Joneno mag Jehova osebedo ka tiyo gi loko mang’eny sama gipuonjore Muma. Kata kamano, wahero tiyo gi Muma mar New World Translation of the Holy Scriptures e dhok moro amora moyudoree, nikech otiyo gi nying Nyasaye, oloke e yo makare, kendo oyot winjo.

•   Otiyo gi nying Nyasaye. Moko kuom joma goyo Muma ok mi Nyasaye duong’ nikech ok giti gi nyinge e Mumbegi. Kuom ranyisi, achiel kuom loko mag Muma oketo list mar ji 70 ma nokonyo e loso Mumano. Kata kamano, Muma achiel achielno onge gi nying Jehova Nyasaye, ma e wuon Muma!

   Muma mar New World Translation to noduoko nying Nyasaye kuonde duto ma ne entie e kitepe machon. Kata kamano, ok oried nyinge joma ne nie komiti ma ne okonyo e lose.

•   Oloke e yo makare. Loko mang’eny mag Muma ok ondiko ote manie Muma e yo makare kaka ne gin. Kuom ranyisi, achiel kuom lokogo oketo Mathayo 7:13 kama: “Donjuru e rangach madiny, nikech rangach ma tero ji e mach duong’ kendo donje yot.” Kata kamano, wach ma ne yudore e kitepe machon ne en “kethruok,” to ok “mach.” Nyalo bedo ni joloko noketo “mach” nikech ne giyie ni joricho ibiro wang’ e mach ma nyaka chieng’. Muma to ok riw lwedo wachno. Omiyo, Muma mar New World Translation oketo ndikono e yo makare niya: “Donjuru e rangach madiny, nikech rangano duong’, kendo yorno lach ma tero ji e kethruok.”

•   Oyot winjo. Loko maber onego obed ma wechene ni kare kendo ma yot winjo. Ne ane ranyisini. E ndiko mar Jo-Rumi 12:11, Paulo notiyo gi wach moro ma kolok aching’ to tiende en “yienyo gi roho.” Nikech wechego ok winjre mayot, Muma mar New World Translation oketo ndikono e yo mayot ahinya winjo. Owacho ni Jokristo onego obed gi ‘kinda ma liel ka mach nikech roho.’

 Waseneno ni Muma mar New World Translation tiyo gi nying Nyasaye, oloke e yo makare, kendo oyot winjo. Kata kamano, nitie gimoro machielo ma miyo obedo mopogore. Ok use. Mano osemiyo kata mana joma onge gi nyalo mar nyiewo Muma, nyalo yudo Muma kendo some e dhoggi giwegi.