Nsumuinu 27:1-27
27 Kuditambishi bua makelela,Bualu kuena mumanye tshikala dituku mua kulua natshi.*+
2 Muntu mukuabu* akutumbishe, mukana muebe wewe kamukutumbishi to;Bantu bakuabu* bakutumbishe, mishiku yebe wewe kayikutumbishi to.+
3 Dibue didi ne bujitu, ne lusenga ndunême bujitu,Kadi tshiji tshikebesha kudi mutshimbakane tshidi ne bujitu kupita bionso bibidi.+
4 Kudi luonji ludi ne tshikisu ne tshiji tshidi bu mâyi mapasalale,Kadi nnganyi udi mua kutua mukawu tshiadi?+
5 Mubelu mufila patoke mmuimpe kupita dinanga disokoka.+
6 Mputa mitapa kudi mulunda nya lulamatu,+Kadi mishiku mitua kudi muena lukuna mmipite bungi.*
7 Muntu udi* mukute udi ubenga* buitshi bua mu dipula,*Kadi kudi udi ne nzala,* nansha tshintu tshia bululu ntshishême mukana.
8 Bu nyunyi udi upambuka ku* disua diendeKe mudi muntu udi upambuka ku nzubu wende.
9 Mafuta ne musenga wa manananshi bidi bisankisha muoyo;Nunku bulunda bushême budi bufumina ku lungenyi lufila ne muoyo mujima.*+
10 Kulekedi mulunda webe anyi mulunda wa tatuebe,Ne kubuedi mu nzubu wa muanenu dituku dia dikenga diebe;Kuikala ne muena mutumba wa pabuipi nkuimpe kupita muanetu udi kule.+
11 Muananyi, ikala ne meji, usankishe muoyo wanyi,+Bua mmone mua kuandamuna udi unyobola.*+
12 Muntu mudimuke udi umona njiwu, udi usokoma,+Kadi badi kabayi ne dimanya badi batungunuka ne kuyaku ne badi bakenga bua malu abakuata.*
13 Angata tshilamba tshia muntu bikalaye mufile tshieya bua muenyi;Kuata tshintu tshiende lukole bikalaye muenze nanku bua mukaji wa ku babende.*+
14 Padi muntu ubenesha muinende ne dîyi dikole mu dinda menemene,Nebabale bualu ebu bu mulawu kudiye.
15 Mukaji muena matandu* udi bu musaka wa nzubu udi utungunuka ne kumatshisha mâyi dituku dia mvula.+
16 Muntu udi mua kumukanda udi mua kukanda lupepeleNe udi mua kukuata mafuta ne tshianza tshiende tshia balume.
17 Bu mudi tshiamu tshisakisha tshiamu tshikuabu,Ke mudi muntu usakisha mulunda wende.*+
18 Muntu udi utabalela mutshi wa mfigi neadie tumuma tuawu,+Ne muntu udi utabalela mfumuende neatumbishibue.+
19 Mudi mâyi aleja mpala wa muntu,Ke mudi muoyo wa muntu uleja wa muntu mukuabu.
20 Lukita ne muaba wa kabutu* kabitu bianji kukuta nansha,+Nansha mêsu a muntu kaatu manji kukuta to.
21 Bu mudi luesu lua kulengejila biamu luikalaku bua arjan, ne tshikutu tshia kapia bua or,+Ke mudi muntu utetshibua kudi butumbi budiye upeta.*
22 Nansha wewe mutue muntu mutshimbakane ne muinshiBu ntete mizaza mu tshinu,Butshimbakane buende kabuakumbuka kudiye to.
23 Udi ne bua kumanya tshimuenekelu tshia tshisumbu tshia mikoko yebe bimpe.
Ulame mikoko yebe bimpe,*+
24 Bualu bubanji kabuena bushalaku kashidi,+Nansha tshifulu tshia butumbi* katshiena tshishalaku bua bipungu bionso bia bantu to.
25 Bisonsa bibishi bidi bijimina, bisonsa bipiabipia bidi bitoloka,Ne tshisuku tshia ku mikuna tshidi tshisangishibua.
26 Bimpanga bia mikoko bitshidi biana bidi bikupetesha bivualu,Ne mbuji ya mpumbu idi ipetesha mushinga wa budimi.
27 Nekuikale mabele a mbuji bungi bukumbane bua wewe kudia,Bua kudiisha ba mu nzubu muebe, ne bua kuambuluisha bena mudimu bebe bakaji.
Note
^ Ku mua.: “tshialela dituku.”
^ Ku mua.: “Muenyi.”
^ Ku mua.: “Muntu wa ku babende.”
^ Anyi pamuapa: “nya lubombo; nya ku bukole.”
^ Anyi “Anyima udi.”
^ Anyi “anyima udi ne nzala.”
^ Anyi “dikatshi.”
^ Ku mua.: “udiatakaja.”
^ Anyi “unyema.”
^ Anyi “ku lungenyi lua anyima.”
^ Anyi “umpenda.”
^ Anyi “tshibawu.”
^ Anyi “muntu wa ku babende.”
^ Anyi “lunsuya.”
^ Ku mua.: “mpala wa mulunda wende.”
^ Anyi “Sheole ne Abadona.”
^ Anyi “Ke mudi muntu bilondeshile butumbi buende.”
^ Anyi “Tuma muoyo webe ku mikoko yebe; Teya ntema ku mikoko yebe.”
^ Anyi “tshikata tshia lumu.”
