Bible udi ushintulula nsombelu ya bantu

NTSHINYI tshivua tshisake rasta kampanda bua kukosa nsuki yende mile ne kulekela lukinu luvuaye nalu bua batoke? Tshivua tshishintulule nsongalume kampanda muena tshikisu uvua unana makuta a basumbishi ba diamba ntshinyi? Londesha malu adi bantu aba bamba.

“Ngakalekela lukinu.”​—HAFENI NGHAMA

BIDIMU: 34

DITUNGA DIABU: ZAMBIE

TSHIVUAYE: RASTA

KALE: Bavua bandelele mu tshitudilu tshia bena tshimuanyi mu ditunga dia Zambie. Mamu uvua munyeme mvita mu ditunga dia Namibie, kubuelaye mu tshisumbu tshia SWAPO tshivua tshiluisha bukalenge bua bena Afrique du Sud buvua bukokesha mu Namibie tshikondo atshi.

Katshia ku buana buanyi too ne pangakakumbaja bidimu 15 tuvua basombe mu bitudilu bia bena tshimuanyi bia bungi. Bavua balongesha bansongalume ba mu tshisumbu tshia SWAPO bua kutshitua nyama ku mikolo. Bavua batulongesha bua kunanga anu tshisumbu tshietu atshi ne bua kukina batoke.

Pamvua ne bidimu 11, mvua musue kupeta komfirmasiyo mu tshitanda tshivua mu tshitudilu tshivua tshisangisha bena Katolike, bena Luther, bena Anglikane ne bena bitendelelu bikuabu. Kadi pastere umvua muambile bualu ebu wakantekesha mu mikolo. Katshia ku tshikondo atshi, ngakatuadija kuamba ne: Nzambi katuku to. Bua mumvua munange mizike ya rege bikole ne njinga kuluisha kansungansunga kavuabu benzela bafike, ngakabuela mu tshisumbu tshia ba Rasta pangakakumbaja bidimu 15. Ngakalepesha nsuki, kubangisha kuyivunga, kunua diamba, kujila minyinyi ne kukeba budikadidi bua bafike. Kadi tshivua mulekele buendenda ne ditangila filme ya tshikisu ne mvua anu ne buakulavi.

MUSHINDU UDI BIBLE MUSHINTULULE NSOMBELU WANYI: Mu tshidimu tshia 1995 pamvua ne bidimu bitue ku 20, ngakabanga kuela meji bikole bua tshimvua mua kuenza mu nsombelu wanyi. Mvua mbala mikanda yonso ya ba Rasta imvua mpeta. Imue ya kudiyi ivua yakula bua Bible, kadi tshivua ngumvua malu avuabu bumvuijamu to. Nunku meme kuangata dipangadika dia kudibadila Bible.

Pashishe mulunda wanyi mukuabu uvua pende Rasta wakampesha ka mukanda ka kulonga naku Bible ka Bantemu ba Yehowa. Ngakadilongela ka mukanda aka pamue ne Bible. Ngakalua kupetangana ne Bantemu ba Yehowa, meme kutungunuka ne kulonga nabu Bible.

 Ngakadienzeja bikole bua kulekela diamba ne dikuatshika maluvu. (2 Kolinto 7:1) Meme kuakaja tshimuenekelu tshianyi, kukosa nsuki, kulekela filme ya bantu butaka ne ya tshikisu, kulekela kabidi buakulavi. (Efeso 5:3, 4) Meme kulekela kabidi lukinu lumvua nalu bua batoke. (Bienzedi 10:34, 35) Bua kushintuluka bivua bikengela kulekela mizike ivua isakangana ku dikala ne kansungansunga, kulekela balunda banyi ba kale bavua bansaka bua kuenza kabidi malu mabi amvua ngenza kumpala.

Meme mumane kushintuluka, ngakakeba Nzubu wa Bukalenge wa Bantemu ba Yehowa ne kubebeja ni mvua mua kubuela mu tshitendelelu tshiabu. Bakatuadija kundongesha Bible. Pangakangata dipangadika dia kutambula bua kulua Ntemu wa Yehowa, bena kuetu kabakasanka to. Mamu wakangambila bua kusungula tshitendelelu tshikuabu tshionso tshia bena Kristo pa kumusha tshia Bantemu. Manseba mukuabu uvua munene mu mbulamatadi uvua anu ungamba misangu yonso bua dipangadika dianyi dia kulua Ntemu.

Kadi kumanya mushindu uvua Yezu usomba ne bantu ne kutumikila mibelu yende kuakangambuluisha bua kutantamena buluishi ne tuseku. Pamvua mfuanyikija malu atu Bantemu balongesha ne tshidi Bible wamba, ngakatuishibua ne: mvua mupete tshitendelelu tshilelela. Tshilejilu, badi batumikila mukenji wa mu Bible wa kuyisha bakuabu. (Matayo 28:19, 20; Bienzedi 15:14) Kabena kabidi babuelakana mu malu a tshididi.​—Musambu 146:3, 4; Yone 15:17, 18.

MASANKA ANGAKAPETA: Kutumikila mikenji ya mu Bible nkungambuluishe mu malu a bungi. Tshilejilu, kulekela diamba nkungambuluishe bua kubenga kutula mfranga mipite bungi ngondo yonso. Tshiena kabidi nyunguluka lungenyi to, ne ndi ne mubidi muimpe mpindieu.

Mpindieu ndi ne nsombelu muimpe umvua njinga pantshivua nsonga. Bualu bua mushinga bupite onso bundi mupete mbua kuikala mu malanda mimpe ne Nzambi.​—Yakobo 4:8.

“Ngakalonga bua kukanda tshiji.”​—MARTINO PEDRETTI

BIDIMU: 43

DITUNGA DIABU: AUSTRALIE

TSHIVUAYE: MUSUMBISHI WA DIAMBA

KALE: Pantshivua muana, bena mu dîku dietu bavua misangu ya bungi bamuangala. Tuvua tusombela mu misoko mikese, mu bimenga binene ne tshikondo kampanda tuvua basombele mu tshitupa tshivua bena mishonyi bibakile bena kalaba. Ntshidi muvuluke amue malu mimpe atuvua tuenza tshikondo atshi ne bana betu bakuabu ne ba manseba, tuya kuloba, kulemba nyama ne kuenza bimue bintu bivua bena kalaba benza.

 Tatu uvua wenza boxe, ne wakatuadija kundongesha mushindu wa kuluangana pantshivua muana. Mvua nduangana ne bantu bikole. Pamvua ne bidimu dikumi ne pamutu, mvua mpitshisha mêba a bungi mu nganda nnua maluvu. Meme ne balunda banyi tuvua basue kubunda bantu. Tuvua tuangata tuele ne mitshi ituvua tunaya nayi dinaya dia baseball bua kubunda tshisumbu tshia bantu 20 anyi kupita apu.

Mvua mpana diamba ne bintu bivua bantu bavua batulula bintu ku mazuwa a pa mâyi biba. Mvua kabidi nnanyina basumbishi ba diamba makuta abu, ntshingisha bantu ne bingoma bua kufutabu. Dijinga dianyi divua dia kulua mushipianganyi. Buanyi meme, kuvua anu bualu bumue: kushipa bantu anyi bobu banshipe.

MUSHINDU UDI BIBLE MUSHINTULULE NSOMBELU WANYI: Ngakumvua bakula bua Bantemu ba Yehowa pamvua muana. Pamvua ne bidimu bitue ku 20 ngakakonka mamu ni uvua mumanye muaba umvua mua kubapeta. Panyima pa matuku abidi, Ntemu mukuabu diende Dixon wakakokola ku tshibi tshianyi. Tuetu bamane kuyukila mutantshi, wakambikila bua kubuela mu bisangilu bia Bantemu ba Yehowa. Ngakaya mu bisangilu abi ne ntshidi ntungunuka ne kubuelamu bidimu bipite pa 20 mpindieu. Bantemu bakangandamuna nkonko yanyi yonso ne Bible.

Ngakasanka pangakamanya ne: Yehowa udi utabalela bantu bonso nansha babi. (2 Petelo 3:9) Meme kulonga ne: udi Tatu wa dinanga ne udi undama nansha padi muntu mukuabu kayiku. Ngakumvua kabidi bimpe pangakalonga ne: meme mulekele malu mabi, neamfuile luse. Mêyi adi mu Efeso 4:22-24 akangambuluisha bikole. Akankankamija bua ‘kumusha muntu wa kale’ ne ‘kudivuadika muntu mupiamupia wakafukibua mu tshifuanyikiji tshia Nzambi.’

Ngakenza matuku a bungi bua kushintulula nsombelu umvua nende. Mvua mpitshisha lumingu tshiyi nnua diamba, kadi pamvua mpetangana ne balunda banyi ku ndekelu kua lumingu, mvua ndinua. Ngakamona ne: bivua bikengela kumuangala muaba uvua balunda banyi bua meme kuakaja nsombelu wanyi, ke meme kuangata dipangadika dia kuya mu tshimenga tshikuabu. Balunda banyi bakuabu bakangambila bua kunshindikija, meme kuitaba. Mu luendu amu, bakatuadija kunua diamba, bobu kumpesha panyi bua kunua. Meme kubambila ne: mvua mushiye malu mabi onso au panyima, tuetu kushiyangana nabu, meme kubuela nkayanyi mu tshimenga tshipiatshipia. Ngakalua kumvua ne: balunda banyi abu bavua baye kuiba mu banke ne bingoma.

MASANKA ANGAKAPETA: Pamvua mulekele balunda abu, ngakapeta mushindu wa kushintuluka bipepele. Ngakatambula ne kulua Ntemu mu 1989. Meme mumane kutambula, muakunyanyi wa bakaji, mamu ne tatu bakalua pabu Bantemu ba Yehowa.

Ndi musele kukadi mpindieu bidimu 17 ne ndi ne bana basatu. Ndi mumanye mua kukanda tshiji nansha padibu banyobola. Ndi mulonge bua kunanga bantu ba mu ‘bisamba bionso ne bantu bonso ne miakulu yonso.’ (Buakabuluibua 7:9) Ndi mumone ne: mêyi a Yezu adi alonda aa mankumbanyine. Wakamba ne: ‘Binuashala mu dîyi dianyi, nudi bayidi banyi bulelela; nenumanye kabidi bualu bulelela, ne bualu bulelela nebunupe budishikaminyi.’​—Yone 8:31, 32.

[Lungenyi lunene lua mu dibeji 15]

Bua kushintuluka bivua bikengela kulekela mizike ivua isakangana ku dikala ne kansungasunga

[Lungenyi lunene lua mu dibeji 16]

Tuvua tuangata tuele ne mitshi ituvua tunaya nayi dinaya dia baseball bua kubunda tshisumbu tshia bantu 20 anyi kupita apu