Utu mumanye anyi?

Difunda mêna a bantu diakenzeja bua Yezu kuledibua mu Beteleheme ntshinyi menemene?

Luka udi wamba ne: pakela Kaisa Augusto mukenji bua bantu kufundisha mêna mu bukalenge buonso bua bena Lomo, ‘bantu bonso bakaya bua kufundishabu mêna abu, muntu kuabu muntu kuabu.’ (Luka 2:1-3) Kua ba Yosefe tatuende mudishi wa Yezu kuvua ku Beteleheme. Ke bualu kayi Yezu wakaledibua ku Beteleheme bualu Yosefe ne Mariya bakayaku bua kudifundisha ku mikanda. Kufundisha mêna a bantu nunku kuvua kuambuluisha bua kufutshisha bitadi bimpe ne bua kupeta bantu ba kubueja ku busalayi.

Pakakuata bena Lomo ditunga dia Ejipitu mu tshidimu tshia 30 kumpala kua Yezu, bena Ejipitu bakavua ne tshibidilu tshia kufundisha bantu ku mikanda. Bamue bantu badi balonge bikole badi bamba ne: bena Lomo bakalonda tshilejilu tshia bena Ejipitu etshi miaba yonso ivuabu bakokesha.

Kudi mukanda wa mu tshidimu tshia 104 wa ngovena wa bena Lomo uvua mu Ejipitu. Mukanda eu udi mu tshilaminu kampanda tshia mikanda (British Library). Udi wamba ne: “Gaius Vibius Maximus, Prefet wa mu Ejipitu (udi wamba ne): Bu mukadi dibadika bantu dia ku nzubu ne ku nzubu pabuipi, mbimpe kuenzeja bantu bonso badi bumuke mu distrike dia kuabu bua bualu kampanda anyi kansanga, bua baya kuabu kubalela badifundishe mêna ne badime madimi a kuabu ne tshisumi.”

Tshivua tshienze bua Yosefe kukeba bua kupesha Mariya mukanda wa dishipa nawu dibaka pabu kabayi banji kuselangana ntshinyi?

Matayo udi wamba ne: Yosefe wakumvua ne: Mariya uvua ne difu ‘pavuaye mubangila kudi Yosefe’ pabu kabayi banji kuselangana. Bu muvua Yosefe kayi mumanye ne: Mariya udi ne difu ‘bua nyuma muimpe,’ uvua mua kuikala muele meji ne: Mariya uvua muende ne muntu mukuabu, ke bualu kayi uvua ukeba kushipa dibaka.​—Matayo 1:18-20.

Bua bena Yuda, pavua bantu babangilangana, bavua anu bu bakavua baselangane. Kadi bavua basomba pamue bu mulume ne mukaji anu pavuabu benza fete anyi malu kampanda patoke. Kubangilangana kuvua bualu bunene bualu pavuabu kabayi benza dibaka, nsongakaji kavua mua kusedibua pavuaye kayi ne mukanda wa difua dia dibaka to. Bivua bienzeka pavua muntu mulume ubenga mukaji ku disua diende anyi bua bualu bukuabu. Pavua mulume ufua kumpala kua kuenzabu dibaka, bavua bamona muntu mukaji au bu mukaji udi mufuishe bayende. Kadi mukaji yeye muangate mulume mukuabu, bavua bamumona bu munyange lubanza, bamufundila tshibawu tshia lufu.​—Dutelonome 22:23, 24.

Yosefe uvua mua kuikala muele meji bua tshivua bantu mua kuenzela Mariya. Nansha muvuaye ne bua kumanyisha bena mbulamatadi bualu ebu, uvua musue kusungila Mariya. Ke bua tshinyi wakakeba bua kushipa dibaka mu mayele. Bualu mene pavua mamu uvua mulele kadi kayi ne mulume uleja mukanda wa dishipa dibaka, bivua bileja ne: ukavua musedibue.

[Tshimfuanyi mu dibeji 32]

Difundisha mêna dia ngovena wa bena Lomo wa mu Ejipitu, mu tshidimu tshia 104

[Mêyi a dianyisha]

© The British Library Board, all rights reserved (P.904)