DILONGESHA DIA 01
Mudi Bible mua kukuambuluisha
Tuetu bonso tutu basue kumanya tshitudi bikadile ne muoyo, tshitudi tukengela ne tufuila, ne tshiatufikila matuku atshilualua. Tudi kabidi tusamisha mutu bua malu etu a ku dituku ne ku dituku, bu mudi mua kupeta tshiakudia ne mua kuikala ne dîku dia disanka. Ba bungi mbamone ne: Bible mmubambuluishe bua kupeta mandamuna a nkonko yabu minene ne kupeta mibelu mimpe ya mua kupita ne nsombelu wabu. Kuena umona ne: Bible udi mua kuambuluisha bantu bonso baudi mumanye anyi?
1. Nnkonko kayi idi Bible wandamuna?
Bible udi wandamuna nkonko minene eyi: Tudi bafike ku dikala ne muoyo mushindu kayi? Bua tshinyi tudi ne muoyo? Bua tshinyi bantu badi kabayi ne bualu badi bakenga? Ntshinyi tshitu tshienzekela muntu padiye ufua? Muntu yonso mmusue ditalala, kadi bua tshinyi kudi mvita? Ntshinyi tshiafikila buloba kumpala eku? Bible udi utukankamija bua kukeba mandamuna a nkonko eyi, bualu bantu miliyo ne miliyo mbamone ne: mandamuna ayi adibu bapeta adi abasankisha.
2. Mmushindu kayi udi Bible mua kutuambuluisha bua kuikala ne nsombelu wa disanka dituku dionso?
Bible udi utupesha mibelu mimpe. Tshilejilu, udi uleja bena mu mêku mua kuikala ne disanka dilelela. Udi utuambila tshia kuenza padi malu matutonde ne mutudi mua kunanga mudimu wetu. Neumanye tshidi Bible ulongesha bua malu aa ne malu makuabu a bungi patudi tuenda tulonga mukanda eu. Neufike ku dimona ne: “Dîyi dionso didi mu Mifundu [mmumue ne: didi mu Bible] . . . didi diambuluisha.”—2 Timote 3:16.
Mukanda eu kawena wangata muaba wa Bible to. Kadi udi ukukankamija bua wewe kudilongela Bible. Nunku, tudi tukulomba bua kubala mvese idibu bafunde mu malongesha onso ne kumona mudiyi ipetangana ne biudi wenda ulonga.
BUELA MU BUONDOKE
Mona mukadi Bible muambuluishe bantu, mudi kumubala mua kukusankisha, ne mudibi ne mushinga bua bakuambuluishe bua kumumvua bimpe.
3. Bible udi mua kutulombola
Bible udi anu bu dinkenke dikole dia butoke. Udi mua kutuambuluisha bua kuangata mapangadika mimpe ne bua kumanya malu adi matuindile kumpala eku.
Balayi Misambu 119:105, pashishe nuandamune nkonko eyi:
-
Mufundi wa musambu eu uvua umona Bible mushindu kayi?
-
Wewe pebe udi umumona mushindu kayi?
4. Bible udi mua kuandamuna nkonko yetu
Mamu kampanda wakamona ne: Bible wakamupetesha mandamuna a nkonko ivua mimutatshishe munkatshi mua bidimu bia bungi. Tangilayi FILME, pashishe nuandamune nkonko eyi:
-
Mu filme eu, nnkonko kayi ivua mamu au udiela?
-
Mmunyi muvua dilonga dia Bible dimuambuluishe?
Bible udi utukankamija bua kuela nkonko. Balayi Matayi 7:7, pashishe nuandamune lukonko elu:
-
Nnkonko kayi iudi udiela idi Bible mua kuandamuna?
5. Kubala Bible kudi mua kukusankisha
Bantu ba bungi batu banange kubala Bible, ne kutu kubambuluisha. Tangilayi FILME, pashishe nuandamune nkonko eyi:
-
Mu filme eu, ntshinyi tshivua bansonga bambe bua dibala?
-
Nansha muvuabu kabayi basue kubala, bua tshinyi mbalue kunanga kubala kua Bible?
Bible nkayende udi wamba mudiye mua kutulongesha malu adi mua kutusamba ne kutupetesha ditekemena. Balayi Lomo 15:4, pashishe nuandamune lukonko elu:
-
Malu adi Bible ulaya bua busambi ne ditekemena adiku akusankisha anyi?
6. Badi mua kukuambuluisha bua kumvua Bible bimpe
Ba bungi mbafike ku dimona ne: pa kumbusha didibadila diabu nkayabu dia Bible, kumukonkonona ne bantu bakuabu nkubambuluishe. Balayi Bienzedi 8:26-31, pashishe nuandamune lukonko elu:
-
Tudi mua kumvua Bible bimpe mushindu kayi?—Tangila mvese wa 30 ne wa 31.
Muena Etshiopi uvua dijinga ne diambuluisha bua kumvua Mifundu bimpe. Lelu eu ba bungi mbamone ne: kuyukila malu a mu Bible ne bantu bakuabu kudi kuambuluisha
BAMUE BATU BAMBA NE: “Kulonga Bible nkujimija kua dîba.”
-
Wewe udi wamba tshinyi? Bua tshinyi?
TSHIA KUKUATA
Bible udi ufila mibelu mimpe bua nsombelu wa ku dituku ne ku dituku, wandamuna nkonko minene, usamba bantu ne ubapetesha ditekemena.
Diambulula
-
Mu Bible mudi mibelu ya mushindu kayi?
-
Nnkonko kayi idi Bible wandamuna?
-
Mmalu kayi audi musue kulonga mu Bible?
BIA KUTANGILA KABIDI
Mona mudi mibelu ya mu Bible yambuluisha bantu lelu.
Mona muvua Bible muambuluishe muntu uvua mukenge ne tunyinganyinga katshia ku buana.
Mona mibelu mimpe idi Bible ufila bua nsombelu wa mu mêku.
Mona mudi Bible utokesha tshilumbu tshia lutatu lutu nalu ba bungi bua muntu udi ukokesha buloba ebu.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
