DIKOKANGANA ne baku didi mua kuikala bualu bua tuseku padidi dienzeka mu teyatre, kadi padidi dienzeka mu nsombelu wa matuku onso kaditu disekesha to. Reena wa mu ditunga dia Inde udi wamba ne: “Munkatshi mua bidimu bia bungi, mamuenanyi uvua ubuelakana mu malu a mu dîku dietu. Mumvua tshiyi ne tshiakuenzela mamuenu, bayanyi ke umvua njikijila tshiji. Mbienza anu bu ne: misangu yonso uvua ne bua kusungula bua kuikala mulume muimpe anyi kuikala muana muimpe.”

Bua tshinyi bamue baledi batu babuelakana mu malu a bana babu badi mu mabaka? Jenny muena bualu butuvua batuadije nabu udi wamba ne: “Bidi mua kubatonda bua kumona muana mutekete udi kayi ne dimanya dia bungi ulua bayende anyi mukaji wa muanabu, utangila malu ende onso.” Dilip bayende wa Reena udi wamba pende ne: “Baledi badi mua kumona bu ne: badi babanyenga muanabu uvuabu bakolesha ne benzele malu a bungi. Badi mua kuikala kabidi batshina ne: muanabu kena muanji kukumbana bua kusomba bimpe mu dibaka to.”

Mu bulelela, imue misangu bana ke batu balomba baledi bua kubuela mu malu a mu mabaka abu. Tuangata tshilejilu tshia Michael ne mukajende Leanne ba mu ditunga dia Australie. Michael udi wamba ne: “Leanne mmukolele mu dîku divua bantu bonso banangangane bikole ne bayukila malu onso patoke. Nunku patuvua baselangane, uvua uya kudi tatu muenu bua kumulomba lungenyi bua malu avua akengela  bua tuetu kuenza. Tatu muenu uvua ne dimanya dia bungi, kadi bivua bintonda pavuaye uya kudiye pamutu pa kulua kunkonka meme!”

Bushuwa bilumbu ne baku bidi mua kukebesha ntatu mu dibaka. Ke mudibi buebe wewe anyi? Utu upetangana ne baku bebe anyi? Tangila ntatu ibidi idi mua kumueneka ne tshiudi mua kuenza bua kupita nayi.

Bayebe anyi mukajebe udi umueneka mutambe kulamata baledi bende bikole. Luis wa mu ditunga dia Espagne udi wamba ne: “Mukajanyi uvua wela meji ne: tuetu katuyi basombele pabuipi ne baledi bende, bivua mua kumueneka bu ne: kavua mubanange to. Kadi pavua mukajanyi mulele muanetu wa kumpala, baledi banyi bavua balua kututangila dituku dionso, ne bualu abu buvua bumutonda bikole. Bualu ebu buakatukebela bilumbu bia bungi mu dibaka.”

Malu a kumanya:

Bible udi wakula bua dibaka wamba ne: ‘Mulume neashiye tatuende ne mamuende, nealamate mukajende, bubidi buabu nebikale mubidi umue.’ (Genese 2:24) Kuikala “mubidi umue” kakuena amu kumvuija kusombela muaba umue. Kudi kumvuija ne: mulume ne mukajende badi benza dîku dipiadipia didibu ne bua kutabalela kupita mêku adibu bafumine. (1 Kolinto 11:3) Nansha nanku mulume ne mukajende badi ne bua kutungunuka ne kunemeka baledi babu ne kuenza nunku kudi kumvuija kubatabalela. (Efeso 6:2) Wewe mumone ne: padi bayebe anyi mukajebe utabalela baledi bende mmuenze bu udi mukulengulule, newenze tshinyi?

Tshia kuenza:

Tangila bualu ebu ne meji mimpe. Mukajebe anyi bayebe mmunange baledi bende bikole anyi? Peshi udi umona nanku bualu wewe kuena munange baledi bebe bu mudiye munange bende? Bikalabi nanku, nsombelu unuvua nende kuenu udi mua kukufikisha ku dimona bualu ebu mu mushindu mubi anyi? Mmukawu ke udi mua kuikala ukusaka bua kuikala ne lungenyi lua mushindu au anyi?​—Nsumuinu 14:30; 1 Kolinto 13:4; Galatia 5:26.

Bidi bikengela kudikonkonona ne muoyo mujima bua kuandamuna nkonko eyi. Kadi mbimpe udiele nkonko eyi bualu bikala bilumbu bijuka pankatshi pebe ne muena diebe anu bualu kuena upetangana ne baku bebe, umanye ne: dibaka dienu ke didi ne bualu, ki ntshilumbu tshia baku to.

Bilumbu bitu bitamba kujuka mu dibaka bualu mulume ne mukajende kabena bamona malu mu mushindu umue to. Udiku mua kuteta bua kumona malu mu mushindu udi bayebe anyi mukajebe uamona anyi? (Filipoi 2:4; 4:5) Ke tshivua Andrián wa mu ditunga dia Mexique muenze. Udi wamba ne: “Bu muvua mukajanyi mukolele mu dîku dia bilumbu, mvua ngepuka bua kutamba kusomba ne baku banyi. Ndekelu wa bionso, ngakakosa nabu malanda munkatshi mua bidimu bia bungi. Bualu ebu buakajula bilumbu mu dibaka dietu bualu mukajanyi uvua anu musue bua kuikala pabuibi ne dîku diabu, nangananga mamuende.”

André wakalua kushintulula mushindu uvuaye umona baku bende. Udi wamba ne: “Nansha mumvua mumanye ne: kutamba kuendela baledi ba mukajanyi kuvua kumushiya ne kanyinganyinga, kadi kukosa makasa kuvua kukebesha kabidi bilumbu bikuabu. Ngakenza muanyi muonso bua kupingaja malanda mimpe ne baku banyi.” *

Baku bebe badi ne tshibidilu tshia kubuela mu malu a mu dibaka dienu, banupesha mibelu dîba dinudi kanuyi nayi dijinga. Nelly wa mu ditunga dia Kazakhstan udi wamba ne: “Tuvua basombele mu dîku dia ba bayanyi bidimu muanda mutekete bia kumpala  bia dibaka dietu. Tuvua tutandangana bua mushindu utuvua tukolesha bana betu, umvua ndamba ne ndongolola lubanza. Tuetu kuyukila ne bayanyi ne mamuenanyi bua malu au, kadi biakajula kabidi bilumbu bia bungi!”

Malu a kumanya:

Panudi nuselangana, kanuena kabidi ku bukokeshi bua baledi benu to. Bible udi wamba ne: ‘Mutu wa mulume yonso udi Kristo, ne mutu wa mukaji yonso udi mulume,’ mmumue ne: bayende. (1 Kolinto 11:3) Nansha nanku, mulume ne mukajende badi ne bua kunemeka baledi babu anu bu mutukavua bamane kuleja kumpala. Nsumuinu 23:22 udi wamba ne: ‘Umvua mêyi a tatuebe wakakulela; kupetudi mamuebe paluaye muntu mununu.’ Kadi newenze tshinyi bikala baledi bebe anyi baku bebe bakeba kunuenzeja malu mudibu bobu bela meji?

Tshia kuenza:

Teta bua kumanya tshidi tshisaka baledi bebe anyi baku bebe bua kuenza malu adi amueneka bu kubuelakana mu bilumbu bienu. Ryan muena bualu butuvua batuadije nabu udi wamba ne: “Imue misangu baledi batu bajinga kuikala anu ne mushinga ku mêsu kua bana babu.” Pamuapa kabena badibueja mu malu etu ku bukole to, ne tudi mua kujikija tshilumbu etshi patudi tutumikila mubelu wa mu Bible udi wamba ne: ‘Nulejangane lutulu, nulekelelangane mibi yenu, bikala muntu ne mukuabu tshilumbu.’ (Kolosai 3:13) Kadi newenze tshinyi bikala baku bebe batamba kudibueja mu malu a mu dîku dienu ne bikadi bijula bimvundu pankatshi pebe ne mukajebe anyi bayebe?

Bamue bantu mbadienzeje bua kuleja baledi babu malu adibu mua kuenza ne kubenga kuenza. Kuenza nunku kakuena kumvuija kubelela mikenji to. * Kadi misangu ya bungi bidi bikengela kubaleja mu malu audi wenza ne: mukajebe anyi bayebe ke uudi ne bua kutabalela kumpala kua bakuabu. Tshilejilu, Masayuki wa mu ditunga dia Japon udi wamba ne: “Nansha baledi bobu beleje mmuenenu wabu bua bualu kampanda, kuitabi anu musangu umue to. Uvuluke ne: ukadi muenze diebe dîku dipiadipia. Tshia kumpala anji keba bua kumanya mudi bayebe anyi mukajebe wela meji bua mubelu au.”

Nudi mua kuepuka bilumbu bia bungi ne baku benu panudi nukeba bua kujingulula meji adibu nawu ne nuenza bua bilumbu ebi kabijudiji ndululu pankatshi pebe ne mukajebe anyi bayebe. Jenny udi wamba bua bualu ebu ne: “Imue misangu patuvua tukokangana ne bayanyi bua baledi betu, bivua bitulenga bikole ku muoyo ne bivua bimueneka ne: tuvua tubungamijangana patuvua tuela bilema bia baledi betu patoke. Ndekelu wa bionso tuakadienzeja bua kulekela kuakula bua bilema bia baku betu mu mushindu uvua utapa ku muoyo, kadi tuakalonga mua kupita ne lutatu alu. Nunku biakatuambuluisha bua kunangangana bikole mu dibaka.”