Jogo ma ne obatisi kaka Joneno mag Jehova to oweyo lendo ne ji, kendo samoro oseweyo tudore gi Jokristo wetegi, ok jwang’. Kar mano, watemo limogi mondo wajiwgi gichak tiyo ne Nyasaye kendo.

Ok wagol agola ng’ato oko mar kanyaklawa nikech otimo richo moro maduong’. Kata kamano, ka Janeno mosebatisi dhi nyime ketho chik mar Muma—kuom ranyisi, okwelo, kata otimo ne nyithindo marach e yor nindruok—kendo ok olokre, ibiro jwang’e kata gole oko mar kanyakla. Muma wacho maler niya: “Goluru ng’at marachno e kindu.”—1 Jo Korintho 5:13.

To nade dichwo mogol oko e kanyakla to jaode gi nyithinde pod gin Joneno mag Jehova? Lokruok bedoe e tudruok ma ne gin-go e yor lamo, kata kamano, pod gin joot. Kend margi koda tudruok mar hera me kindgi kaka joot pod dhi nyime.

Jogo mogol oko e kanyakla nyalo biro e chokruogewa. Ka gidwaro, jodong-kanyakla nyalo miyogi paro mowuok e Muma. Gima duong’ ma jodong-kanyakla dwaro chopo en konyo ng’ato ang’ata mogol e kanyakla otim dongruok mondo obed Janeno mar Jehova kendo. Kanyakla oikore rwako jogo mogol oko mar kanyakla to oweyo timbe maricho kendo onyiso gombo mar dak kaluwore gi chike mag Muma.