Yeshaya 43:1-28
43 Mpindieu mona tshidi Yehowa,Mufuki webe, wewe Yakoba, Yeye uvua mukuenze, wewe Isalele,+ wamba:
“Kutshinyi, bualu ndi mukupikule.+
Ndi mukubikile ku dîna diebe.
Udi wanyi meme.
2 Paudi upitshila mu mâyi, meme nengikale nebe,+Ne paudi upitshila mu misulu, kayakukubuikila.+
Paudi wendela mu kapia, kuakupia,Peshi ndimi ya kapia kayakukuosha to.
3 Bualu meme ndi Yehowa Nzambi webe,Wa Tshijila wa Isalele, Mupandishi webe.
Ndi mufile Ejipitu bu tshintu tshia kukupikula natshi,Ndi mufile Etshiopi ne Seba bua kukushintakaja nabu.
4 Bualu wewe wakalua tshintu tshia mushinga mukole ku mêsu kuanyi,+Wakapeshibua bunême, ndi mukunange.+
Nunku nemfile bantu pa muaba webeNe bisamba bua kushintakaja ne muoyo* webe.
5 Kutshinyi to, bualu ndi nebe.+
Nendue ne bana* bebe mfumina nabu ku est,Nenkusangishe pamue kumbukila ku ouest.+
6 Nengambile nord ne: ‘Balekela!’+
Nengambile sud ne: ‘Kubalami to.
Ulue ne bana banyi ba balume ufuma nabu kule, ne bana banyi ba bakaji ufuma nabu ku ntengu ya buloba,+
7 Muntu yonso udi ubikidibua ku dîna dianyi,+Umvua mufuke bua butumbi buanyi,Undi mufumbe ne muenze.’+
8 Patula bantu badi bampofu, nansha mudibu ne mêsu,Ne badi bampudi matshi, nansha mudibu ne matshi.+
9 Bisamba bionso bidisangishe muaba umue,Ne bukua bantu buonso budisangishe pamue.+
Nnganyi wa munkatshi muabu udi mua kuamba bualu ebu?
Peshi badiku mua kuenza bua tumvue malu a kumpala* anyi?+
Bapatule bantemu babu bua bajadike mudibu babinge,Anyi bumvue, bambe ne: ‘Mbulelela!’”+
10 “Nudi bantemu banyi,”+ ke mudi Yehowa wamba,“Eyowa, muena mudimu wanyi undi musungule,+Bua nummanye ne nungitabuje*Ne nujingulule ne: ndi muomumue.+
Kumpala kuanyi kakuvua Nzambi mukuabu muenjibue,Ne panyima panyi kenaku nansha umue.+
11 Meme, meme ndi Yehowa,+ kakuena mupandishi mukuabu pa kumbusha meme.”+
12 “Meme ndi Yeye uvua muambe, mupandishe ne mumanyishePavuaku kakuyi nzambi wa ku babende munkatshi muenu.+
Nunku nuenu nudi bantemu banyi,” ke mudi Yehowa wamba, “ne meme ndi Nzambi.+
13 Kabidi, meme ndi Wa muomumue misangu yonso;+Ne kakuena muntu udi mua kudiapula tshintu mu tshianza tshianyi.+
Pandi ngenza bualu, nnganyi udi mua kubupangisha?”+
14 Monayi tshidi Yehowa Mupikudi wenu,+ Wa Tshijila wa Isalele,+ wamba:
“Bua bualu buenu nentume bantu ku Babilona ne nempuekeshe milonda yonso ya ku biibi,+Ne bena Kasada nebele mbila mu dikenga mu mazuwa abu.+
15 Meme ndi Yehowa, Wa Tshijila wenu,+ Mufuki wa Isalele,+ Mukalenge wenu.”+
16 Mona tshidi Yehowa,Yeye udi upanda njila mu mbuuNe upanda njila nansha mu mâyi a mavuala makole,+
17 Yeye udi upatula ditempu dia mvita ne kabalu,+Tshiluilu pamue ne bilobo bia mvita, wamba:
“Nebalale panshi, kadi kabakujuka to.+
Nebajimibue, nebabajime bu mukaba wa muendu udi utema.”
18 “Kanuvuluki malu a kumpala,Ne kanuedianganyi meji a malu a kale.
19 Monayi! Ndi ngenza bualu bupiabupia;+Nansha mpindieu budi bupatuka.
Kanuena babumanye anyi?
Nempande njila mu tshipela+Ne nempatule misulu mu buloba bume.+
20 Nyama wa tshisuku neampeshe bunême,Mibuabua ne nyunyi ya mfiondo,Bualu ndi mpatula mâyi mu tshipela,Misulu mu buloba bume,+Bua bantu banyi bandi musungule+ kunuabu,
21 Bantu bamvua mudilongoluele memeBua bamone mua kumanyisha butumbi buanyi.+
22 Kadi wewe kuena mumbile meme, wewe Yakoba,+Bualu ukavua muntshioke, wewe Isalele.+
23 Kuena muntuadile mikoko bua milambu yebe ya kuosha mijimaAnyi muntumbishe ne milambu yebe.
Tshiena mukuenzeje bua kuntuadila dipa,Anyi mukutshiokeshe ne dilomba budimbu bua mupuya muimpe.+
24 Kuvua munsumbile disele dia mupuya muimpe* ku makuta ebe,Ne kuvua mungukutshishe ne dianyi dia milambu yebe to.+
Kadi, wewe udi munnemeshile bujitu ne mpekatu yebeNe muntshiokeshe ne bilema biebe.+
25 Meme, meme ndi Yeye udi ukupula matomboka ebe*+ bua bualu buanyi,+Ne tshiakuvuluka mpekatu yebe to.+
26 Umvuluije; tulumbulule nebe tshilumbu tshidi pankatshi petu;Londa mudi tshilumbu tshiebe bua kujadika muudi mubinge.
27 Nkambua webe wa kumpala wakenza mpekatu,Ne batuadi bebe ba dîyi* mbantombokele.+
28 Nunku, nembipishe bakokeshi ba muaba wa tshijila,Nemfile Yakoba ku kabutu
Ne nemfile Isalele ku mêyi a bipendu.+
Note
^ Anyi “anyima.”
^ Ku mua.: “dimiinu.”
^ Pamuapa mbakula bua malu a kumpala adi ne bua kulua mu matuku atshilualua.
^ Anyi “ne nungeyemene.”
^ Dilenge dia mupuya muimpe.
^ Anyi “bienzedi biebe bia buntomboji.”
^ Pamuapa mbakula bua balongeshi ba Mikenji.
