Be isegayudo ka ok inyal paro gik ma eka ia puonjori? Mano gima timorenwaga waduto kinde ka kinde. Ang’o ma nyalo konyi? Nwo weche madongo.

Sama ipuonjori, kinde ka kinde, chung’ matin mondo inon puonj madongo. Ne ane kaka jaote Paulo nokonyo joma nondikonegi barua mondo opar weche madongo. Nowachonegi kama: “Koro wach maduong’. . . e ma.” (Hib. 8:1) Wechego ne dhi konyogi mondo giwinj tiend wach maduong’ ma nowuoye kod kaka wachno notudore gi wechene mamoko e baruano.

Inyaloga keto thuolo moro tenge, kuom ranyisi, dakika 10 kama mondo ipar matut e wi gik misepuonjori. Ka ok inyal parogi, inyalo ng’iyo wiye matindo kata sentens moko ma nigi puonj madongo, to ahinya-ahinya, sentens ma niga e paragraf mokwongo mondo okonyi paro puonjgo. Ka ipuonjri wach moro manyien, tem tiyo gi wecheni iwuon e leregi. Timo kamano biro konyi paro puonj madongo kendo ibiro medo neno kaka inyalo tiyo kodgi e ngimani.