Yeshaya 41:1-29
41 “Ntelejayi talalaa,* nuenu bidiila;*Bisamba bipetulule bukole buabi.
Bisemene; pashishe biakule.+
Tudisangishayi bua dilumbuluisha.
2 Nnganyi udi mujule muntu wa kudi dîba dipatukila,*+Umubikila mu buakane ku makasa Ende,*Bua kufila bisamba ku tshianza tshiendeNe bua kumupesha bukokeshi bua kukokesha bakalenge?+
Nnganyi udi mubavuije lupuishi kumpala kua muele wende wa mvita,Bu lusona lupepula kudi lupepele kumpala kua buta buende bua mikete?
3 Yeye udi ubalondakaja, upita kakuyi lutatuMu tujila mudi makasa ende kaayi manji kuendela.
4 Nnganyi udi muenze bualu ebu ne mubukumbaje,Ubikidisha bipungu bia bantu katshia ku tshibangidilu?
Meme, Yehowa, ndi Wa kumpala;+Ne kudi ba ndekelu ndi muomumue.”+
5 Bidiila* mbimone bualu ebu, mbiumvue buôwa.
Ntengu ya buloba yakatuadija kuzakala.
Badi basemena pabuipi ne balua.
6 Muntu yonso udi wambuluisha muinende,Udi wambila muanabu ne: “Ikala ne bukole.”
7 Nunku nsenda udi ukolesha mufudi wa biamu;+Muntu udi ubatalaja ne nyindu wa kufula nendeUdi ukolesha muntu udi ututa bintu pa tshiamu tshia mu ditanda.
Udi wamba bua dilamakaja biamu ne: “Ndimpe.”
Pashishe badi batshikolesha ne misonso bua katshitenkakanyi to.
8 “Kadi wewe, Isalele, udi muena mudimu wanyi,+Wewe, Yakoba, undi musungule,+Bana ba* Abalahama mulunda wanyi,+
9 Wewe umvua muangate kumbukila ku ntengu ya buloba,+Ne wewe umvua mubikile kumbukila miaba yabu ya kule menemene.
Mvua mukuambile ne: ‘Udi muena mudimu wanyi;+Ndi mukusungule; tshiena mukubenge to.+
10 Kutshinyi to, bualu ndi nebe.+
Kupampakanyi to, bualu ndi Nzambi webe.+
Nenkukoleshe, eyowa, nenkuambuluishe,+Nenkukuate bushuwa ne tshianza tshianyi tshia balume tshia buakane.’
11 Mona! Bonso badi bakukuatshila tshiji tshikole nebafuishibue bundu ne nebapuekeshibue milongo.+
Badi bakuluisha nebavuijibue tshianana ne nebajimine.+
12 Neukebe bantu badi baluangana nebe, kadi kuakubapeta to;Bantu badi baluangana nebe mvita nebalue bu tshintu tshidi katshiyiku, bu tshintu tshia tshianana.+
13 Bualu meme, Yehowa Nzambi webe, ndi nkuata tshianza tshiebe tshia balume bikole,Yeye udi ukuambila ne: ‘Kutshinyi to. Nenkuambuluishe.’+
14 Kutshinyi, wewe Yakoba tshishi,*+Nuenu bantu ba Isalele, nenkuambuluishe,” ke mudi Yehowa, Mupikudi webe,+ Wa Tshijila wa Isalele wamba.
15 “Mona! Ndi mukuvuije tshintu tshia kushipula natshi,+Tshintu tshipiatshipia tshia kushipula natshi tshikale ne mênu masakisha nseke ibidi.
Neudiatakaje mikuna minene, neuyizazeNe neuvuije mikuna mikese bu bisote.
16 Neuyipepule,Ne lupepele neluye nayi;Tshipepele tshia mvula netshiyitangalaje.
Wewe neusankile mu Yehowa,+Ne neuditumbishile mu Wa Tshijila wa Isalele.”+
17 “Bakengi ne bapele badi bakeba mâyi, kadi kaenaku to.
Ludimi luabu ndume bua nyota.+
Meme, Yehowa, nembandamune.+
Meme, Nzambi wa Isalele, tshiakubalekela nansha.+
18 Nengenze bua misulu ipueke pa mikuna mikese idi kayiyi ne tshintu+Ne mishimi mu mpata ya bibandabanda.+
Nemvuije tshipela dijiba dia mâyi didi ne malengeNe nemvuije buloba budi kabuyi ne mâyi mishimi ya mâyi.+
19 Nenkune mutshi wa sedre mu tshipela,Mutshi wa musese ne mutshi wa mirte ne mutshi wa sapen.+
Nenkune mutshi wa jenevriye mu mpata wa tshipela,Pamue ne mutshi wa frene ne mutshi wa sipré,+
20 Bua bantu bonso bamone ne bamanye,Bateye ntema ne bajingululeNe: tshianza tshia Yehowa ke tshidi tshienze bualu ebu,Ne Wa Tshijila wa Isalele ke udi mubufuke.”+
21 Yehowa udi wamba ne: “Lumbululayi tshilumbu tshienu.”
Mukalenge wa Yakoba udi wamba ne: “Dibingishayi.”
22 “Filayi bijadiki ne tuambilayi malu alua kuenzeka.
Tuambilayi malu a kale,*Bua tuelelangane meji a malu aa,* bua tumanye tshipeta tshiawu.
Peshi tuambilayi malu atshilualua.+
23 Tuambilayi tshienzeka mu matuku atshilualua,Bua tuetu tumanye ne: nudi nzambi.+
Eyowa, enzayi bualu, buimpe anyi bubi,Bua tukatshile patudi tubumona.+
24 Monayi! Nudi tshintu tshidi katshiyiku,Ne bualu bunudi nuenza budi tshianana.+
Muntu yonso udi unusungula udi tshintu tshibi.+
25 Ndi mujule muntu wa ku nord, nealue,+Muntu wa kudi dîba dipatukila*+ wabila dîna dianyi.
Neadiatakaje bamfumu* anu bu ne: bavua diima,+Bu mufumbi udi udiata diima ditalale.
26 Nnganyi uvua muambe bualu ebu katshia ku tshibangidilu, bua tumanye,Anyi katshia ku bikondo bia kale, bua tuambe ne: ‘Mmuambe bulelela’?+
Bushuwa, kakuena muntu uvua mubumanyishe!
Kakuena muntu uvua mubuambe!
Kakuena muntu uvua mumvue bualu nansha bumue kunudi!”+
27 Mvua wa kumpala ku diambila Siona ne: “Mona! Nguowu aa!”+
Ne nentumine Yelushalema mutuadi wa lumu luimpe.+
28 Kadi ngakatungunuka ne kutangila, ne kakuvua muntu nansha umue;Kakuvua muntu munkatshi muabu bua kufila lungenyi.
Ngakatungunuka ne kubalomba diandamuna.
29 Monayi! Buonso buabu badi tshidingishilu.*
Midimu yabu idi patupu.
Mpingu yabu ya tshiamu* idi lupepele ne tshintu tshia patupu.+
Note
^ Anyi “bisanga.”
^ Anyi “Puwayi kumpala kuanyi.”
^ Anyi “wa ku est.”
^ Mmumue ne: bua kumuenzela mudimu.
^ Anyi “bisanga.”
^ Ku mua.: “Dimiinu dia.”
^ Mmumue ne: udi kayi mua kudikuba ne mupuekele.
^ Ku mua.: “kumpala.”
^ Anyi “tufilaku muoyo wetu.”
^ Anyi “wa ku est.”
^ Anyi “bakokeshi bindondi.”
^ Anyi “tshintu tshidi katshiyiku.”
^ Anyi “mpingu ya tshiamu tshiengulula.”
