Nitie kinde ma ne wasegawacho ni kamano e kaka ne otimore. Ne wawacho kamano nikech weche manie ndiko mar Jo-Hibrania 12:16. Ndikono wacho ni Esau ne “ok kaw gik mowal e yo mapek kaka dwarore” kendo “ne owito ratirone mar bedo kayo [ne Jakobo] kane owile gi chiemo ma nyadichiel.” Mano ne nyalo nyiso ni ka ne Jakobo oyudo ‘ratiro mar bedo kayo,’ ne oyudo thuolo bende mar bedo kwar Mesia.​—Mat. 1:2, 16; Luka 3:23, 34.

Kata kamano, nono weche moko manie Muma nyiso ni ne ok ochuno ni ng’ato nyaka bed wuoyi ma kayo e ka obed kwar Mesia. Ne ane weche moko ma siro wachno:

Reuben e ma ne en wuod Jakobo (Israel) ma kayo ma nonyuolo gi chiege ma Lea. Higni moko bang’e, wuoyi ma kayo ma Jakobo nonyuolo gi Rahel chiege ma nohero ahinya ne en Josef. Ka ne Reuben otimo tim anjawo, ratiro mar bedo wuoyi ma kayo ne omi Josef. (Cha. 29:31-35; 30:22-25; 35:22-26; 49:22-26; 1 We. 5:1, 2) Kata kamano, Mesia ne ok owuok e anyuola mar Reuben kata Josef. Mesia ne owuok e anyuola mar Juda ma ne en  wuoyi mar ang’wen ma Jakobo nonyuolo gi Lea.​—Cha. 49:10.

Luka 3:32 oting’o nyinge chwo moko abich ma nobedo kwere Mesia. Nenore ni ng’ato ka ng’ato kuomgi ne en wuoyi ma kayo. Boaz nonyuolo Obed, to Obed nonyuolo Jesse.​—Ruth 4:17, 20-22; 1 We. 2:10-12.

Kata kamano, Daudi wuod Jesse ne ok en wuoyi ma kayo. Ne en wuoyi mogik e kind yawuoyi aboro. To Mesia ne owuok e anyuola mar Daudi. (1 Sa. 16:10, 11; 17:12; Mat. 1:5, 6) Solomon bende nobedo kwar Mesia kata obedo ni ne ok en wuod Daudi ma kayo.​—2 Sa. 3:2-5.

Mano ok nyis ni koro bedo wuoyi ma kayo ne ok en gima lich. Wuoyi ma kayo nomi luor makende kendo en e ma ne obedo wi ot ka wuon-gi onge. En bende e ma ne oyudo pok ma nyadiriyo sama ne ipogo mwandu mar joodgi.​—Cha. 43:33; Rap. 21:17; Jos. 17:1.

Kata kamano, ratiro mar bedo wuoyi ma kayo ne inyalo mi ng’at machielo. Ibrahim noriembo Ishmael ma omiyo Isaka ratiro mar bedo wuoyi ma kayo. Kendo mana kaka waseneno, ratiro mar bedo wuoyi ma kayo ne oma Reuben ma omi Josef.

We wasom ane kendo ndiko mar Jo-Hibrania 12:16 ma wacho niya: “Tang’uru mondo ng’ato kik bedie e kindu ma jaterruok, kata ng’ato ang’ata ma ok kaw gik mowal e yo mapek kaka dwarore, kaka Esau ma ne owito ratirone mar bedo kayo kane owile gi chiemo ma nyadichiel.” Ndikono temo wacho ang’o?

Jaote Paulo ne ok wuo e wi anyuola mar Mesia. Ne oyudo oa jiwo Jokristo ni ‘gilos ne tiendegi nderni moriere tir.’ Mano ne dhi miyo kik ‘gichwe ma ok giyudo ng’wono mogundho mar Nyasaye,’ ma en gima ne nyalo timorenegi kapo ni gidonjo e timbe mag terruok. (Hib. 12:12-16) Kapo ni ne ginyalo donjo e timbe ma kamago, ne ginyalo chalo gi Esau. Esau ne ‘ok okawo gik mowal e yo mapek kaka dwarore,’ omiyo notimo gombo mag ringruok ma ok odewo weche Nyasaye.

Esau nodak e kinde ma jotich Nyasaye moko machon ne pod ngima, kendo seche moko nonyalo gologa misengni. (Cha. 8:20, 21; 12:7, 8; Ayub 1:4, 5) To nikech ne ok ogeno weche Nyasaye, nolalo thuolo mabeyogo duto mana nikech chiemo ma nyadichiel. Nyalo bedo ni ne ok odwar ni chandruok ma ne okor ni ne dhi yudo koth Ibrahim oyude. (Cha. 15:13) Esau bende nonyiso ni ne ok ogeno weche Nyasaye ka ne okendo mon ariyo ma ne ok lam Jehova, ma bang’e nokelo ne jonyuolne lit mang’eny. (Cha. 26:34, 35) To mano kaka nopogore ahinya gi Jakobo ma ne okendo mana jatich Nyasaye!​—Cha. 28:6, 7; 29:10-12, 18.

Kuom mano, en paro mane monego wabedgo e wi anyuola mar Mesia bang’ neno wechego? En adier ni moko kuom kwere Yesu ne gin yawuoyi ma kayo, moko kuomgi to ne ok gin yawuoyi ma kayo. Jo-Yahudi nong’eyo wachno maler kendo ne giyiego, nikech ne giwacho ni Kristo ne dhi wuok e anyuola mar Daudi ma ne en wuod Jesse mogik.​—Mat. 22:42.