Yeshaya 35:1-10
35 Tshipela ne buloba bume nebisanke bikole,+Ne mpata wa tshipela neikale ne disanka ne neele bilongo bu bilongo bia safran.+
2 Kakuyi mpata netshiele bilongo;+Netshisanke, netshiele mbila ya disanka.
Nebatshipeshe butumbi bua Lebanona,+Bulengele bua Kâmele+ ne bua Shalona.+
Nebamone butumbi bua Yehowa, bulengele bua Nzambi wetu.
3 Koleshayi bianza bidi bitekete,Ne koleshayi binu bidi bikanka.+
4 Ambilayi badi ne kanyinganyinga ku muoyo ne:
“Ikalayi ne bukole. Kanutshinyi to.
Monayi! Nzambi wenu nealue ne disombuela,Nzambi nealue ne difutu.+
Yeye nealue kunupandisha.”+
5 Mu tshikondo atshi mêsu a bampofu neatabale,+Ne matshi a bampudi matshi neajikuke.+
6 Mu tshikondo atshi mulema neatumpike bu ngulungu,+Ne ludimi lua kamama neluele mbila ya disanka.+
Bualu mâyi neapatuke mu tshipela,Ne tusulu tua mâyi mu mpata wa tshipela.
7 Buloba budi buosha kudi munya nebulue dijiba didi ne malenge,Ne buloba budi kabuyi ne mâyi nebulue mishimi ya mâyi.+
Miaba ivua mibuabua yikishila,+Neyikale mashinde mabishi, ne malenge ne nyandu.*
8 Nekuikale tshibeba,+Eyowa, njila udibu babikila ne: Njila wa Bunsantu.
Muntu udi kayi mukezuke kakuendelamu to.+
Mmulamina muntu udi wendela mu njila;Muntu mutshimbakane nansha umue kakupambuka, kuyilamu to.
9 Ntambue nansha umue kakuikalamu to,Ne nyama ya tshisuku ya luonji kayakuluamu to.
Kabakuyisanganamu nansha;+Anu bantu badibu bapikule ke bendelamu.+
10 Bantu badi Yehowa mukuule nebapingane,+ nebalue mu Siona ne lubila lua disanka.+
Disanka didi kadiyi dijika nedikale bu tshifulu tshia butumbi ku mitu yabu.+
Disanka dikole ne masanka nebikale biabu,Kanyinganyinga ne kutua kua mikemu nebinyeme.+
Note
^ Anyi “’papirise.”
