NE JOMA OKENDORE
2: Tiyo Kanyachiel
TIEND WACHNO
Ka dichwo gi dhako tiyo kanyachiel, to gibiro chalo gi jariemb ndege ma nigi jakonyne ma nyaka gitigo kanyachiel mondo e ka gichop kama gidhiye. Kendo gibiro nywako mondo gilo chandruoge ma giromogo, kar weyogi ne ng’ato achiel.
PUONJ MA MUMA CHIWO: “Ok gin ji ariyo kendo, to gin ringruok achiel.”—Mathayo 19:6.
“Kend ok en mar ng’at achiel. Dichwo gi dhako nyaka ti kanyachiel mondo e ka kendgi odhi maber.”—Christopher.
GIMOMIYO EN GIMA DUONG’
Sama chandruok oneno, dichwo gi dhako ma ok ti kanyachiel biro chako keto pachgi kuom ng’ama otimo marach, kar mondo gine kaka ginyalo loso wachno. Chwanyruok moko matindo tindo biro lokore ma bed chandruoge madongo e ngimagi.
“Tiyo kanyachiel en gima duong’ ahinya e kend. Ka po ni an gi jaoda ok watimga gik moko kanyachiel, wanyalo chalo mana ji ariyo modak e ot achiel, to ok joma okendore. To mano nyalo kelo chandruok kochopo sama koro onego wang’ad paro e wi wach moro maduong’.”—Alexandra.
GIMA INYALO TIMO
NONRI ANE
Be anenoga pesa ma atiyone kaka meka awuon?
Sama adwaro yueyo, be agomboga mana ni abed kenda?
Be ajabedoga mabor gi wede jaoda, kata bed ni en to ochiegni kodgi kendo oherogi?
WUOURU E WI PENJOGI
Gin ang’o ma watimoga kanyachiel?
Gin kuonde mage ma wanyalo timoe lokruok?
Gin okenge mage ma wanyalo kawo mondo wadhi nyime tiyo kanyachiel?
TEM TIMO KAMA
Tem ane paro ni utugo tennis. Kar keto jaodi otug komachielo, donge ber ka uduto utugo konchiel, to chandruoge mukedogo uketo komachielo?
Kar paro ni, ‘Ang’o ma onego atim mondo alochi?’ onego ipar ni, ‘Ang’o monego watim mondo walochi?’
“Kik iket pachi kuom ng’ama otimo marach kata maber. Mano ok e gima duong’ ma dilo winjruok kod kuwe monego ubedgo e kend maru.”—Ethan.
PUONJ MA MUMA CHIWO: “Kik ung’i mana gik ma kelonu ber un uwegi, to ung’i bende gik ma kelo ber ne jomamoko.”—Jo-Filipi 2:3, 4.
