Nyaminwa Gwen nowacho kaka nowinjo e chunye bang’ wuok England modhi e alwora ma jolendo dwaroree moloyo e piny Albania. a Nowacho niya: “Ne ok apar chon ni chieng’ moro nanyalo tiyo ne Jehova e okang’ malach kama.”

 Gwen en achiel kuom Joneno mathoth mosedar modhi e piny Albania mondo gikony e choko “gik mabeyo ahinya mowuok e ogendni.” (Hagai 2:7) Ang’o mosechwalo Jonenogo kawo okang’ ma kamano? Gin lokruoge mage ma ne gitimo mondo gichiwre kamano? Gin gueth mage ma giseyudo mosemiyo gidhi nyime chiwore kata obedo ni giromo gi pek moko?

 Jolendo duto mosedar modhi lendo e piny Albania, timoga kamano nikech wach moro achiel maduong’ ma en ni: Gihero Jehova kendo gidwaro konyo jomamoko mondo ong’eye.

 Ka ne pok gidar, ne gikawo okenge ma ne nyalo konyogi tiyo tij lendo e okang’ momedore, kendo mano nokonyogi nyagore gi chandruoge ma ne giromogo e piny ma wendo. Gwen wacho kama: “Nakwongo adhi e grup moro miwachoe dho Albania e pinywa. Kae to nadhi e chokruok moro maduong’ mar ndalo adek e piny Albania. Bang’e, nachako adok Albania kuom kinde moro mondo apuonjra dho Albania.”

 Ka ne Nyaminwa Manuela ma wuok Italy ochopo higni 23, nodar modhi e kanyakla machielo e pinygi ma ne nigi jolendo manok. Owacho kama: “Nabedo e kanyaklano kuom higni ang’wen. Kae to nafwenyo ni jolendo ne dwarore ahinya e piny Albania. Omiyo, nachano mondo adhi alend kuno kaka japainia kuom dweche moko.”

 Federica ne en jahigni abiriyo ka nowinjo kisomo ripot mar piny Albania e chokruok moro maduong’ mar ndalo adek. Owacho kama: “Owadwa ma ne somo ripodno, nowacho ni jolendo man Albania ne chakoga puonjruok Muma gi ji mang’eny, kendo ni thoth jogo ne biroga e chokruoge. Nachako nyiso jonyuolna ni an bende daher dhi lendo Albania. Wachno nomako dhogi! Kata kamano, wuonwa nonyisa niya: ‘Nyis Jehova wachno e lamo, to kamano en dwache, obiro winjo kwayonino.’ Mana bang’ dweche matin, nogwelwa kaka joot mondo wadhi walend e piny Albania.” Higni mang’eny koro osekalo, kendo sani Nyaminwa Federica osekendi gi Owadwa Orges. Sani gitiyo ne Nyasaye kuom thuologi duto e piny Albania.

 Bang’ ka Owadwa Gianpiero noseritaya, nodar kaachiel gi jaode Gloria ma gidhi Albania. Owacho kama: “Ne wapidho yawuotwa ka wan e piny Italy. Adek kuomgi nodar modhi tiyo ne Jehova e pinje ma jolendo dwaroree moloyo. Sula moro e Mnara wa Mlinzi ma ne wacho ni ‘Je, Unaweza Kuvuka na Kuingia Makedonia?’ nomulo chunywa ahinya. Ne wachano kaka ne wanyalo tiyo gi pesana mar ritaya mondo wadhi walend e piny Albania.”

 Joma dhi lendo kama jolendo dwaroree moloyo, onego ochan weche maber motelo kendo gitim lokruoge ma dwarore ka pok gidar. (Luka 14:28) Moko kuom gik monego gichan motelo en kaka gibiro yudo pesa ma gikonyorego. Ka ne pok Nyaminwa Gwen ma ne wasewuoyo kuome pod ni England, nokwongo odar modhi dak gi nyamin-gi mondo okan pesa moro. Sophia kod Christopher ma bende wuok England wacho kama: “Ne wauso mtokwa kod gigewa moko kaka kombe kod mesni. Ne wachano dhi dak Albania kuom higa achiel kama.” Kata kamano, ne gimor nikech ne gidak kuno kuom kinde mokalo higa achiel.

 Nitie jolendo moko ma dhiga Albania kuom dweche moko, kae to gidok e pinjegi mondo gidhi giti ka gimanyo pesa moro matin e ka gichak gidog Albania. Mano e gima Eliseo gi Miriam notimo. Eliseo wacho kama: “Miriam wuok kamoro e piny Italy ma welo ma limoga pinyno oheroga dhiye, kendo yotga yudo tije ma ng’ato nyalo timo kuno kuom kinde. Ne wadhiga kuno mondo wati kuom dweche adek, kae to wadok lendo Albania kuom dweche ochiko modong’ e higa. Ne watimo kamano kuom higni abich.”

 Bang’ ka joma dhiga lendo e alwora moro ma jolendo dwaroree osedar modhi e alworano, ginyalo romo gi pek moko. Kata kamano, paro ma joma odak e alworano miyogiga, nyalo konyogi nyagore gi pekgo e yo maber. Sophia ma nosewuo kuome motelo wacho kama: “E kinde koyo e piny Albania, udi bedoga mang’ich moloyo kaka ne gibedoga kama naponie. Nafwenyo kit lewni ma nonego arwaki e kindego mana kuom nono gik ma nyimine man Albania ne rwakoga.” Grzegorz kod jaode Sona noa e piny Poland mondo gidhi gilend e taon ma jaber miluongo ni Prizren e piny Kosovo. b Grzegorz wacho kama: “Jolendo manie alworano gin joma obolore, mang’won, kendo gihorega ahinya. Gisekonyowa ng’eyo dhoggi, kaachiel gi gik mamoko. Kuom ranyisi, ne gikonyowa ng’eyo dukni ma iusoe gik moko e nengo moyueyo, kendo ne ginyisowa kaka wanyalo ng’iewo gik moko e chirni manie gweng’.”

 Thoth Joneno ma dhiga lendo e alwora machielo yudoga ber kuom mako osiep gi Joneno modak e alworago, kendo gipuonjorega kit ngima Jonenogo. Sona wacho kama: “Aseneno kaka hero Jehova nyalo miyo ji otim lokruoge e ngimagi. Gisemiyo yiena omedo bedo motegno bang’ neno kaka ne giloko kit ngimagi mondo gidag ka luwore gi chike Jehova. Sama wan e kanyakla, wanenoga kaka giherowa ahinya, to mano miyo waneno ni wan bende wamako kamoro e riwruok mar oganda Jehova. Watiyo ne Jehova kanyachiel gi owetewa gi nyiminewa moherowa ahinya.” (Mariko 10:29, 30) Gloria bende wacho kama: “Ang’eyo nyimine mang’eny mosenano, kata obedo ni wedegi ma ok gin Joneno osebedo ka kwedogi matek. En gima jiwa ahinya neno kaka gihero Jehova.”

 Joma odar modhi lendo e alwora ma jolendo dwaroree ahinya puonjorega weche mang’eny ma samoro di ne ok gipuonjre ka di ne gisiko thuchegi. Kuom ranyisi, ginenoga kaka tuonruok e yo moro mondo giti ne Jehova e okang’ momedore, osekelonegi ber mang’eny. Stefano wacho kama: “Thothne, ka an e pinywa ajalendoga ne ji ka atiyo gi simbe manie dhoudi, kata kamano, Jo-Albania to ohero goyo mbaka malach, to ahinya-ahinya sama gimadho kahawa. Nikech an ng’at maluor luor, mokwongo-okwongo wiya ne kuotga, kendo ne ok ang’eyo kaka nanyalo chwalo mbaka. Kata kamano, bang’ kinde napuonjora dewo ji gadier kendo sani amor ahinya sama agoyo mbaka kodgi. Tinde among’o lendo ahinya.”

 Leah gi jaode William nodar ka giwuok Amerka ma gidhi e piny Albania. Leah wacho kama: “Lendo e alworani osemedo yawo pachwa, kendo konyowa ng’eyo kaka wanyalo dak e ngima mopogore opogore. Wasepuonjore gik mathoth e weche kaka rwako welo, nyiso luor, kod mako osiep gi ji mopogore opogore.” William bende wacho kama: “Thoth welo ma biroga Albania oheroga bayo e dho wedhe mag Albania ma becho. An awuon, aheroga twenyo gode mag Albania motimo kite. Kata kamano, joma odak e pinyni e momiyo ahero kae. Ng’eny joma nie alworawa mar lendo, osegaromo gi Joneno mana sama itimo kampen moko makende. Sama wadhi lendo e alwora kaka mago, wanyaloga wuoyo mana gi ji matin e odiechieng’ mangima.”

 Gima miyoga joma ochiworego mor moloyo en neno kaka ji rwako wach maber ma gilando. (1 Jo-Thesalonika 2:19, 20) Laura ma en nyaminwa ma ne pok okendi ka nodar modhi Albania, wacho kama: “Nalendo kuom kinde e alwora miluongo ni Fier. Kendo mana kuom higni ariyo gi nus ji 120 nobedo jolendo! Napuonjora gi ji 16 kuomgi!” Nyaminwa machielo miluongo ni Sandra wacho kama: “Nalendo ne miyo moro ma ne tiyo e chiro moro. Bang’ ka nosebatis miyono, nodar modok e gweng’gi. Ka ne atudora kode mogik, noyudo otayo jopuonjre 15 mag Muma!”

 Moko kuom joma nochiwore modar modhi Albania pod ni kuno, kendo gimor ahinya e tijgi mar lendo. Nitie sama gihumga ahinya ka gineno ka tijgi mar lendo okelo nyak bang’ kinde malach. (Eklesiastes 11:6) Christopher ma ne wasewuoyo kuome motelo wacho kama: “Naromo gi dichwo moro ma napuonjorago Muma ka nahango dhi Albania. Nawuoro ahinya ka nochako parona kaka mbaka ne chal chieng’ ma nahango romo kode. Sani ng’atno gi jaode gin Joneno mag Jehova mosebatisi.” Federica ma bende ne wasewuoyo kuome motelo wacho kama: “E kanyakla moro, nyaminwa moro nobiro ira mopenja ka be anyalo pare. Nonyisa ni nalendone higni ochiko mokalo. Bang’ kinde, nadar ma dhi e taon machielo, en to nodhi nyime puonjore Muma motimo dongruok kendo nobatise. Naparoga ni onge nyak moro amora ma ne wayudo ka ne ahango dhi Albania, kare ne ok en kamano!”

 Owete gi nyimine mosedar modhi Albania kata Kosovo mor ahinya sama gineno kaka Jehova oseguedho kindagi e tijgi mar lendo. Eliseo mosedak Albania kuom higni mang’eny, wacho kama: “Kaka dhano samoro waparoga ni wanyalo bedo mamor ka wageno gik ma pinyni chiwo, to mano en miriambo. Puonj mag Jehova e ma miyowa ngima maber kod mor madier. Tiyo ne Jehova e alwora ma jolendo dwaroree moloyo konyaga paro wachno kinde duto. Aneno ni an ng’at mogen. An gi osiepe madier ma bende dwachgi chalo mana gi dwacha.” Sandra bende wacho kama: “Ka nadar ma dhi e alwora ma jolendo dwaroree moloyo, naneno ni Jehova e ma nomiya thuolo mar timo gima nasegombo timo kuom kinde malach, tiende ni bedo jamisonari. Pok aywagoga ang’e nikech nadar ma adhi Albania. Kinde duto amorga.”