SEMENA PABUIPI NE NZAMBI
“Tangilayi! Ndi mvuija bintu bionso bipiabipia”
Udiku ujinga bua wewe ne bena mu dîku diebe nuikale ne makanda a mubidi ne muoyo wa kashidi anyi? Udiku musue kuikala ne muoyo mu buloba mudi kamuyi bisama, makenga ne lufu anyi? Buloba bua buena ebu ki mbualu bufuikakaja to. Bualu mu katupa kîpi emu buloba bupiabupia bua buakane nebuikalaku, bualu Yehowa Nzambi mmulaye bualu ebu. Tangila mudibu baleje muikala bualu ebu mua kuenzeka mu Buakabuluibua 21:3-5.—Bala.
“[Nzambi] neakupule tshinsonji tshionso ku mêsu kuabu.” (Buakabuluibua 21:4) Mbinsonji kayi bikala Yehowa mua kukupula? Ki mbinsonji bia disanka anyi bitu bikuba mêsu etu to. Mulayi wa Nzambi udi wakula bua binsonji bidi bifumina ku ntatu ne tunyinganyinga. Nzambi kakumisha anu binsonji patupu to, kadi neabikupule bua kashidi pumbushaye malu adi abikebesha, ntatu ne tunyinganyinga.
“Lufu kaluakuikalaku kabidi.” (Buakabuluibua 21:4) Bualu bukuabu kayi budi bupuekesha bantu binsonji bia bungi ku mêsu kupita lufu? Yehowa neajule bantu bavua batumikile mikenji yende ku lufu. Mmushindu kayi? Mpumbushaye tshidi tshikebesha lufu, mmumue ne: bubi butudi bapiane kudi Adama. (Lomo 5:12) Yehowa neafikishe bantu badi batumikila mikenji yende ku bupuangane ku diambuluisha dia mulambu wa Yezu. * Nunku, ‘nebajimije’ lufu muena lukuna wa ndekelu. (1 Kolinto 15:26) Bantu ba lulamatu nebikale ne muoyo ne makanda a mubidi pa buloba apa bua kashidi anu muvua Nzambi muambe.
“Nansha bisama kabiakuikalaku kabidi.” (Buakabuluibua 21:4) Bisama kayi bikala kabiyiku kabidi? Mbisama bionso bia mu lungenyi, bia mu muoyo ne bia mu mubidi bidi bikebesha kudi mpekatu ne dipanga bupuangane bidi bikebeshela miliyo ya bantu ntatu kabiakuikaku kabidi.
Mu katupa kîpi emu, netuikale ne nsombelu udi kayi ne binsonji, lufu ne bisama. Udi mua kudiebeja ne: ‘kadi nkuepi’? ‘Mulayi wa Nzambi eu udi mua kuikala wakuila bua nsombelu wa mu diulu anyi?’ Tòo. Bua tshinyi kabiena nanku? Tshia kumpala, mulayi eu udi utuadija ne mêyi aa: “Ntenta wa Nzambi udi ne bantu,” ne bantu aba mbadi ne muoyo pa buloba. (Buakabuluibua 21:3) Tshibidi, mulayi eu udi wakula bua buloba muikala ‘lufu kuluyiku kabidi,’ mmumue ne: mu buloba buvua ne lufu, kadi kaluyimu kabidi. Lufu kalutu luanji kuikala mu diulu to, kadi pa buloba apa mpadilu ne lukadi luenze bidimu bia bungi. Bushuwa, mulayi wa Nzambi wa kuikala ne nsombelu muimpe neukumbane pa buloba apa.
Nzambi neumishe binsonji bivua bikebesha kudi ntatu ne makenga
Yehowa mmusue bua ne: tuitabuje mulayi wende eu wa buloba bupiabupia bua buakane. Nzambi mumane kuleja masanka ikala mua kulua, wakashindika mu mulayi wende eu wamba ne: “Tangilayi! Ndi mvuija bintu bionso bipiabipia.” Udi wamba kabidi ne: “Mêyi aa nga kueyemena ne malelela.” (Buakabuluibua 21:5) Kuenaku pebe mua kulonga malu a bungi a muwikale wewe ne bantu baudi munange munkatshi mua batendeledi badi ne disanka bikala mua kumona mudi mulayi wa Nzambi ne bua kukumbana anyi?
Mvese ya mu Bible iudi mua kubala mu ngondo wa dikumi ne muibidi
1 Petelo 1-5; 2 Petelo 1-3; 1 Yone 1-5; 2 Yone 1-13; 3 Yone 1-14; Yuda 1-25–Buakabuluibua 1-22
^ tshik. 3 Bua kumanya malu a bungi adi atangila mulambu wa tshia bupikudi wa Kristo, bala nshapita 5 wa mukanda wa Bible utu ulongesha tshinyi menemene? mupatula kudi Bantemu ba Yehowa.
