma wasepuonjore e ngeche ma wasenonogo?

¹⁸ Ang’o ma wasepuonjore? Ne jogo ma nigi geno mar dak e piny ka, ngero mar rombe gi diek lero gimomiyo dwarore ni gisik ka gimakore gi Jehova sani kod e kinde masira maduong’. E kindego, Yesu biro ng’adone ji duto momakore kode bura ni gin joma owinjore yudo “ngima ma nyaka chieng’.”—Mat. 25:46.

¹⁹ Bende, wasenono ngero moko ariyo ma chiwo siem ne Jokristo mowal.  E ngero ma Yesu nogoyo mar nyiri apar ma silili, abich kuomgi ne riek, to abich nofuwo. Abich ma ne riek noikore maber kendo ne gisiko ka girito wuon kisera nyaka sama nobiroe. Kata kamano, nyiri abich ma nofuwo ne ok iokore. Kuom mano, wuon kisera notamore rwakogi e nyasine mar kend. Wan bende nyaka wabed moikore kendo wasik ka warito nyaka e kinde ma Yesu biro tiekoe piny marachni. Bende, e ngero ma Yesu nogoyo mar talanta, nowuoyo e wi jotich ma gin jokinda kendo ma nomakore gi ruodhgi. Ne gitiyo matek kendo timo ohala gi pesa ma ne ruodhgi omiyogi, to mano nomiyo ruodhgi obedo mamor kodgi. Kata kamano, jatich ma ne jasamwoyo to ruodhe noriembo. Mano puonjowa ang’o? Dwarore ni wasik ka wadich e tij Jehova nyaka giko. To mogik, wasepuonjore ni Jokristo mowal nyaka sik ka gineno mondo e ka Yesu obi ‘okawgi’ kendo miyogi pokgi e polo. Girito gi siso kinde mibiro ‘chokgie kanyachiel’ mondo gidhi gidag gi Yesu e polo. Bang’ lweny mar Har–​Magedon, gibiro riwore gi Yesu ma en wuon kisera e kend mar nyarombo.—2 The. 2:1; Fwe. 19:9.

20. Ang’o ma Jehova biro timo ne joma winjo siem momiyowa?

²⁰ En adier ni kinde mag ng’ado bura chiegni, kata kamano, ok onego wabed ma luor. Ka wasiko ka wamakore gi Jehova Wuonwa ma jahera, to obiro miyowa “teko mokalo ma pile” kendo wabiro ‘tony ma wachung’ e nyim wuod dhano.’ (2 Kor. 4:7; Luka 21:36) Bed ni wan gi geno mar dhi e polo kata mar dak e piny ka, wabiro moro Jehova Wuonwa ka wawinjo siem ma waseyudo e ngeche ma wasenonogo. Kuom mano, ibiro ‘ndik nyingewa e bug’ ngima nikech ng’wono mogundho mar Jehova Nyasaye.—Dan. 12:1; Fwe. 3:5.