Joneno mag Jehova e piny Bulgaria odich ahinya gi puonjo ji adiera e wi Nyasaye kod Wachne ma en Muma. Joneno mang’eny osedar mi gidhi e piny Bulgaria chakre higa mar 2000 mondo gikony Joneno man kono e tijno. Gin pek mage ma joma ochiwore dhi lendo e piny ma wendo romogago? Ang’o momiyo kinda ma ng’ato nyalo timo mondo odar odhi olend e piny machielo en gima ber? Ne ane paro moko ma owete gi nyiminewa ma nodar modhi e piny Bulgaria miyowa.

 Darren modak e piny England wacho kama: “Wasegomboga ahinya dar dhi e piny machielo kuma jolendo dwaroree ahinya. Bang’ ka ne wasekendore gi Dawn, ne wadar ma wadhi London mondo wadhi wakony e puonjo joma wacho dho Russia Muma. Nitie kinde ma ne wasechanoga mondo wadhi walend e piny machielo, kata kamano, mano ne pod ok nyalre nikech weche moko. Nochopo kama koro ne wawere gi wachno. Kata kamano, osiepwa moro nokonyowa ma waneno ni chalwa ne oselokore kendo ne wanyalo dar ma wadhi walend e piny machielo.” Darren gi Dawn nochako manyo piny ma jolendo ne dwaroree ahinya kendo ma ne nyalo bedonegi mayot dar mondo gidhiye. E higa mar 2011, ne gidar ma gidhi Bulgaria.

 Ranyisi mar joma nodar odhi lendo e piny machielo kod gueth mathoth ma ne giyudo osejiwo jomamoko ma ne onge gi gombono mondo gin bende gibed gi chenro ma kamano. Giada modak e piny Italy kaachiel gi Luca jaode wacho kama: “Naromo gi Joneno ma jokinda ma ne mor tiyo e pinje mag South America kod e pinje mag Afrika. Mor ma ne gin-go kaachiel gi gueth ma ne giyudo nojiwa ahinya. Mano nokonya ma atimo lokruoge moko, kendo naketo chenro mar tiyo ne Jehova e okang’ momedore.”

 Tomasz kod Veronika bende nodar oa Czech Republic ka gidhi Bulgaria e higa mar 2015 kaachiel gi nyithindgi ariyo ma gin Klara nyargi kod Mathias wuodgi. Ang’o ma nojiwogi mondo gidar? Tomasz dwoko kama: “Ne waparo matut kuom ranyisi mag jomamoko ma nosedar modhi lendo e piny machielo, moriwo nyaka wedewa moko, kod gueth ma ne giyudo ka ne gin kono. Mor ma ne gin-go ne omulo chunywa ahinya kendo ne wawuoyo e wi wachno kanyachiel kaka joot.” Sani Tomasz gi joode mor ahinya lendo e taon mar Montana e piny Bulgaria.

 Linda bende en Janeno machielo ma nodar modhi lendo e piny Bulgaria. Nowacho kama: “Higni moko chien, ne adhi Ecuador kendo ne aromo gi owete gi nyimine moko ma nodar dhi lendo e pinyno. Mano nomiyo achako paro ka be chieng’ moro an be nanyalo dhi lendo kuma jolendo dwaroree ahinya.” Owadwa Petteri kod Nadja jaode ma wuok Finland bende noparo matut kuom ranyisi mag joma ne odar mondo gidhi gilend kuonde ma jolendo dwaroree ahinya. Ne giwacho kama: “E kanyaklawa, ne nitiere jolendo moko molony ma nodar modhi lendo e pinje mamoko ma jolendo ne dwaroree ahinya. Kinde mang’eny, ne gijawuoyo e wi mor ma ne giyudo kuom higni ma ne gilendogo kuonde kaka mago. Ne giwacho ni mago e higni ma ne berie moloyo e ngimagi.”

 Bedo gi chenro en gima dwarore ahinya ka ng’ato dwaro dhi lendo e piny machielo. (Luka 14:28-30) Nyaminwa moro miluongo ni Nele ma a Belgium wacho kama: “Ka ne achako paro matut e wi wach dhi lendo e piny machielo, nalemo kendo ne atimo nonro e bugewa ma ne nigi sula motudore gi wachno. Ne aparo matut kuom weche ma nasomo e bugewago kendo neno gima nanyalo timo mondo abed moikore ne migawo ma kamano.”

 Kristian kod Irmina ma a Poland bende nodar modhi Bulgaria, kendo gisedak kuno kuom higni mokalo ochiko. Ne gifwenyo ni chenro ma ne gitimo mondo gidhi e grup ma ne wacho dho Bulgaria ma ne ni Poland nokonyogi ahinya. Owete gi nyimine ma ne ni e grubno nojiwogi mondo gipuonjre dhokno. Kristian gi Irmina nowacho kama: “Ne waneno kaka en gima ber chiwruok dhi konyo kuonde kaka mago, kendo neno kaka Jehova ritowa. Sama iwacho ne Jehova ni, ‘An ka! Ora!’ ibiro timo gik ma ne iparo ni ne ok inyal timo.”​—Isaya 6:8.

 Reto gi Cornelia ma wuok Switzerland nong’ado ni gibiro dak e ngima mayot mondo okonygi kungo pesa kendo bedo moikore ne dar. Ne giwacho kama: “Higa achiel ka pok ne wadar, ne wadhi Bulgaria kuom juma achiel mondo wadhi wane ane kaka pinyno chalo. Ka ne wan kuno, ne wawuoyo gi jomisonari moko molony ma nokonyowa gi paro moko mabeyo ahinya.” Reto kod Cornelia notiyo gi paro mabeyo ma nomigigo, kendo mano nokonyogi ma gidar gidhi e piny Bulgaria, kendo gisedak kuno kuom higni mokalo 20.

 Joma dar dhi lendo e pinje mamoko nyaka tim lokruok ka luwore gi chal mar alwora ma gidhiyeno, kendo nyaka giikre nyagore gi pek moko ma samoro ginyalo romogo. (Tich Joote 16:9, 10; 1 Jo-Korintho 9:19-23) Pek maduong’ ma owete gi nyimine mang’eny romogago en puonjruok dhok manyien. Luca ma ne wasewuoyo kuome motelo nowacho kama: “Wamorga ahinya golo paro moa e chunywa sama wan e chokruoge mag Jokristo. Kata kamano, kuom kinde, ne ok yotnwa iko kata mana sentens achiel kendo chiwo paro e dho Bulgaria! Ne wachalo mana nyithindo ma e ka puonjore wuoyo. Nyithi Bulgaria ne golo paro mabeyo moloyo mekwa.”

 Owadwa Ravil ma a Germany nowacho kama: “Puonjruok dho Bulgaria ne olaga ahinya. Kata kamano, naparo e chunya kama: ‘Ok ochuno ni ane weche e yo ma kamano.’ Kar neno pekgo kaka chandruoge, nang’ado ni abiro nenogi kaka yo ma atiyonego Jehova tich maler.”

 Linda ma bende ne wasewuoyo kuome motelo nowacho kama: “Ok aberga ahinya e puonjruok dhok manyien. Dho Bulgaria ok en dhok mayot puonjruok, kendo nyading’eny nagombo weyo puonjora dhokno. Ng’ato nyalo winjoga ka en kende ka ok onyal wuoyo gi ji kendo ok owinj gik ma ji wachone. Mondo ateg winjruokna gi Jehova, natimoga puonjruokna awuon gi dho Sweden. Gikone, owete gi nyimine nokonya kendo napuonjora dho Bulgaria.”

 Pek machielo en siko ka igombo dalau, wedeni, kod osiepeni ma ne iweyo chien. Nyaminwa Eva kod jaode miluongo ni Yannis ma nodar odhi Bulgaria nowacho kama: “Mokwongo okwongo, ne awinjoga ka an kenda. Mondo ne alo pekno, an gi jaoda ne wajawuoyo gi osiepewa kod joodwa ma ne waweyo dala, kendo loso osiepe manyien e piny Bulgaria ka.”

 Nitiere pek mamoko bende ma owete gi nyimine jaromogago. Robert kod Liana ma nowuok Switzerland ma gidhi Bulgaria nowacho kama: “Puonjruok dhok manyien kendo ng’iyo gi kit ngima ma kono ne ok yotnwa ahinya kendo ne ok waikore ne koyo mang’ich man kono.” Kata kamano, bedo gi paro mowinjore kendo siko ka gimor osekonyogi dhi nyime konyo e piny Bulgaria kuom higni 14 mosekalo.

 Nyaminwa Lilly jiwo ahinya dhi lendo kuma jolendo dwaroree moloyo. Owacho kama: “Nayudo thuolo ma jaber mar ng’eyo Jehova e yo ma ne ok anyal ng’eyego ka di po ni dasiko ka adak e pinywa. Abedoga modich ka akonyo jomamoko kendo mano konya tego winjruokna gi Jehova kendo miya mor madier.” Ravil jaode bende oyie gi wechego. Owacho kama: “Mae e ngima maberie moloyo, kendo onyalo miyo ng’ato thuolo makende mar ng’eyo Jokristo ma nigi kinda ma a e pinje mopogore opogore kendo ma nigi lony e puonjo adiera mag Muma. Asepuonjora gik mathoth kuomgi.”

 Nikech owete gi nyimine osechiwore lendo e okang’ malach, mano osemiyo oyal “wach maber mar Pinyruoth . . . e piny mangima.” (Mathayo 24:14) Joma nodhi Bulgaria oseneno kaka Jehova osechopo gombo ma ne gin-go mi gibedo gi nyak e chenro ma ne giketo nikech ne giyie chiwore.​—Zaburi 20:1-4.