Mêyi a ndekelu
“Nulue bidikiji ba bantu badi bapiana milayi ku diambuluisha dia ditabuja ne lutulu.”—EBELU 6:12.
1, 2. Mbimpe bua tuetu kukolesha ditabuja dietu mpindieu bua tshinyi? Fila tshilejilu.
DITABUJA mmuaku muimpe be! Udi uleja ngikadilu muimpe mutambe. Kadi patudi tumona muaku eu anyi tumvua bautela, tudi ne bua kuela meji bua tshiambilu tshikuabu tshidi tshiamba ne: “Enza malu ne lukasa!” Bualu tuetu katuyi ne ditabuja, tudi ne bua kuenza malu ne lukasa bua kuikala nadi; anyi tuetu bikale nadi tudi ne bua kuenza malu ne lukasa bua kudilama ne kudidisha. Bua tshinyi?
2 Elabi meji ne: udi wenda uya upitshila mu tshipela tshinene. Udi umvua nyota mikole ya mâyi. Paudi upeta ndambu wa mâyi, newenze bua kualama bua munya kawuanyangi to. Pashishe udi ne bua kuuja tshintu tshiudi natshi bua umone mua kufika nawu too ne kuudi uya. Lelu tuetu bonso tudi mu buloba budi bantu kabayi badifila mu ntendelelu wa Yehowa to, mu buloba budi ditabuja dilelela didibu bafuanyikija ne mâyi kadiyi ditamba kumueneka; ke bualu kayi muntu yeye kayi mulame ditabuja diende anyi kayi udisha ditabuja adi misangu yonso, didi dipepuka anyi dijimina. Dijinga dia kuikala ne ditabuja ndikole; anu bu mutudi katuyi mua kuikala ne muoyo tuetu katuyi ne mâyi, katuena mua kuikala mu malanda mimpe ne Yehowa tuetu katuyi ne ditabuja to.—Lomo 1:17.
3. Tshidi Yehowa muenze ntshinyi bua kutuambuluisha bua kukolesha ditabuja dietu? Mmalu kayi abidi atudi ne bua kuvuluka bua kuenza?
3 Yehowa mmumanye ne: tudi ne dijinga dikole dia kuikala ne ditabuja; mmumanye kabidi ne: ki mbipepele bua kukolesha ditabuja ne kudilama matuku etu aa to. Ke bua tshinyi mmutupeshe bilejilu bia tuetu kuidikija. Yehowa wakasaka mupostolo Paulo ku diambuluisha dia nyuma wende bua kufunda ne: “Nulue bidikiji ba bantu badi bapiana milayi ku diambuluisha dia ditabuja ne lutulu.” (Eb. 6:12) Ke bualu kayi bulongolodi bua Yehowa budi butukankamija bua kuenza muetu muonso bua kuidikija bilejilu bia balume ne bakaji ba lulamatu, bu mudi batudi bakonkonone mu mukanda eu. Kadi tshitudi mua kuenza mpindieu ntshinyi? Tuanji kuvulukayi malu abidi aa: 1) Tudi ne bua kutungunuka ne kukolesha ditabuja dietu; 2) tudi kabidi ne bua kutungunuka ne kulama ditekemena dietu mu lungenyi bimpe.
4. Satana mmudivuije muena lukuna wa ditabuja dietu mushindu kayi? Katuena ne bua kumutshina bua tshinyi?
4 Tungunuka ne kukolesha ditabuja diebe. Satana mmuluishi munene wa ditabuja. Mukokeshi wa buloba ebu mmuvuije bulongolodi ebu bu tshipela anyi muaba utudi katuyi mua kulama ditabuja dietu bimpe. Satana udi ne bukole bupite buetu kule ne kule. Tudiku mua kutshina, tuamba ne: kakuena mushindu wa kudiundisha ne kukolesha ditabuja dietu anyi? Tòo! Bualu Yehowa udi Mulunda munene wa aba badi bakeba ditabuja dilelela. Yehowa udi utujadikila ne: padiye ku luseke luetu, tudi mua kukandamena Diabolo, yeye kutunyema. (Yak. 4:7) Tudi tumukandamena patudi tukeba dîba dituku dionso bua kukolesha ditabuja dietu ne kudidiundisha. Mmu mushindu kayi?
5. Balume ne bakaji ba ditabuja badibu bakuile mu Bible bavua bapete ditabuja mushindu kayi? Umvuija.
5 Anu mutuvua bamone, balume ne bakaji ba lulamatu badibu bakuile mu Bible kabavua baledibue ne ditabuja to. Nsombelu yabu idi ileja patoke ne: nyuma muimpe wa Yehowa ke uvua mubambuluishe bua kuikala ne ditabuja. (Gal. 5:22, 23) Bavua balombe Yehowa bua kubambuluisha, ke bua tshinyi wakatungunuka ne kukolesha ditabuja diabu. Tuenzayi petu tshivuabu benze, katuyi tupua muoyo ne: Yehowa udi upesha bantu badi bamulomba nyuma muimpe ne badi benza malu adi apetangana ne masambila abu. (Luka 11:13) Katuena petu mua kuenza kupitshisha apu anyi?
6. Mmunyi mudi dilonga dietu dia miyuki ya mu Bible mua kutuambuluisha bikole?
6 Mu mukanda eu, tudi bakonkonone bilejilu bikese tshianana bia bantu bavua ne ditabuja dikole. Kudi bikuabu bia bungi menemene. (Bala Ebelu 11:32.) Tuetu tusambila, tuelangana meji patudi tulonga tshilejilu tshionso, netulonge malu a bantu aba kupita adi mu mukanda eu. Tuetu babale pa mutu pa mutu miyuki ya bantu bavua ne ditabuja badibu bakuile mu Bible, katuakukolesha ditabuja dietu mu mushindu udibi bikengela to. Bua dibala dietu kutuambuluishadi, tudi ne bua kubuela mu ndondo bua kumanya muvua bualu kampanda buenzeke ne nsombelu uvua nende bantu badibu bakuila. Tuetu tuvuluka misangu yonso ne: balume ne bakaji bena mibi badibu bakuila aba bavua bantu “bu tuetu,” bilejilu biabu nebituambuluishe bikole. (Yak. 5:17) Tuetu baditeke pa muaba wabu, tudi mua kujingulula muvuabu badiumvua pavuabu bapeta ntatu ne malu bu atudi nawu lelu.
7-9. a) Bantu bavua ne ditabuja ba mu bikondo bivuabu bafunda Bible bavua mua kudiumvua munyi bu bobu babambile bua kutendelela Yehowa mu mushindu utudi tuenza lelu? b) Tudi ne bua kukolesha ditabuja dietu mu bienzedi bua tshinyi?
7 Tudi kabidi tukolesha ditabuja dietu ku diambuluisha dia mapangadika atudi tuangata ne malu atudi tuenza. Bualu ‘ditabuja didi kadiyi ne bienzedi ndifue.’ (Yak. 2:26) Elabi meji muvua balume ne bakaji batudi bakuile aba mua kusanka bu Yehowa mubalombe bua kuenza mudimu udiye mutupeshe lelu!
8 Tshilejilu, bu bobu bambile Abalahama ne: katendeledi Yehowa mu bioshelu bia mabue mu tshipela to; kadi amutendelele munkatshi mua batendeledi bende mu Nzubu ya Bukalenge mimpe ne mu mpungilu minene mudibu bakuila bua milayi ivuaye “mumuenene ku bule” patupu ne bayumvuija mu mushindu muimpe, uvua mua kudiumvua bishi? (Bala Ebelu 11:13.) Bu bobu bambile Eliya ne: mudimu wende kauvua wa kushipa baprofete babi ba Bâla pavuaye utendelela Yehowa mu tshikondo tshivua mukalenge mubi ukokesha to, kadi ne: uvua wa kuya kutangila bantu mu ditalala ne kubayisha mukenji udi ukankamija ne ufila ditekemena, uvua mua kudiumvua munyi? Kakuyi mpata, bantu balume ne bantu bakaji bavua ne ditabuja badibu bakuile mu Bible bavua ne bua kuitaba ne lukasa bua kutendelela Yehowa mutudi tuenza lelu.
9 Nunku, tutungunuke ne kukolesha ditabuja dietu ku bienzedi bietu. Patudi tuenza bualu ebu, netulonde bilejilu bia bantu bavua ne ditabuja badibu bakuile mu Dîyi dia Nzambi difundisha ku nyuma wende. Anu mutuvua bamone mu mêyi a mbangilu, netudiumvue pabuipi nabu anu bu balunda. Kadi bulunda ebu budi mua kulua bulelela mu katupa kîpi emu.
10. Mu Mparadizu netupete disanka kayi?
10 Lama ditekemena diebe mu lungenyi bimpe. Bantu badi ne ditabuja batu bapeta bukole ku diambuluisha dia malu adi Nzambi mulaye. Kadi wewe? Tshilejilu, elabi meji bua disanka dituikala nadi dia kumonangana ne batendeledi ba Nzambi bavua ne ditabuja pikalabu mua kupetulula muoyo mu tshikondo tshikala “dibika dia ku lufu dia bantu bakane” ne bua kuenzeka. (Bala Bienzedi 24:15.) Nnkonko kayi iudi nayi iwajinga bua kubebeja?
11, 12. Mu bulongolodi bupiabupia, nnkonko kayi iwajinga kuebeja: a) Abele? b) Noa? c) Abalahama? d) Luta? e) Abigayila? f) Esetê?
11 Pawapetangana ne Abele, neumuebejaku bua akuambile muvua baledi bende anyi? Anyi neumuebeje ne: “Uvuaku muyukile ne bakeluba bavua balama njila wa kuya kubuelela mu Edene anyi? Bavuaku bakuandamune anyi?” Kadi netuambe tshinyi bua Noa? Udi mua kumuebeja ne: “Uvuaku umvua buôwa bua ba Nefilime anyi? Mmunyi muuvua mukumbaje majinga a nyama yonso ivua mu buatu mu tshidimu atshi?” Kadi wewe mupetangane ne Abalahama, udi mua kumuebeja ne: “Uvuaku mumonangane ne Sheme anyi? Uvua mukulongeshe malu a Yehowa nnganyi? Bivuaku bikukolele bua kumbuka mu Ula anyi?”
12 Tangila imue nkonko iudi mua kuebeja bantu bakaji ba lulamatu babika ku lufu. “Luta, tshivua tshikusake bua kulua mutendeledi wa Yehowa ntshinyi?” “Abigayila, uvuaku mumvue buôwa bua kuambila Nabala muuvua muambuluishe Davidi anyi?” “Esetê, tshivua tshikufikile wewe ne Môdekayi pakajika muyuki udi mu Bible eu ntshinyi?”
13. a) Bantu babishabu ku lufu nebikale mua kukuela nkonko kayi? b) Udi umvua bishi bua ditekemena ditudi nadi dia kutuilangana ne bantu balume ne bantu bakaji ba lulamatu ba mu bikondo bia kale?
13 Balume ne bakaji ba lulamatu aba nebikale pabu ne nkonko ya kukuela. Netuikale ne disanka dia kubambila muvua nsombelu wa ku matuku a ku nshikidilu ne muvua Yehowa muambuluishe bantu bende mu tshikondo tshikole atshi. Kakuyi mpata, nebikale ne disanka dia kumvua muvua Yehowa mukumbaje milayi yende yonso. Mu bulongolodi bupiabupia, katuakuikala kabidi tufuanyikija mu mutu mushindu uvua batendeledi ba Nzambi ba lulamatu badibu bakuile mu Bible to. Netuikale nabu mu Mparadizu. Nunku, tungunuka ne kudienzeja bikole ne kuvuija bantu aba balelela kuudi. Tungunuka ne kuidikija ditabuja diabu. Tudi tukujingila disanka dia bungi dia kuenzela Yehowa mudimu pamue nabu bu balunda bebe ba pa muoyo bua kashidi.
