Yesu kod jootene chiegni wuok e ot ma malo kama ne gitimoe nyasi mar Pasaka. Bang’ wuoyo kodgi ahinya kojiwogi, Yesu medo wachonegi kama: “Asewachonu wechegi mondo kik uchwanyru.” Ang’o momiyo ne dwarore ni osiemgi kamano chon-chon? Onyisogi niya: “Ji biro riembou ua e sunagogi. Kuom adier, ndalo biro ma ng’ato ang’ata monegou biro paro ni otiyo ne Nyasaye.”​—Johana 16:1, 2.

Mano en wach ma nyalo chando chuny jootego. Kata obedo ni Yesu nosewacho motelo ni piny ne dhi sin kodgi, pok ne owachonegiga achiel kachiel ni ne idhi neggi. Ang’o momiyo ne pok owachonegi kamano? Onyisogi kama: “Ok ne awachonugi e kar chakruok nimar ne an kodu.” (Johana 16:4) To sani koro onyisogi mano chon ka pok owuok moweyogi. Mano nyalo miyo kik gichwanyre bang’e.

Yesu dhi nyime wachonegi niya: “Awuok adhi ir Jal ma noora; to e ma pod onge kata ng’ato kuomu ma penja ni, ‘Idwaro dhi kanye?’” Motelo e odhiambo nogono, noyudo gisepenje kuma owuok mondo odhie. (Johana 13:36; 14:5; 16:5) To koro sani, nikech wach sand moa wachono, pachgi koro gedo mana kuom kuyo ma gibiro bedogo. Mano miyo ok gimed penje wach duong’ mobiro bedogo kod gima biro timore ne jogo ma lamo Nyasaye gadier. Yesu wachonegi kama: “Nikech asewachonu wechegi, lit osepong’o chunyu.”​—Johana 16:6.

Kae to Yesu leronegi niya: “Awuok adhi mondo un e ma uyud ber. Nikech ka ok adhi, jakonyno ok bi bironu; to ka adhi, abiro ore iru.” (Johana 16:7) Roho maler ma en kaka jakony nyalo mana biro kuom jopuonjre Yesu mana ka Yesu osetho modhi e polo. Kendo rohono nyalo bironegi kamoro amora ma joge nitiere e piny.

Roho malerno biro nyiso “piny ayanga tiend richo, gi tiend tim makare, kod tiend bura mar Nyasaye.” (Johana 16:8) Ee, bedo ni piny ne ok onyiso yie kuom Wuod Nyasaye biro nenore ayanga. Ka Yesu oidho e polo, mano biro nyiso ayanga ni en ng’at makare e wang’ Nyasaye, kendo biro nyiso gimomiyo Satan ma en “jaloch mar pinyni” owinjore oyud kum mar kethruok.​—Johana 16:11.

Yesu dhi nyime ka wacho kama: “Pod an gi gik mang’eny monego awachnu, to ok unyal winjo tiendgi gie sani.” Kinde mobiro oloe rohone kuom jolupne, rohono biro tayogi mi giwinj tiend “adiera duto,” kendo mano biro konyogi dak ka luwore gi adierano.​—Johana 16:12, 13.

Jootego dhier nono gi weche ma Yesu medo wachonegi niya: “Pod odong’ kinde matin to ok ubi nena kendo, to bende, bang’ kinde matin ubiro nena.” Gipenjore e kindgi ka gidwaro ng’eyo tiend wachno. To nikech Yesu fwenyo ni gidwaro penje wachno, oleronegi kama: “Adier, adier, awachonu ni, ubiro ywak kendo goyo nduru, to piny biro mor; unuwinj lit, to lit maru biro lokore mor.” (Johana 16:16, 20) Kiny ka oseneg Yesu godiechieng’, jotend din dhi bedo mamor, to jopuonjrene dhi kuyo. Kata kamano, bang’ ka osechier Yesu, kuyo mar jopuonjrego biro lokore mor lilo! Kendo morgino dhi medore ameda bang’ ka Yesu oseolonegi roho maler mar Nyasaye.

Ka Yesu pimo gima dhi timore ne jootene, otiyo gi ranyisi mar dhako ma muoch kayo kowachonegi niya: “Sama dhako nyuol, owinjo rem malit nikech sane osechopo, to ka osenyuolo nyathi, ok opar litno kendo nikech mor ma en-go ni osenyuolo ng’ato e piny. Yesu jiwo jootene kama: “Omiyo, sani un bende uwinjo lit; to  abiro nenou kendo. Bende, chunyu nobed mamor kendo onge ng’ato ma biro mayou moru.”​—Johana 16:21, 22.

Nyaka chop sani, jootego pok olemoga ka gitiyo gi nying Yesu. Omiyo, owachonegi kama: “E chieng’no, ubiro kwayo Wuora e nyinga.” Ang’o momiyo mano dwarore? Mano ok en nikech Wuoro dhi digni e dwoko kwayogi. Nimar kata Yesu wachonegi niya: “Wuora owuon oherou, nikech usehera . . . ni ne abiro tiyo e lo Nyasaye.”​—Johana 16:26, 27.

Nenore ni jootego wacho ni: “Mano miyo wang’eyo ni ne ia ir Nyasaye” nikech weche Yesu osejiwogi mi gibedo gi chir. Kinde okayo machiegni ma ibiro tem chir ma gin-gono, nimar Yesu lero gik ma ritogi nyime. Owachonegi kama: “Neuru! Sa biro kendo adier osechopo, ma ubiro ke ng’ato ka ng’ato nyaka e ode owuon, kendo unuweya kenda.” To pod osingonegi niya: “Asewachonu wechegi ni mondo kokalo kuoma ubed gi kuwe. E piny ubiro yudo masira, kata kamano beduru gi chir! Aseloyo piny.” (Johana 16:30-33) Mano ok nyis ni koro Yesu jwang’ogi. Ong’eyo ni jootego bende nyalo loyo piny mana kaka en bende oloyo piny. Ginyalo loyo piny ka gimakore motegno gi timo dwach Nyasaye kata bed ni Satan gi piny moteloeni temo yiegi e okang’ ma romo nade.