Mvua muledibue mu ditunga dia Hongrie mu tshimenga tshia Székesfehérvár, tshimenga tshivua ne malu a kale a bidimu bipite pa 1 000. Diakabi, ntshidi anu mvuluka muvua mvita mibidi ya buloba bujima minyangakaje nsombelu mu tshimenga atshi.

Ku buana buanyi, mvua mukolele kudi bakaku. Ndi mbavuluka ne muoyo mujima nangananga kaku wanyi muntu mukaji Elisabeth. Uvua mungambuluishe bua kuikala ne ditabuja dikole kudi Nzambi. Pamvua ne bidimu bisatu, dilolo dionso tuvua tuambulula nende disambila ditubu babikila ne: dia Tatu wetu. Nansha nanku, mvua mufike ku diumvua tshivua disambila edi diumvuija tshiyi muanji kukumbaja bidimu 20 ne bia mu njila.

Bakakuanyi ke bavua bantabalela pantshivua muana bualu baledi banyi bavua benza mudimu munya ne butuku, ne tshipatshila tshia kupeta makuta a bungi bua kusumba lupangu luimpe. Nunku mu Disambombo dionso dibidi, bena mu dîku bonso bavua badisangisha bua kudia pamue. Mvua munange bikole bikondo ebi bituvua tudia pamue.

Mu 1958, baledi banyi bakakumbaja tshipatshila tshiabu, bobu kusumba lupangu luimpe luvua ne nzubu uvua ukumbana bua tuetu bonso basatu kusombela. Ndekelu wa bionso, ngakaya kusomba kudi baledi banyi. Mvua ne disanka dia bungi. Kadi ngondo isambombo pashishe, disanka dianyi edi diakajika diakamue. Tatuanyi wakafua ne disama dia kansere.

Bivua bintonde bikole. Ndi mvuluka mumvua nsambila ngamba ne: “Nzambi, ndi nkulomba bua usungila tatuanyi. Ndi nende dijinga. Bua tshinyi kuena wandamuna masambila anyi?” Mvua musue kumanya muaba uvua tatuanyi muye. Mvua ndiebeja ne: ‘Mmuye mu diulu anyi? Peshi mmujimine bua kashidi?’ Mvua ngumvuila bana bakuabu bavua ne batatuabu mukawu.

Munkatshi mua bidimu bia bungi, mvua nya mu nkita pa kuamba dituku dionso. Mvua ntua binu pa lukita lua tatu ne mvua nsambila ne: “Nzambi bu wewe musue, ndi musue kumanya muaba udi tatuanyi.” Mvua kabidi nsambila bua kumvua tshidi kuikala ne muoyo kumvuija.

 Pangakakumbaja bidimu 13, ngakangata dipangadika dia kulonga tshiena Allemagne. Mvua ngela meji ne: mvua mua kupeta mandamuna a ku nkonko imvua nayi mu mikanda minene ya bena Allemagne. Mu 1967, ngakatuadija kulonga mu tshimenga tshia Jena, lua ku Est kua ditunga dia Allemagne. Mvua mbala ne muoyo mujima mikanda ya bena nkindi ba mu Allemagne nangananga ivua yakula bua dikalaku dia bantu. Nansha mumvua mupetamu ngenyi mimpe, kakuvua mukanda nansha umue uvua munsankishe. Ngakatungunuka ne kusambila bua kupeta mandamuna.

Mu 1970, ngakapingana mu Hongrie mumvua mutuilangane ne Rose mukaji umvua mulue kusela. Mu bikondo bia kale Hongrie uvua ku bukokeshi bua Bakoministe. Matuku makese tuetu bamane kuselangana, tuakaya ne Rose mu Australie. Tshipatshila tshietu tshivua tshia kuya kusomba mu Sydney mu Australie muaba uvua mansebanyi musombele.

Ngakapeta mudimu matuku makese mu Austria. Dikuabu dituku, muena mudimu wetu wakangambila ne: ndi mua kupeta mandamuna a nkonko yanyi mu Bible. Wakampesha mikanda ya malu a mu Bible. Ngakabala mikanda eyi ne lukasa luonso ne dijinga dia kumanya malu a bungi. Nunku, ngakafundila Bantemu ba Yehowa bena mikanda ayi ne meme kubalomba mikanda mikuabu ya bungi.

Mu dituku dia mufikilu wa dibaka dietu, Ntemu mukuabu nsonga wakalua kututangila meme ne Rose. Wakatupesha mukanda umvua mulombe ne yeye kundomba bua kulonga Bible, ne meme kuitaba. Mvua musue kulonga bikole, tuvua tulonga misangu ibidi ku lumingu ne dilonga dionso divua dienza mêba anayi!

Mvua ne disanka bua malu a mu Bible avua Bantemu bandongesha. Pakandejabu dîna dia Nzambi, Yehowa mu wanyi Bible mu tshiena Hongrie, bivua bikole bua meme kuitaba. Mu bidimu 27 bimvua nya mu tshitanda, tshivua muanji kumvua musangu nansha umue batela dîna dia Nzambi. Mandamuna a mu Bible mimpe adi umvuika avua ankemesha bikole. Tshilejilu, ngakalonga ne: bafue ki mbamanye bualu nansha bumue, bienze bu balale tulu tukole. (Muambi 9:5, 10; Yone 11:11-15) Mvua mulonge kabidi bua mulayi wa mu Bible wa bulongolodi bupiabupia muikala ‘lufu kaluyiku kabidi.’ (Buakabuluibua 21:3, 4) Ndi ne ditekemena dia kumonangana ne tatuanyi kabidi mu bulongolodi bupiabupia muikala “dibika dia ku lufu.”​—Bienzedi 24:15.

Rose wakadifila pende mu dilonga dia Bible ne muoyo mujima. Tuakaya kumpala lukasa, tuetu kujikija dilonga mu ngondo ibidi tshianana! Tuvua tubuela mu bisangilu bionso bivua Bantemu benza ku Nzubu wa Bukalenge. Dinanga, diambuluishangana ne buobumue bivua munkatshi mua Bantemu ba Yehowa bivua bitukemesha bikole.​—Yone 13:34, 35.

Mu 1976, meme ne Rose tuakaya mu Australie. Diakamue tuakakeba Bantemu ba Yehowa ba muaba awu. Bantemu ba muaba awu bakenza bua tudiumvue bu tudi kuetu. Mu 1978, tuakalua Bentemu ba Yehowa.

Ndekelu wa bionso, ngakapeta mandamuna a nkonko ivua mindubakaje munkatshi mua bidimu bia bungi. Mu disemena pabuipi ne Yehowa Nzambi, ndi mujingulule ne: n’Tatu muimpe mutambe. (Yakobo 4:8) Ditekemena dianyi dia kumonangana ne tatuanyi mundedi tshiakabidi mu bulongolodi bupiabupia didi dinsankisha bikole.​—Yone 5:28, 29.

Mu 1989, meme ne Rose tuakangata dipangadika bua kupingana mu Hongrie bua kuambila balunda betu ne bena mu mêku etu ne bantu bakuabu batudi mua kutuilangana nabu malu atudi balonge. Tudi bapete diakalenga dia kulongesha bantu ba bungi Bible. Bantu bapite pa 70 ba munkatshi muabu mbaditue mu dienzela Yehowa mudimu ne maman wanyi udi pende munkatshi muabu.

Mvua musambile munkatshi mua bidimu 17 bua kupeta mandamuna a nkonko yanyi. Bidimu 39 bimane kupita, ntshidi ntungunuka ne kusambila kadi mpindieu ndi nsambila ngamba ne: “Tuasakidila Tatu wanyi wa mu diulu bua kuandamuna masambila anyi a ku buana.”