Bulongolodi budi butangila malu a makanda a mubidi pa buloba bujima (OMS) budi buleja ne: “Malu adibu benzela bantu bakaji ne tshikisu mmatangalake pa buloba bujima, mmenze anu bu tshipupu tshia disama tshidi tshilomba bua kutshijikija ne lukasa luonso.” Bulongolodi ebu budi butshinka ne: bia pa lukama 30 “bia bantu bakaji bonso badi mu mabaka, mbabakengeshe anyi mbabangate ne tshikisu” kudi babayabu. Luapolo lua bulongolodi bua matunga masanga (ONU) ludi lutshinka palu ne: mu bidimu bishale ebi, mbashipe bantu bakaji 137 pa buloba bujima kudi babayabu anyi bena mu mêku abu bakuabu. a

 Badi mua kutshinka bungi bua bantu badibu bakengesha mu mabaka abu, kadi kabena mua kuamba ntatu mikole idi nayi bantu abu anyi mushindu udibu bumvua to.

 Mbakuenzelaku malu ne tshikisu mu dibaka anyi? Peshi udi mumanye muntu udibu benzele nanku? Biobi ne: mbakuenzelawu anyi udi mumanye muntu udibu benzele nanku, mona mibelu ya mu Bible idi mua kukuambuluisha eyi:

  Bobu bakukengesha mu dibaka, ki ntshilema tshiebe to

  Diambuluisha didiku

  Kuena nkayebe to

  Dikengeshangana mu dibaka nedijike

  Muudi mua kuambuluisha muntu udibu bakengesha mu dibaka

 Tshidi Bible wamba: “Yonso wa kutudi neabadile Nzambi malu ende nkayende.”​—Lomo 14:12.

 Manya ne: Muntu udi ukukengesha neambule bujitu bua bienzedi biende.

 Muena dibaka nebe yeye ukuela tshilumbu pambidi bua mudiye ukukengesha, yeye ke udi mu tshilema. Ki mbimpe kukengesha bantu bakaji badi mu mabaka, kadi bidi bikengela kubananga.​—Kolosayi 3:19.

 Imue misangu muntu udi mua kuikala wenzela bakuabu malu ne tshikisu bualu udi usama mutu, anyi bualu mmukolele muaba uvua bantu bakengeshangana, peshi udi mua kuikala ukuatshika maluvu. Nansha nanku, neabadile Nzambi malu bua mudiye ubakengesha. Udi ne bujitu bua kuenza tshidi tshikengela bua kushintulula bienzedi biende.

 Tshidi Bible wamba: “Malu adi enda bimpe mu bungi bua bafidi ba ngenyi.”​—Nsumuinu 15:22.

 Manya ne: Bakuabu badi mua kukuambuluisha wewe udimona kuyi mu bukubi anyi kuyi mumanye tshia kuenza to.

 Bua tshinyi mbimpe bakuabu bakuambuluishe? Bualu dikengeshibua mu dibaka nnsombelu mukole. Pamuapa bidi mua kukukolela bua kusungula tshidi tshikengela kuenza, bualu kuena mumanye malu adi ne mushinga wa bungi ku adi alonda aa:

•   Bukubi buebe

•   Tshidi tshitambe buimpe bua bana bebe

•   Lutatu lua makuta

•   Kunanga muena dibaka nebe

•   Dijinga dia kulama malanda ebe ne muena dibaka nebe yeye mushintulule bienzedi biende

 Mu kuamba kuimpe, udi mua kupanga tshia kuenza bualu nsombelu mmukupite makanda. Nnganyi uudi mua kulomba diambuluisha?

 Mulunda wa kueyemena anyi muena mu dîku udi mua kukupesha buludiki ne kukukolesha. Nunku nebikuambuluishe bikole wewe muambile muntu udi ukutabalela.

 Nimero ya telefone itu bantu badibu bakengesha mu dibaka babikila idi mua kukuambuluisha pa lukasa. Bantu badi ku telefone idi ne nimero eyi, badi mua kukuleja tshia kuenza bua wewe kudikuba. Muena dibaka nebe yeye mumanye tshilema tshiende ne musue kushintuluka ne muoyo mujima, bantu abu badi mua kumuleja malu a kumpala a yeye kuenza bua kushintuluka.

 Mishindu mikuabu ya diambuluishangana ne lukasa idi payi mua kukuambuluisha paudi mu njiwu. Idi mua kukutuangaja ne badoktere, baminganga, anyi bamanyi bakuabu bapiluke.

 Tshidi Bible wamba: “Yehowa b udi pabuipi ne badi ne muoyo musunsuke; udi upandisha badi bazajibue mu lungenyi luabu.”​—Misambu 34:18.

 Manya ne: Nzambi mmulaye bua kukuambuluisha.

 Yehowa udi ukutabalela bikole. (1 Petelo 5:7) Mmumanye muudi wela meji mu muoyo webe ne mmumanye kabidi majinga ebe onso. Udi mua kukukolesha ku diambuluisha dia Bible Dîyi diende. Mmusue bua wikale umusambila. Nunku paudi usambila, mulomba bua akupeshe meji ne bukole buudi nabu dijinga bua kutantamena nsombelu webe.​—Yeshaya 41:10.

 Tshidi Bible wamba: “Nebasombe, muntu ne muntu muinshi mua muonji wende wa tumuma tua mvinyo ne muinshi mua mutshi wende wa mfigi, ne muntu kakubatshinyisha.”​—Mika 4:4.

 Manya ne: Bible udi ulaya ne: mu matuku makese kumpala eku dîku nedikale muaba wa ditalala wikala muntu yonso mua kusombela.

 Yehowa Nzambi mmumanye tshikalaye mua kuenza bua kujikija malu mabi onso. Bible mmulaye ne: “Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.” (Buakabuluibua 21:4) Tshikondo atshi, katuakuvuluka malu mabi nansha, kadi anu malu mimpe ke atuavuluka. (Yeshaya 65:17) Eu ke nsombelu wa ditalala udi Bible mulaye, uwikala nende mu matuku atshilualua!