Anyisha bua kulonga Dîyi dia Nzambi

Mmunyi munudi mua kupeta disanka mu dîku?

Tshiena-bualu etshi tshidi tshijula nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka dia kuyukila nebe pa mandamuna aa.

1. Bua tshinyi mbimpe kufundisha dibaka kua mbulamatadi bua dîku kuikala ne disanka?

Yehowa Nzambi wa disanka ke wakenza dibaka. Didi ne mushinga bua dîku kuikala ne disanka bualu mmuaba muimpe udi bena dibaka mua kusombela ne kukoleshila bana bimpe. Kadi mmunyi mutu Nzambi umone dibaka? Mmusue bua dibaka kuikalaku kashidi ne bua mulume ne mukaji kufundisha dibaka diabu kua mbulamatadi. (Luka 2:1-5) Nzambi mmusue bua mulume ne mukaji balamatangane. (Ebelu 13:4) Yehowa mmuanyishile bena Kristo bua kushipa dibaka ne kusela anyi kusedibua kabidi anu padi umue wa ku bena dibaka muende.​—Bala Matayo 19:3-6, 9.

2. Mmunyi mudi mulume ne mukaji mua kuenzelangana malu?

Yehowa mmufuke mulume ne mukaji bua bikale bambuluishangana mu dibaka. (Genese 2:18) Bu mudi mulume muikale mfumu wa dîku, yeye ke wa kumpala mu dikebela bena mu dîku diende bintu bidibu nabi dijinga ne kubalongesha malu a Nzambi. Bu mudiye munange mukajende, udi ne bua kudipangisha amue malu. Mulume ne mukaji badi ne bua kunangangana ne kunemekangana. Bu mudi balume bonso ne bakaji bena mibi, bobu bafuilangana luse nebikale ne disanka mu dibaka.​—Bala Efeso 4:31, 32; 5:22-25, 33; 1 Petelo 3:7.

3. Kumbuka ku dibaka didi ne bilumbu nkuimpe anyi?

Wewe ne bilumbu ne muena dibaka nebe, ditatshishayi bua kuenzelangana malu ne dinanga. (1 Kolinto 13:4, 5) Bible kena ukankamija bena dibaka bua kutapulukangana bua kushisha kujikija bilumbu biabu to. Mu nsombelu mikole, muena Kristo udi mua kumona ni bidi bikengela kuanji kulekelangana.​—Bala 1 Kolinto 7:10-13.

  4. Nzambi mmusue bua bana bikale bishi?

Yehowa mmusue bua wikale ne disanka. Udi ukupesha mibelu mimpe ya muudi mua kuikala ne disanka mu bunsonga buebe. Mmusue bua baledi bebe bakuambuluishe ne meji ne dimanya bidibu nabi. (Kolosai 3:20) Yehowa udi umona bionso biudi wenza bua kutumikila baledi bebe.​—Bala Muambi 11:9–12:1; Matayo 19:13-15; 21:15, 16.

5. Baledi, mmunyi mudi bana benu mua kupeta disanka?

Nudi ne bua kuenza mudimu mukole bua kukebela bana biakudia, muaba wa kulala ne bia kuvuala. (1 Timote 5:8) Kadi bua bana benu kupetabu disanka, nudi kabidi ne bua kubalongesha bua kunangabu Nzambi ne kulonga malu ende. (Efeso 6:4) Nuenu banange Nzambi, bidi mua kusaka bana benu bua kumunanga pabu. Wewe ulongesha muanebe ne Dîyi dia Nzambi, udi mua kumuambuluisha bikole.​—Bala Dutelonome 6:4-7; Nsumuinu 22:6.

Wewe ukankamija bana bebe ne ubela kalumbandi, nebibambuluishe bikole. Udi kabidi ne bua kubabela ne kubapesha dinyoka. Wewe wenza nunku, neubakube ku malu adi mua kubanyangila disanka. (Nsumuinu 22:15) Kadi ki mbimpe kubanyoka ne tshikisu to.​—Bala Kolosai 3:21.

Bantemu ba Yehowa batu bapatula mikanda mivule bua kuambuluisha nangananga baledi ne bana. Mikanda eyi itu ne malu a mu Bible.​—Bala Musambu 19:7, 11.

Bua kumanya malu makuabu, bala nshapita wa 14 wa mukanda wa Bible utu ulongesha tshinyi menemene?, mupatula kudi Bantemu ba Yehowa.