TSHIENA-BUALU TSHINENE | MUUDI MUA KUNANGA MUDIMU WEBE
Mudimu mukole ki mmukumbanyine matuku etu aa anyi?
Alex udi utua mikemu padiye utuntumuna dibuki dia bujitu bua kudiela mu mashinyi manene a mu kompanyi mudiye wenzela mudimu. Udi udiebeja ne: ‘Bua tshinyi ndi ngenza mudimu udi kauyi mua kungambuluisha bua kuya kumpala? Ndîba kayi dingikala mua kulubuluka panyi? Bu meme tshiyi ngenza mudimu eu, mvua mua kuikala ne nsombelu muimpe mutambe!’
Anu bu Alex, bantu ba bungi lelu ki mbanange kuenza midimu mikole to. Aaron mulongolodi wa biamu, udi wamba ne: “Bantu ba bungi badi bela meji ne: kuenza mudimu wa makuta makese kudi kubapuekesha milongo.” “Lungenyi ludibu nalu ludi ne: ‘Ndi nganji kuenza anu mudimu eu too ne pangapeta mudimu muimpe.’”
Bua tshinyi bantu ba bungi badi bela meji ne: mudimu mukole ki mmubakumbanyine? Pamuapa malu adibu bamona ku tudiomba adi aleja pa tshibidilu nsombelu “muimpe” bu nsombelu wa bantu babanji mmanyange mmuenenu wabu. Mathieu mulongolodi wa bintu udi wamba ne: “Bantu badi bela meji ne: paudi wenza mudimu mukole bua kupeta tshiakudia, malu ebe kaena aya kumpala to.” Nsentedi mukuabu diende Shane mmumone pende bantu ne lungenyi elu. Udi wamba ne: “Bantu ki mbasue kuenza mudimu wa dituku dijima bua kupeta difutu dia dituku dijima to.”
Kadi bantu ba bungi badi ne nsombelu muimpe mbasue kuenza mudimu mukole. Daniel nsongalume wa bidimu 25 udi wenza mudimu wa luibaku udi wamba ne: “Ndi ngela meji ne: mudimu mukole utu ne difutu dimpe, nangananga paudi uwenza ne tshipatshila tshia mushinga mukole.” Andre udi ne bidimu 23 udi pende witaba bualu ebu. Udi wamba ne: “Ndi mumanye ne: disanka ne musangelu bidi bienda pamue ne mudimu. Mudimu mukese kawena ufikisha muntu ku disanka dia musangu mule to, kadi anu dia tshitupa tshîpi!”
Mmunyi mudi bantu bu mudi Daniel ne Andre bapete mmuenenu muimpe bua mudimu mukole? Mu tshikoso, mbatumikile mêyi a mu Bible mu nsombelu wabu. Pamutu pa Bible kutekesha bantu mu mikolo bua kuenza mudimu mukole, udi yeye ubakolesha bua kunanukila ne dienza mudimu. Bible udi utuambila bua kuenza mudimu ne udi kabidi utuleja mua kunanga mudimu wetu.
Mmêyi kayi a mu Bible adi mua kukuambuluisha bua kuikala ne disanka mu mudimu webe? Tudi tukulomba bua ukonkonone amue a kudiwu mu tshiena-bualu tshidi tshilonda.
