Tshikondo kampanda, Yezu uvua “dishiya dia Yadene” muaba uvuabu babikila ne: Peleya. (Yone 10:40) Mpindieu udi uya mutangile ku sud kua Yelushalema.

Yezu kena nkayende to. Udi ne bayidi bende too ne “misumba minene ya bantu” popamue ne balambuishi ba bitadi ne benji ba mpekatu. (Luka 14:25; 15:1) Bafalese ne bafundi badi bakula bibi bua bidi Yezu wamba ne wenza badi pabu muaba au. Badi ne malu a bungi a kuelela meji panyima pa bobu bamane kumvua tshilejilu tshivua Yezu mufile tshia mukoko mujimine, tshia muana mujimine, ne tshia muntu mubanji ne Lazalo.​—Luka 15:2; 16:14.

Pamuapa Yezu utshivua muvuluke muvua baluishi bende bamuambe mêyi mabi ne bamubuidie, kadi udi utuma ntema yende kudi bayidi bende. Udi wakula bua malu avuaye mulongeshe kumpala mu Galela.

Tshilejilu, Yezu udi wamba ne: “Malu adi alenduishangana kaakupanga kulua to. Nansha nanku, diakabi didi kudi muntu udiwu aluila kudiye! . . . Dimukayi. Muanenu yeye muenze mpekatu, umutandishe, yeye munyingalale bua mpekatu wende, umufuile luse. Nansha yeye mukuenzele mpekatu misangu muanda mutekete ku dituku ne mupingane kuudi misangu muanda mutekete, wamba ne: ‘Ndi munyingalale bua mpekatu wanyi,’ udi ne bua kumufuila luse.” (Luka 17:1-4) Mêyi a ndekelu a mvese eu avua mua kuikala mavuluije Petelo lukonko luvuaye muele bua kufuilangana luse misangu muanda mutekete.​—Matayi 18:21.

Bayidi ba Yezu nebikale bakumbane bua kuenza malu mu diumvuangana ne mêyi a Yezu anyi? Pakambilabu Yezu ne: “Tupesha ditabuja dia bungi,” wakabajadikila ne: “Bu nuenu ne ditabuja bunene bua lutete lua mutâda, nuvua mua kuambila mutshi wa tumpulumanje eu ne: ‘Juka ne ukunyibue mu mbuu emu!’ wowu uvua mua kunutumikila.” (Luka 17:5, 6) Eyowa, nansha ndambu wa ditabuja udi mua kuenza malu manene.

Yezu wakatungunuka ne kuleja mushinga wa kuikala ne budipuekeshi, ne nkatshinkatshi, wambila biyidi bende ne: “Nnganyi wa kunudi udi ne mupika wende udima anyi ulama mikoko, udi mua kumuambila padiye ufuma ku budimi ne: ‘Luaku apa mpindieu, udie ku mêsa’? Kadi, kakumuambila ne: ‘Ndongoluela tshintu tshia meme kudia dilolo, vuala kalamba ka mudimu, unkuatshile mudimu too ne pandi njikija kudia ne kunua, pashishe udi pebe mua kudia ne kunua’ anyi? Kakuikala ne dianyisha kudi mupika eu bua muvuaye muenze tshivuabu bamuambile bua kuenza to, ki mmuomu anyi? Bia muomumue, panudi nuenza malu onso avuabu banuambile bua kuenza, nuambe ne: ‘Tudi bapika ba tshianana. Tshitudi benze ke tshituvua ne bua kuenza.’”​—Luka 17:7-10.

Mutendeledi yonso wa Nzambi udi ne bua kumanya mudibi ne mushinga bua kuteka malu a Nzambi pa muaba wa kumpala. Udi kabidi ne bua kuvuluka diakalenga didiye nadi bua kutendelela Nzambi bu muena mu nzubu wende.

Bidi bimueneka ne: katupa kakese panyima pa bualu ebu, muntu uvua Mariya ne Mâta batume wakafika. Mariya ne Mâta mbana babu ne Lazalo, ne mbasombele mu Betania wa Yudaya. Mufidi wa mukenji udi wamba ne: “Mukalenge, tangila! muntu uudi munange bikole udi usama.”​—Yone 11:1-3.

Nansha muvua Yezu mumvue ne: mulunda wende Lazalo uvua usama bikole, bualu ebu kabuena bumupampakaja to. Kadi udi wamba ne: “Tshipatshila tshia disama edi ki ntshia kufikisha ku lufu to, kadi didiku bua butumbi bua Nzambi, bua Muana wa Nzambi atumbishibue ku butuangaji buadi.” Yezu wakashala muaba uvuaye au matuku abidi ne pashishe kuambilaye bayidi bende ne: “Tuyayi kabidi mu Yudaya.” Bayidi bakamuambila ne: “Labi, matuku mashale aa bena mu Yudaya bavua bakeba kukuasa mabue, udi uyamu kabidi anyi?”​—Yone 11:4, 7, 8.

Yezu udi ubandamuna ne: “Kudi mêba 12 a munya, ki mmuomu? Muntu yeye wenda mu munya, kena udituta ku tshintu, bualu udi umona butoke bua pa buloba ebu. Kadi muntu yeye wenda butuku, udi utetuka, bualu butoke kabuena munda muende  to.” (Yone 11:9, 10) Pamuapa udi usua kuamba ne: tshikondo tshivua Nzambi mumukosele bua mudimu wende wa diyisha katshivua tshianji kujika to. Yezu uvua ne bua kuenza mudimu bikole ne dîba dikese divua dimushadile too ne pavua tshikondo atshi tshikumbana.

Yezu udi usakidila wamba ne: “Mulunda wetu Lazalo mmulale, kadi ndi nyaku bua kumubisha.” Bushuwa bu muvua bayidi bende bela meji ne: Lazalo uvua muikishe patupu ne uvua ne bua kujuka, bakamuambila ne: “Mukalenge, bikalaye mulale, neumvue bimpe.” Yezu wakabambila patoke ne: “Lazalo mmufue . . . Kadi tuyayi kudiye.”​—Yone 11:11-15.

Bu muvua Tomase mumanye ne: Yezu uvua ne bua kufuila mu Yudaya ne bu muvuaye usua kumutua nyama ku mikolo, wakambila bayidi bakuabu ne: “Tuyayi petu, bua tufue nende.”​—Yone 11:16.