Yehowa wakapesha bantu buloba. Buobu ke muaba wetu wa kusombela. Nzambi kavua mufuke Adama ne Eva bua balele bana buwuje diulu to. Ukavua mumane kufuka banjelu bua kusombelabu mu diulu. (Yobo 38:4, 7) Yehowa wakateka muntu wa kumpala (Adama) mu mparadizu mulenga udibu babikila ne: budimi bua Edene. (Genese 2:15-17) Yehowa wakamupesha yeye ne bana bavuaye mua kulela diakalenga dia kuikala ne muoyo kashidi pa buloba.​—Bala Misambu 37:29; 115:16.

Ku ntuadijilu, budimi bua Edene nkayabu ke buvua mparadizu. Muntu mulume ne muntu mukaji ba kumpala (Adama ne Eva) bavua ne bua kulela bana ne kuwuja buloba. Bavua ne bua kubukokesha ne kubuvuija buonso mparadizu. (Genese 1:28) Kabakubutula buloba buetu ebu to. Bantu nebasombapu tshiendelele.​—Bala Misambu 104:5.

Tangila filme wa Bua tshinyi Nzambi uvua mufuke buloba?

Adama ne Eva bakatombokela Nzambi, ke yeye kubipata mu budimi bua Edene. Nunku, mparadizu wakajimina, ne kakuena muntu udi mukumbane bua kumupingaja kabidi to. Mukanda wa Nzambi udi wamba ne: “Buloba mbufidibue kudi muntu mubi.”​—Yobo 9:24.​—Bala Genese 3:23, 24.

Yehowa mmulekele tshivuaye mulongoluele buloba ne bantu anyi? Tòo. Udi ne bukole buonso. Malu atuye wamba atu anu akumbana. (Yeshaya 45:18) Neapingaje bantu mu nsombelu uvuaye musue bua bikale nende.​—Bala Misambu 37:11, 34.

Nzambi mmuteke Yezu Mfumu. Nanku Yezu ke walua kuvuija buloba ebu Mparadizu pikalaye Mfumu. Mu mvita idibu babikila ne: Armagedone, Yezu nealue ne banjelu ba Nzambi bua kubutula bantu badi babenga kutumikila Nzambi.  Pashishe, Yezu neele Satana mu buloko bua kuenzamu bidimu 1 000. Bantu badi banange Nzambi nebapanduke bualu Yezu neabalombole, neabalame kabidi. Nebapete muoyo wa tshiendelele mu Mparadizu pa buloba.​—Bala Buakabuluibua 20:1-3; 21:3, 4.

Nzambi neumbushe malu mabi pa buloba dîba kayi? Yezu wakafila “tshimanyinu” tshivua ne bua kuleja ne: nshikidilu ukadi pabuipi. Malu adi enzeka lelu adi atonda bantu; adi aleja ne: tukadi ku “nshikidilu wa ndongoluelu wa malu eu.”​—Bala Matayi 24:3, 7-14, 21, 22.

Munkatshi mua bidimu 1 000, Yezu neikale Mfumu wa buloba bujima. Neikale musombele mu diulu, ne neajikije makenga onso. (Yeshaya 9:6, 7; 11:9) Pa kumbusha dikala diende Mfumu, Yezu neikale Muakuidi Munene: nanku neajimijile bantu bonso badi banange Nzambi mpekatu yabu. Nunku, Nzambi neenze mudimu ne Yezu bua kujikija masama ne bukulakaja ne lufu.​—Bala Yeshaya 25:8; 33:24.

Bantu badi batumikila Nzambi nebasombe mu Mparadizu. (1 Yone 2:17) Yezu wakatuma bayidi bende bua kukeba bantu badi bakeba kumanya Nzambi bimpe ne kubalongesha malu a kuenza bua Nzambi kubananga. Lelu, Yehowa udi wenda ulongolola bantu miliyo ne miliyo bua kupetabu muoyo mu Mparadizu pa buloba. (Sefanya 2:3) Ku Nzubu ya Bukalenge ya Bantemu ba Yehowa, bantu batu balonga mushindu wa kuikala balume ba tshitembu ne batatu ba tshitembu, bakaji ba tshitembu ne bamamu ba tshitembu. Baledi ne bana batu batendelela pamue, balonga mudi lumu luimpe mua kubambuluisha.​—Bala Mika 4:1-4.