“NDI ne ditekemena.” Aa mmêyi avua Martin Luther King wa mu États-Unis uvua wimanyina manême a bantu muambe mu muyuki wende muende lumu uvuaye muenze mu dia 28/8/1963, kukadi kupite bidimu makumi atanu. Mu mêyi ende mimpe aa, Martin Luther uvua uleja ditekemena divuaye nadi dia se: dimue dituku kansungansunga ka ditapulula bantu bua dikoba diabu nekajike. Nansha muvuaye muenze muyuki wende eu kumpala kua bena mu États-Unis, bantu ba mu matunga a bungi bakanyisha mêyi avuaye muambe aa.

Ngondo isatu kunyima kua muyuki wa Martin Luther, mu dia 20/11/1963, matunga mapite pa 100 akadisanga ne kuangata dipangadika dia kumbusha mishindu yonso ya kansungansunga ka makoba. Bakangata mapangadika makuabu a mushindu eu mu bidimu bia bungi biakalonda. Madikolela onso aa adi ajula lukonko elu: Mbipeta kayi biakamueneka?

Mu dia 21/3/2012, Ban Ki-moon secretere wa mu bulongolodi bua matunga masanga (ONU) wakamba ne: “Kudi mikanda ya bungi ya diumvuangana itudi batue biala bua kukandika ne kujikija kansungansunga ka makoba, disunguluja dia bisamba, dikina bena bisamba bikuabu ne dibenga kunemeka mmuenenu wa bakuabu. Kadi kansungansunga katshidi anu katungunuke ne kukengesha miliyo ne miliyo ya bantu pa buloba bujima.”

Nansha mu matunga mudibu bakepeshe ndambu disunguluja dia makoba ne mishindu mikuabu ya kansungansunga, lukonko ludi lujuka ndua ne: tshidibu benze etshi ntshimbushaku bulelela lungenyi lua kansungansunga ludi mu muoyo wa bantu anyi? Peshi ntshiumbusha anu kansungansunga kadi kamueneka ku mêsu kua bantu? Bamue badi bela meji ne: malubuluka adibu benze aa adi pamuapa mua kujikija disungulujangana, kadi kaena pamuapa mua kujikija kansungansunga to. Bua tshinyi bidi nanku? Bualu disungulujangana mbualu budi bumueneka patoke ne badi mua kubunyokela muntu bilondeshile mikenji, kadi kansungansunga kadi mu meji a muntu, muaba udibu kabayi mua kuakaja bipepele to.

Kadi diditatshisha dionso dia kumbusha kansungansunga kadiena anu ne bua kuikala ne tshipatshila tshia kujikija malu adi afumina ku disungulujangana, kadi didi kabidi ne bua kushintulula meji a muntu anyi mudiye udiumvua bua bantu ba bisamba bikuabu. Bidiku mua kuenzeka anyi? Biobi nanku, mushindu kayi? Tuanji kukonkonona nsombelu ya bamue bantu yatuambuluisha bua kubenga kumona anu ne: kudi mushindu wa muntu kushintuluka, kadi kumona kabidi ne: kudi bualu budi mua kumuambuluisha bua kushintuluka.

Linda udi wamba ne: Mvua muledibue mu Afrique du Sud. Mvua mmona muntu yonso wa mu Afrique du Sud udi kayi mutoke bu mushadile, kayi mulonge, udibu kabayi mua kueyemena ne anu bu muena mudimu wa batoke. Mvua ne lungenyi lua kansungansunga mu mutu tshiyi mumanye to. Kadi ngakashintulula lungenyi dîba dingakatuadija kulonga Bible. Ngakalonga ne: “Nzambi kena ne kansungasunga to,” ne kulonga kabidi ne: muoyo udi ne mushinga wa bungi kupita dikoba dia mubidi anyi muakulu utudi tuakula. (Bienzedi 10:34, 35; Nsumuinu 17:3) Mêyi adi mu Filipoyi 2:3 akangambuluisha bua kumona ne: meme ngangata muntu yonso bu muntambe, ndi mua kulekela kansungansunga. Kutumikila mibelu ya mu Bible bu eyi, nkungambuluishe bua kudifila kudi bakuabu tshiyi ntangila dikoba diabu to. Mpindieu ndi ndiumvua bu mupatuke mu bupika bua kansungansunga.

 Michael udi wamba ne: Mvua mukolele muaba uvua batoke ba mu Australie ba bungi, ne mvua ne kansungansunga kakole kudi bena Asie, nangananga bena Chine. Pamvua ngendesha mashinyi meme kumona muntu muenze bu wa mu Asie, ke meme kupuekesha lumuenu lua mashinyi ne kumuamba dîyi edi: “pingana kuenu, kena Asie aka!” Kadi pangakatuadija kulonga Bible, ngakalua kumona mudi Nzambi umona bantu. Mmubanange kabiyi bua muaba udibu bafumine anyi bua tshimuenekelu tshiabu. Dinanga edi diakandenga ku muoyo ne lukinu luanyi luakashintuluka kulualu dinanga. Dishintuluka dia mushindu eu didi dikemesha. Mpindieu ndi ne disanka dia bungi bua kudisangisha ne bantu badi bafumina mu matunga onso ne bisamba bionso. Bualu ebu buakashintulula mmuenenu wanyi ne kumpetesha disanka dia bungi.

Sandra udi wamba ne: Mamuanyi uvua wa mu Umunede mu tshimenga tshia Delta mu ditunga dia Nigeria. Kadi dîku dia ba papa ndia mu Edo ne bavua bakula muakulu wa Esan. Bua dishilangana dia bisamba edi, bena mu dîku dia ba papa wanyi bakatuadija kuenzela maman malu ne kansungansunga too ne dituku dia lufu luende. Nunku ngakangata dipangadika dia kubenga kumvuangana ne muntu udi wakula muakulu wa Esan anyi kuselangana ne muntu wa mu Edo. Kadi pangakatuadija kulonga Bible, ngakatuadija kumona malu mu mushindu mukuabu. Bu mudi Bible wamba ne: Nzambi kena ne kansungansunga ne udi wanyisha muntu yonso udi umutshina, meme ndi nnganyi bua kukina muntu bua tshisamba tshiabu anyi bua muakulu wabu? Ngakakaja ngelelu wanyi wa meji ne meme kukeba ditalala ne bena mu dîku dia ba papa wanyi. Kutumikila mibelu ya mu Bible nkungambuluishe bua kuikala ne disanka ne nkumpeshe ditalala dia mu lungenyi. Mbingambuluishe kabidi bua kumvuangana ne bantu ba mu bisamba bionso, dikoba dionso, muakulu wonso ne ditunga dionso. Kadi nudi bamanye udi munsele anyi? Mmuntu wa mu Edo ne uvua wakula muakulu wa Esan.

Bua tshinyi Bible uvua ne bukole bua kuambuluisha bantu aba ne bakuabu ba bungi bua kulekela lukinu ne kansungansunga? Bualu Bible n’Dîyi dia Nzambi. Didi ne bukole bua kushintulula mushindu  udi muntu wela meji ne udiye udiumvua bua bakuabu. Bible udi kabidi uleja tshidi tshikengela bua kujikija kansungansunga konso.

Nansha mudi dimanya dia malu a mu Bible mua kuambuluisha muntu bua kubenga kuikala ne majinga mabi ne kuumbusha; kudi malu abidi atudi ne bua kuepuka kumpala kua tuetu kumbusha lungenyi luonso lua kansungansunga. Bualu bua kumpala, mpekatu ne dipanga bupuangane dia bantu. Bible udi uleja patoke ne: “Kakuena muntu udi kayi wenza malu mabi.” (1 Bakelenge 8:46) Nansha tuetu tudienzeja mushindu kayi, tudi anu petu tuluangana ne majinga etu anu bu mupostolo Paulo wakamba ne: “Pandi musue kuenza bualu buimpe, bualu bubi budi kundi.” (Lomo 7:21) Kadi misangu ne misangu muoyo wetu wa bantu bapange bupuangane neutupingaje ku “meji mabi” adi mua kutusaka bua kuikala ne kansungansunga.​—Mâko 7:21.

Bualu buibidi, mbuenzeji bua Satana Diabolo. Bible udi wakula bualu buende bu “mushipianganyi” ne udi wamba kabidi ne: udi “upambuisha ba pa buloba bujima.” (Yone 8:44; Buakabuluibua 12:9) Bidi bileja bua tshinyi kansungansunga nkatangalake mu bantu ne bua tshinyi mbikolele bantu bua kujikija disungulujangana, dishipangana dia bisamba ne malu makuabu bu mudi dibenga kuangata bantu ne mushinga bua makoba abu, tshitendelelu tshiabu anyi bua nsombelu wabu.

Kadi kumpala kua kumbushabu kansungansunga bua kashidi, badi ne bua kuanji kumbusha mpekatu ne dipanga bupuangane dia bantu ne buenzeji bua Satana Diabolo. Bible udi uleja ne: Bukalenge bua Nzambi nebukumbaje bualu ebu.

Yezu Kristo wakalongesha bayidi bende bua kusambila Nzambi mushindu eu: “Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:10) Bukalenge bua Nzambi nebumbushe malu onso mabi bu mudi: kansungansunga ne dibenga kuangata bakuabu ne mushinga.

Padi Bukalenge bua Nzambi bulua ne buangata malu onso a pa buloba mu bianza, ‘nebasuike’ Satana mu mushindu wa ne: “kapambuishi kabidi bisamba.” (Buakabuluibua 20:2, 3) Nunku nekuikale “buloba bupiabupia,” mmumue ne: bukua bantu, “muikala buakane.” *​—2 Petelo 3:13.

Bantu bikala mua kusomba mu buloba bupiabupia nebavuijibue bapuangane, kabayi ne mpekatu to. (Lomo 8:21) Bu mudibu bena dia Bukalenge bua Nzambi, bisamba ‘kabiena bienzela bikuabu bintu bibi?’ Bua tshinyi? ‘Bualu bua buloba nebuikale buule tente ne kumanya kua Yehowa.’ (Yeshaya 11:9) Mu tshikondo atshi, bantu bonso nebalonge njila ya Yehowa Nzambi ne nebidikije tshilejilu tshiende tshia dinanga. Etshi netshiumvuije mu bulelela ndekelu wa kansungansunga, ‘bualu Nzambi kena ne kansungansunga’ to.​—Lomo 2:11.