Anyisha bua kulonga Dîyi dia Nzambi

Nzambi nnganyi?

Tshiena-bualu etshi tshidi ne nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka dia kuyukila nebe pa mandamuna aa.

1. Nzambi nnganyi?

Nzambi mulelela ke udi mufuke bintu bionso. Bible udi umubikila ne: ‘Mukalenge wa bikondo,’ mmumue ne: kena ne tshibangidilu ne kakuikala ne ndekelu to. (Buakabuluibua 15:3) Bu mudi Nzambi ke udi mutupeshe muoyo, tudi ne bua kumutendelela anu yeye.​—Bala Buakabuluibua 4:11.

2. Nzambi utu bishi?

Muntu nansha umue katu muanji kumona Nzambi to, bualu udi Nyuma; mmumue ne: mmuntu udi mupite bifukibua bikuabu bionso bidi pa buloba kule ne kule. (Yone 1:18; 4:24) Ngikadilu ya Nzambi idi imuenekela ku bintu bidiye mufuke. Tshilejilu, patudi tutangila mishindu mishilashilangane ya bimuma ne bilongo bidiye mufuke, tudi tumona ne: udi ne dinanga ne meji. Bunene bua diulu ne buloba budi buleja bukole budi nabu Nzambi.​—Bala Lomo 1:20.

Tudi mua kumanyina kabidi ngikadilu ya Nzambi bimpe mu Bible. Tshilejilu, udi utuambila malu atu Nzambi musue ne atuye mukine, mutuye wenzela bantu malu ne mutuye umvua bua malu atutu tuenze.​—Bala Musambu 103:7-10.

3. Nzambi utuku ne dîna anyi?

Yezu wakamba ne: ‘Tatu wetu udi mu diulu, banemeke dîna diebe.’ (Matayo 6:9) Nansha mudi Nzambi ne mianzu ya bungi, udi ne dîna anu dimue. Batu badishindumuna bilondeshile muakulu ne muakulu. Mu Tshiluba tudi tudishindumuna ne: “Yehowa” anyi imue misangu “Yahweh.”​—Bala Musambu wa 83:18.

Mu Bible ya bungi, bumbushe dîna dia Nzambi ne mbapingaje pa mutu padi mianzu bu mudi: Maweja, Mukalenge anyi Mfumu. Kadi pakafundabu Bible, dîna edi divuamu misangu mitue ku 7 000. Yezu wakamanyisha bantu dîna dia Nzambi bualu uvua uditela pavuaye ubalongesha Dîyi dia Nzambi. Wakambuluisha bantu bua kumanyabu Nzambi.​—Bala Yone 17:26.

 4. Yehowa utuku ututabalela anyi?

Yehowa udi ututabalela padiye uteleja masambila a muntu ne muntu pa nkayende. (Musambu 65:2) Makenga adi enda avulangana adiku aleja ne: Nzambi kena ututabalela anyi? Bamue bantu badi bela meji ne: Nzambi udi utukengesha bua kututeta, kadi kabiena nanku to. Bible udi wamba ne: “Bualu ebu kabuikadi kudi Nzambi bua yeye kuenza malu mabi.”​—Yobo 34:10; Bala Yakobo 1:13.

Nzambi mmututue mushinga padiye mutupeshe tshipedi tshia kudisunguila malu. Katuenaku mua kusanka bua tshipedi etshi pa kusungula bua kuenzela Nzambi mudimu anyi? (Yoshua 24:15) Makenga mmavulangane bualu bantu ba bungi mbasue kuenzela bakuabu malu mabi. Patu Yehowa umona malu mabi a nunku bitu bimunyingalaja bikole.​—Bala Genese 6:5, 6.

Yehowa ukadi pa kutuma Yezu bua kujikija makenga ne kubutula bantu badi baakebesha. Kadi bua mpindieu, Yehowa mmumanye tshidiye muanji kulekeela makenga bua tshitupa tshîpi. Tshiena-bualu tshia buena etshi tshia musangu walonda netshiumvuije bua tshinyi Nzambi mmulekele makenga.​—Bala Yeshaya 11:4.

5. Ntshinyi tshidi Nzambi utulomba?

Yehowa uvua mutufuke mu mushindu wa kumumanya ne kumunanga. Mmusue bua tulonge bulelela bua tumumanye. (1 Timote 2:4) Patudi tulonga Bible, tudi mua kumanya Nzambi ne kumumona bu Mulunda.​—Bala Nsumuinu 2:4, 5; Yakobo 2:23.

Bu mudi Yehowa ke udi mutupeshe muoyo, yeye ke utudi ne bua kunanga bikole kupita bantu bakuabu bonso. Tudi tuleja mutudi bamunange patudi tumulomba mu disambila ne tuenza malu adiye utulomba. (Nsumuinu 15:8) Yehowa udi utulomba bua tunange petu bantu bakuabu.​—Bala Mâko 12:29-31; 1 Yone 5:3.

Bua kumanya malu makuabu, bala nshapita wa 1 wa mukanda Bible utu ulongesha tshinyi menemene?, mupatula kudi Bantemu ba Yehowa.

[Tshimfuanyi mu dibeji 17]

Bidiku mua kuikala bimpe padi Nzambi muanji kulekela makenga anyi?