Giwuotho e Dier Nam Mondo Gilend
Ji ma dirom 300 odak e chulni matindo tindo mong’ere ni Halligen e nam moro miluongo ni North Sea ma yudore Schleswig-Holstein e piny Germany. Ere kaka Joneno mag Jehova chopo ne joma odak e chulnigo mondo gilandnegi wach maber?—Mathayo 24:14.
Jonenogo seche moko tiyoga gi yiedhi mondo gikwang’go nyaka e moko kuom chulnigo. Kata kamano, Joneno moko to wuothoga kilomita ma dirom 5 kama e dier nam mondo eka gichop e chulnigo. Mano nyalore nade?
Gikiyo Sama Pi Manie Nam Odok Piny
Gima konyogi ahinya en sama pi manie nam odok piny. Kawoga seche ma dirom auchiel mondo pi manie nam mar North Sea obi malo kata odog piny gi mita adek e chulni mag Halligen. Sama pi manie nam osedok piny, dier nam dong’ ma onge pi, kendo mano miyo Joneno nyalo chopo e adek kuom chulnigo ka giwuotho.
Chopo e chulnigo kawo seche adi? Dichwo moro miluongo ni Ulrich ma tayo jowuoth e chulnigo wacho niya: “Nyalo kawo seche ariyo kama mondo eka ng’ato ochop e achiel kuom chulni mag Halligen. Kinde mang’eny, wawuothoga ka wadhi e chulnigo. Ma e yo mayot ahinya mar ng’ado dier nam. E kinde ma piny ng’ich warwakoga boots.”
Alworani en kama opogore ahinya kendo onyalo bwogo ng’ato. Ulrich wacho niya: “Ka in e alworani, inyalo paro mana ni in e planet moro nono.” Omedo wacho ni, “Sama pi odok piny, kuonde moko e dier nam timo chuodho, moko nigi lwendni, kendo kuonde moko otwi lum. Bende, inyalo neno kit winy mopogore opogore kod le mamoko kaka okela.” Kinde ka kinde, jolendo ng’adoga aoche matindo tindo ma bedoga sama pi odok piny miluongo ni Priele e dho German.
Joma wuothoga romoga gi pek mang’eny. Ulrich wacho niya: “Ka ok itang’, to inyalo lal e yo mayot, to moloyo e kinde ma nam otimo ang’weng’o. Watiyoga gi kompas kod GPS device mondo otawa e wuoth, kendo mano konyowa rito sa kik pi yudwa ka pod wan e dier nam.”
Joneno ma lendo e achiel kuom chulni matindo tindo mag Halligen
Be nitie gueth ma giyudoga? Ulrich lero sigand dichwo moro ma jahigni 90 gi wiye ma somoga gasedewa mag Ohinga mar Jarito kod Amkeni! Owacho niya: “Chieng’ moro ne ok walimo jaduong’no nikech ne wan gi thuolo matin ahinya. Ka pok wawuok, jaduong’no nolawowa gi ndiga ma owachonwa niya: ‘To ere Ohingana?’ Ne wamor ahinya, kendo ne wamiye gaset.”
Samoro Inyalo Hero Magi Bende
OHINGA MAR JARITO
Ang’o Momiyo Joneno mag Jehova Landoga Wach Nyasaye?
Nitie weche adek madongo ma miyo walendoga e piny mangima.
TIJWA MAR YALO
Gwenge mag Europe gi North America Matek Chopoe
Kata bed ni giromo gi pek moko, Joneno mag Jehova tiyo gi thuologi mang’eny mondo gichop kendo puonjo ji Muma e alwora ma chope tek.
OHINGA MAR JARITO—GOCHO MAR PUONJRUOK
Ne Gichiwore Giwegi Maonge Achune e Piny Norway
How did an unexpected question lead a family to move where there is a greater need for publishers?